Eski ou finn reserve enn le temps precis pou etudié la Bible?

L’ANNÉE derniere, College central ti annonce enn changement dan programme bann reunion, ki permett bann famille gagne plus le temps pou etudié ek ena bann conversation lor la Bible. Si ou enn chef famille, faire sur ki regulierement ou dirige enn l’etude la Bible ki adapté ar besoin la famille avek ou madame ek ou bann zenfant kot zot tou kapav tire profit. Bann couple marié ki pena zenfant pou envie servi sa le temps-la pou etudié la Bible ensam. Bann soeur ek frere celibataire ki pena okenn responsabilité familial pou kapav bien servi sa le temps-la pou faire zot l’etude personnel.

Beaucoup finn exprime zot l’appreciation pou disposition ki ena enn soirée pou l’etude la Bible en famille. Par exemple, Kevin, enn ancien, ti ecrire: “Sa mot ‘merci-la’ li pa assez fort pou exprime seki nou ressenti dan la congregation. En tant ki ancien, nou finn expliké couma nou servi sa soirée libre-la pou faire exactement seki College central inn demandé—pou etudié avek nou famille.”

Jodi, ki so mari enn ancien, ti ecrire: “Nou ena trois tifi, ki ena 15, 11, ek 2 an. Pa trop longtemps nou’nn commence al dan enn congregation kot servi langue des signes. Sa demann nou beaucoup le temps ek zeffort pou prepare tou nou bann reunion. Asterla, avek sa changement-la, nou ena enn soirée en plus ki permette nou concentré lor l’etude la Bible en famille!”

John ek JoAnn, enn couple marié ki servi couma pionnier permanent, ti ecrire: “Souvent nou l’etude la Bible en famille pa ti regulier parski nou ti bizin adapté li par rapport ar bann lezot activité congregation. Sa nouveau changement-la li enn cadeau ki Jéhovah donne nou ek ki redonne nou la force lor plan spirituel—si nou servi sa le temps-la dan fason ki nou supposé servi li.”

Tony, enn frere celibataire ki ena environ 25 an, reserve soirée mardi pou faire so l’etude personnel. Li servi lezot moment dan la semaine pou prepare so bann reunion. Mais selman, Tony dire: “Mo attann plus sa jour mardi-la.” Kifer? “Sa soir-la c’est mo moment special ki mo passe avek Jéhovah.” Tony expliké: “Pendant environ deux heure temps, mo etudié bann sujet ki faire mo relation avek Jéhovah vinn pli fort. Parski mo ena plus le temps pou etudié, sa permette moi pou medite lor bann verset la Bible ki mo lire.” Ki resultat sa finn ena? “Bann conseil Jéhovah pé touche mo leker plus ki avant.” Eski li kapav donne enn l’exemple? “Dan livre Étude Perspicace, mo ti lire concernant l’amitié ki ti ena entre David ek Yonathân. Mo’nn aprann beaucoup avek l’exemple Yonathân ki pa ti ena enn l’attitude egoïste. So l’exemple ti aide moi pou trouve dan enn fason clair ki sa vedir enn vrai camarade. Mo pé attann avek impatience bann soirée mardi, pou decouvert encore bann nouveau tresor!”

Pena doute, tou bann serviteur Jéhovah pou tire bann grand bienfait si zot bien servi sa le temps en plus-la pou faire bann l’etude la Bible profond ek bann l’etude familial ki adapté ar zot besoin.