Question bann lecteur

Ki leson nou tiré dan Proverbes 24:27?

Ecrivain livre Proverbes donne sa conseil-la enn jeune homme: “Prepare to travail en dehors, organise to travail dan to karo. Apré sa to bizin aussi batir enn famille.” Lor ki point sa proverbe ki finn inspiré-la pé mette l’accent? Ki enn jeune homme bizin prepare-li bien avant li marié ek fonde so prop famille, ek li bizin reconette bann responsabilité ki vinn avek sa l’engagement-la.

Dan le passé, fason ki ti explik sa verset-la ti faire nou comprend ki enn mari ek enn papa pa ti bizin zis prend compte so travail, mais li ti bizin aussi batir, setadir encourage so famille, par exemple kan li ti enseigne zot bann kitsoz spirituel. Mem si sa pensé-la li vrai ek li en accord avek la Bible, c’est pa lor la ki sa verset-la mette l’accent. Kifer nou dire sa? Anou examine deux raison.

Premierement, kan sa verset-la servi mot “batir,” c’est pa pou encourage ou-soit pou fortifié enn famille ki deja existé. Au contraire, l’idée c’est pou batir enn lakaz dan enn sens litteral. Mot ki traduire par “batir” kapav aussi ena enn sens symbolik, setadir batir, etabli ou-soit forme enn famille—marié ek gagne bann zenfant.

Deuxiemement, sa verset-la mette l’accent lor fason ki bizin faire bann kitsoz, setadir faire zot dan l’ordre, coumadir nou pé dire: “Avant, to bizin faire sa; apré, to faire sa.” Mais eski sa proverbe-la pé rod dire ki bann responsabilité profane bizin passe avant bann kitsoz spirituel? Non, jamais!

Dan lepok biblik, si enn zom ti envie “batir [so] famille,” setadir marié ek forme enn famille, li ti bizin demann li-mem: ‘Eski mo pré pou prend soin enn femme ek bann zenfant ki nou pou kapav gagné plitar ek donne zot seki zot bizin?’ Avant li ti commence enn famille, li ti bizin travail, setadir li ti bizin occupe so karo. A cause sa, Today’s English Version inn traduire sa verset-la par: “Pa monte to lakaz ek fonde enn famille avant ki to karo inn pré, ek avant ki to sur ki to pou gagne enn salaire.” Eski nou kapav applik mem principe zordi?

Oui. Enn zom ki envie marié bizin prepare-li bien pou sa responsabilité-la. Si so capacité physik permette li, li pou bizin travail. Bien sur, kan enn missié travail dur pou prend soin so famille, fodé pa ki li prend compte zis bann kitsoz materiel ki so famille bizin. Parole Bondié montré ki enn zom ki pa prend compte bann besoin physik, affectif ek spirituel so famille, li pire ki enn dimoune ki pena la foi! (1 Tim. 5:8) Alors, kan enn jeune homme pé prepare-li pou marié ek pou fonde enn famille, li bizin demann li-mem bann question couma: ‘Eski mo pré, dan enn fason raisonnable, pou donne mo famille seki li bizin lor plan materiel? Eski mo assez mur pou prend la tête dan domaine spirituel, dan mo famille? Eski mo pou prend mo responsabilité pou conduire enn l’etude la Bible regulierement avek mo femme ek mo bann zenfant?’ Li clair ki Parole Bondié mette l’accent lor sa bann responsabilité bien important-la.—Deut. 6:6-8; Éph. 6:4.

Alors, enn jeune homme ki envie marié, bizin reflechi bien lor principe ki trouve dan Proverbes 24:27. Li pareil aussi pou enn jeune femme, li bizin demann li-mem si li pré pou prend bann responsabilité ki enn femme ek enn mama pou bizin prend. Enn jeune couple kapav pose mem question kan zot decide lor possibilité pou gagne bann zenfant. (Luc 14:28) Kan bann serviteur Bondié suive sa qualité direction ki inspiré-la, zot kapav evite beaucoup probleme ek sa kapav faire zot ena enn la vie famille ki donne zot satisfaction.

[Commentaire lor page 10]

Ki bann question lor mariage enn jeune homme bizin demann li-mem?