Eski la misere li enn signe ki enn dimoune pena faveur Bondié?

DAN le passé Bondié ti dire bann Israélite: “Fodé ki personne pa vinn pauvre kot toi.” Li ti dire sa parski dan la Loi ki Li ti donne zot, ti ena bann commandement lor fason ki ti bizin prend soin bann pauvre ek mem pou cancel bann dette. (Deutéronome 15:1-4, 7-10) Alors, pa ti bizin ena bann dimoune pauvre parmi bann Israélite, parski Jéhovah ti promette pou beni zot. Mais selman, bann Israélite ti pou gagne sa benediction-la a condition ki zot ti obeir la Loi, enn kitsoz ki zot pa ti reussi faire.

Mais sa pa ti vedir ki bann ki ti ena tigit lor plan materiel necessairement pa ti ena faveur Bondié, ni ki bann ki ti ena beaucoup, automatiquement ti pé beni par Bondié. Beaucoup parmi bann fidele serviteur Bondié ti pauvre lor plan materiel. Prophete Amos ti enn simple eleveur mouton ek ena enn saison dan l’année kot li ti faire enn lot travail. (Amos 1:1; 7:14) Dan lepok prophete Éliya, kan Israël ti passe par enn famine, Éliya ti bizin depann lor l’hospitalité enn veuve ki ti pauvre. Sa veuve-la ti ena enn tigit la farine ek enn tigit de l’huile. Pendant sa famine-la, par enn mirak so la farine ek so de l’huile pa ti diminué mem si li ti pé servi sa. Ni Éliya ni sa veuve-la ti vinn riche; Jéhovah ti donne zot zis seki zot ti bizin pou vive.—1 Rois 17:8-16.

Enn dimoune kapav passe par bann situation ki li pa pé attann ek ki faire li vinn pauvre enn sel coute. Accident ek maladie kapav empeche enn dimoune travail pendant enn moment ou-soit pou touletan. La mort kapav laisse derriere li bann orphelin ek bann veuve. Mem si enn dimoune pé passe dan bann situation difficile coumsa, sa pa vedir ki li pena faveur Bondié. Seki la Bible dire lor Naomi ek Ruth bien encourageant parski li montré nou couma Jéhovah prend soin bann pauvre avek amour. Mem si Naomi ek Ruth ti trouve zot dan enn grand misere kan zot mari ti’nn mort, Jéhovah ti beni zot ek ti prend disposition pou ki zot gagne seki zot bizin lor plan materiel.—Ruth 1:1-6; 2:2-12; 4:13-17.

Li clair ki la misere li pa enn preuve ki enn dimoune pena faveur Bondié. Bann ki fidele envers Jéhovah kapav ena confiance dan sa bann parole le roi David-la: “Mo ti enn jeune homme, mo finn mem vinn vié, ek pourtant mo pa finn trouve enn dimoune juste ki’nn abandonné net, ni so descendance ki pé rod di-pain.”—Psaume 37:25.

[Zimage lor page 8]

Mem si Naomi ek Ruth ti bien pauvre, Bondié ti beni zot ek ti prend zot soin avek amour