Eski Bondié promette pou donne ou la richesse?

‘Bondié envie ki ou vinn riche—ena beaucoup l’auto, ek enn business ki faire ou gagne beaucoup kass. Zis faire Li confiance, ouvert ou porte-monnaie, ek donne Li tou seki ou kapav.’

DAPRÉ enn journal ki imprimé Brésil, certain groupe religieux dan Brésil ti faire publicité lor message ki ena au commencement sa lartik-la. Beaucoup dimoune inn croire sa message-la. Guetté ki commentaire journal Time ti ecrire concernant enn sondage ki ti faire avek bann dimoune dan l’Amérique ki dire zot chretien: “Pa moins ki 61% bann dimoune ki zot ti pose question ti croire ki Bondié envie ki bann dimoune vinn riche, ek 31% . . . ti daccord ki si ou donne Bondié ou l’argent, Bondié pou beni ou avek plus l’argent.”

Bann croyance coumsa, pé augmenté bien vite surtout dan bann pays l’Amérique latine, couma Brésil. Ek dan sa bann pays-la, beaucoup dimoune al dan bann l’eglise ki promette ki Bondié beni bann dimoune avek l’argent ek di-bien materiel. Mais eski Bondié vrai-mem promette la richesse bann ki servi Li? Eski tou bann serviteur Bondié dan le passé ti bann dimoune riche?

Li vrai ki dan bann l’Écriture hébraïques, souvent nou trouvé ki bann dimoune ki Bondié ti beni, zot ti prosperé lor plan materiel. Par exemple, en Deutéronome 8:18, nou lire: “To bizin rappel Jéhovah to Bondié, parski c’est Li ki donne toi la force pou to gagne la richesse.” Sa ti donne nation Israël l’assurance ki si zot ti obeir Jéhovah, Li ti pou faire zot vinn enn nation ki ti pou prosperé.

Ki nou kapav dire concernant bann serviteur Bondié individuellement? Fidele serviteur Job ti enn zom extra riche, ek apré ki Satan ti faire li vinn pauvre, Jéhovah ti redonne Job “deux fois plus” di-bien ki li ti ena avant. (Job 1:3; 42:10) Abraham aussi ti riche. Genèse 13:2 dire ki li ti “bien riche; li ti ena beaucoup troupeau, ek l’argent ek l’or.” Kan quatre le roi ensam ki ti sorti dan region l’est avek zot l’armée, ti prend Lot, neveu Abraham ek ti faire li zot prisonnier, Abraham “ti rassemblé so bann zom ki ti bien entrainé, trois cent dix huit esclave ki’nn né dan so lakaz.” (Genèse 14:14) Avek 318 “zom ki ti bien entrainé” ek ki ti kapav servi bann zarme, la famille Abraham ti bizin assez grand. Si Abraham finn kapav donne enn grand famille coumsa tou seki zot bizin pou vive, sa montré ki li ti enn zom bien riche ki ti ena beaucoup zanimo.

Oui, beaucoup fidele serviteur Bondié dan le passé—parmi ti ena Abraham, Isaac, Jacob, David, ek Salomon—ti riche. Mais, eski sa vedir ki Bondié pou faire tou bann ki servi Li vinn riche? Mais dan enn lot coté, eski sa vedir ki si enn dimoune li pauvre li pena faveur Bondié? Prochain lartik pou koz lor sa bann question-la.