Jésus—Ki bann dimoune dire lor li
“Pena okenn doute ki Jésus de Nazareth . . . pli grand personnage ki finn existé dan l’Histoire.”—H. G. Wells, historien anglais.
“Parmi tou bann grand personnage ki finn existé dan l’Histoire, Christ . . . li enn kikenn exceptionnel.”—Philip Schaff, enn expert suisse dan theologie ek l’histoire.
KISANNLA nou kapav considere couma plus grand personnage ki finn existé? Couma nou kapav mesure grandeur enn dimoune? Par seki li realisé lor plan militaire? Par so la force physik? Par seki li realisé lor plan intellectuel? Ou-soit nou pou mesure grandeur enn kikenn par l’effet ki so bann parole ek so bann action ena lor bann dimoune ek aussi par l’exemple ki li-mem li donné pou zot?
Noté ki kitsoz bann historien, bann scientifik, bann specialiste, bann ecrivain, bann chef politik ek bann lezot dimoune—ki finn vive dan le passé ek asterla—inn dire lor sa dimoune ki’nn sorti Nazareth-la, Jésus Christ:
“Mais pou bizin rod bann raisonnement bien bete pou nié ki c’est Jésus de Nazareth ki finn ena pli grand l’influence lor bann dimoune pendant sa deux mille l’année ki finn passé-la ek mem dan tou l’histoire bann dimoune.”—Reynolds Price, ecrivain américain ek specialiste dan la Bible.
“Enn dimoune innocent ki finn offert li-mem couma enn sacrifice pou bien-etre lezot dimoune, mem pou so bann l’ennemi ek li’nn vinn enn ranson pou le monde entier. Sa ti enn action parfait.”—Mohandas K. Gandhi, chef politik ek chef religieux indien.
“Kan mo ti zenfant, mo ti gagne l’enseignement ki ti sorti dan la Bible ek aussi dan Talmud. Mem si mo enn Juif, mo attiré par personnalité exceptionnel ki Jésus ena.”—Albert Einstein, scientifik allemand.
“Pou moi, Jésus Christ, li-mem personnage plus extraordinaire ki finn existé dan tou l’Histoire, n’importe ki lepok, tant couma Garson Bondié ek couma Fils de l’homme. Contrairement ar bann lezot dimoune ki finn existé ou-soit ki encore la, tou seki Jésus inn dire ek seki li finn faire encore utile pou nou zordi.”—Sholem Asch, ecrivain polonais, cité dan Christian Herald; zot ki’nn mette en italik.
“Pendant trente-cinq an, mo pa ti croire dan nanyin. Mais sa faire cinq an depuis ki mo finn regagne la foi; mo’nn croire ki vrai-mem Jésus existé. Mo finn croire dan l’enseignement Jésus Christ ek desuite mo la vie inn konn enn changement.”—Comte Léon Tolstoï, romancier ek philosophe russe.
“Personne dan l’histoire pa finn ena enn aussi grand l’influence ki la vie [Jésus] lor bann dimoune ek l’influence ki li ena pé contigne augmenté.”—Kenneth Scott Latourette, auteur ek historien américain.
“Eski nou pou demann nou-mem si recit la vie Jésus li vrai? Mo camarade, pa coumsa ki invente zistoire. Ek personne pa douté ki seki bann dimoune inn raconté lor Socrate vrai alors ki ena plus preuve pou seki finn raconté lor Jésus ki pou seki finn raconté lor Socrate.”—Jean-Jacques Rousseau, philosophe français.
Li clair ki si nou bizin prend enn kikenn pou modele, c’est Jésus ki nou pou choisir. Paul, enn dimoune ki ti ena enn grand l’instruction, ki ti vive dan premier siecle ek aussi enn disciple ki Jésus ti choisir pou al preche ar bann nation, encourage nou pou “fixé nou lizié” lor Jésus. (Hébreux 12:2; Actes 9:3) Ki Jésus kapav aprann nou lor fason ki nou bizin vive? Couma nou kapav tire profit ar so la vie?