Enn journée porte ouverte avek enn but

“KI ZOT faire ladan?” Beaucoup dimoune ki passe devant grand batiment pou bann Témoins de Jéhovah ki trouve dan la ville Mogale (Krugersdorp), pré kot Johannesburg, en Afrique du Sud, pose-zot sa question-la. Alors bann Témoins ti decide pou organise enn journée porte ouverte le 12 ek 13 octobre 2007 dan batiment la filiale. Ti ena deux raison kifer ti faire sa journée porte ouverte-la—pou arrete bann fausse rumeur ek pou montré tou bann dimoune seki la filiale pé faire pou soutenir travail ki Jésus inn donne l’ordre pou faire.—Matthieu 28:19, 20.

Bann ki servi dan bureau la filiale ti mette bann grand panneau dan l’entrée pou accueil bann dimoune, ek zot ti partage bann invitation special ar bann voisin. Ti aussi invite bann fournisseur ek zot bann famille. Ki resultat zot inn gagné? Plus ki 500 visiteur ki pa bann Témoins ti visite bann batiment.

Enn kitsoz ki finn bien attire bann dimoune c’est rotative MAN Roland Lithoman, enn machine ki imprime ziska 90,000 magazine dan enn heure-temps. Bann visiteur ti aussi impressionné avek service expedition kot chaque jour emballe ek expedié plus ki 14 tonne magazine, ek aussi ar place kot relié bann livre. Bann Témoins dan different departement ti prepare bann presentation attirant, ek parmi ti ena enn ki ti faire enn resumé lor imprimerie, ki ti commencé a partir Gutenberg ziska offset ki servi zordi. Enn lot presentation ti mette l’accent lor maniere ki la filiale prend soin l’environnement. Par exemple, ena enn l’appareil special ki elimine bann gaz toxik ek bann l’odeur ki sorti dan sechoir bann l’imprimerie ek ena bann filtre ki ramasse la poussiere papier, ek apré detruire zot.

Enn la gazette local ti ecrire enn lartik ki dire ki sa 700 volontaire ki reste lor sa proprieté-la “zot bann ministre ki Bondié inn choisir ek ki’nn voué zot la vie ar Jéhovah.” Li ti aussi faire commentaire lor “niveau propté ki bien haute ek lor fason ki tou kitsoz marche a ler” dan l’imprimerie. Enn missié ki ti opposé ar bann Témoins de Jéhovah ti parmi bann visiteur sa jour-la. Apré sa li ti ecrire enn lettre ki dire: “Felicitation. Pa souvent enn dimoune kapav trouve bann kitsoz ki pé faire avek enn niveau bien haute coumsa.”

Beaucoup visiteur ti exprime zot l’appreciation pou bann facilité ek zot ti etonné pou trouvé ki la filiale ena bann brochure dan 151 langue ek bann publication imprimé pou 18 pays dan sud ek centre l’Afrique. Bann filiale Témoins de Jéhovah dan le monde entier toulé-jour ouvert pendant bann l’heure travail pou bann visite. Kifer ou pa prend contact avek la filiale ki trouve pré kot ou pou konn l’heure kan ou kapav rann zot enn visite?

[Zimage lor page 10]

Filiale l’Afrique du Sud ki trouve dan la ville Mogale

[Zimage lor page 10]

Rotative MAN Roland Lithoman

[Zimage lor page 10]

Kot relié bann livre

[Zimage lor page 10]

Service expedition

[Zimage lor page 11]

Bann groupe visiteur pé arrive la filiale

[Zimage lor page 11]

Invitation