Bann dimoune pé rod reponse

“Kan nou’nn koné ‘couma’ nou pou gagne nou la-vie, kan nou’nn reussi gagne tou bann kitsoz luxe ki avant nou ti pé zis revé, couma par exemple climatiseur, l’appareil la musik ki donne pli bon son, . . . lerla nou reste pou demann-nou ‘kifer’ nou lor la terre. Kifer dan la vie, nou bizin lutté couma bann fou? Ki serti?”—David G. Myers, professeur psychologie, dan Hope College, Holland, Michigan (États-Unis)

COUMA ou pou reponn sa bann question-la? Certain kapav demann-zot si li vaut la peine mem prend le temps pou rod bann reponse. Mais si ou essaye vive sans pose-ou sa bann question-la, c’est coumadir ou pé essaye marché avek bann ti roche dan ou soulier—ou pou kapav contigne avancé, mais ou la-route pa pou agreable.

Si ou finn deja demann-ou si ena plus ki sa dan la vie, ou pa tousel. World Values Survey, li enn parmi bann pli grand l’enquete ki’nn faire pou koné ki kitsoz ki ena plus valeur pou bann dimoune. Dapré sa sondage-la, dan beaucoup pays pli allé pli beaucoup dimoune pose-zot bann question lor “sens ek but la vie.”

Si ou envie gagne vrai la-paix dan ou, ou bizin trouve bann reponse pou sa trois question important-la.

Kot-sa nou sorti?

Ki but la vie?

Ki l’avenir reservé?

Kot-sa ou kapav trouve bann reponse sur pou sa bann question important-la? Dan bann prochain page nou pa pou base-nou lor bann supposition ni lor bann philosophie, mais nou pou donne bann reponse ki sorti dan Parole Bondié, la Bible. Nou invite ou pou ouvert ou prop la-Bible ek pou guetté pou ou-mem ki li dire.