“A cause enn ti-garson neuf an”

CHAQUE fois ki bann Témoins de Jéhovah ti vinn devant so la-porte, Wiesława ki reste dan sud Pologne, ti toujours remercié zot, mais li ti refuse pou ecoute zot. Enn jour, Samuel ki ti ena neuf an ti vinn preché kot li ensam avek so mama. Sa fois-la Wiesława ti decide pou ecouté ek li ti accepté enn magazine ki koz lor enn paradi lor la terre.

Mémorial la mort Jésus Christ ti pé kosté; alors Samuel inn envie invite Wiesława pou sa l’occasion special-la. Ensam avek so mama, li’nn al revisite Wiesława, ek li’nn amenn enn l’invitation pou li. Kan Wiesława inn trouvé couma sa ti garson-la ti bien habillé, li’nn demann zot pou attann enn ti moment ek li’nn al endan pou habille-li enn tipé pli bien. Kan li’nn retourné, li’nn ecoute Samuel, li’nn accepté so l’invitation, ek li’nn demandé: “Eski mo bizin vinn tousel, ou-soit mo kapav vinn avek mo missié?” Apré li’nn dire: “Mem si mo missié pa vini, moi mo pou vini. Mo pou faire sa pou toi, Samuel.” Ek li’nn garde so parole, seki ti faire Samuel bien plaisir.

Pendant discours Mémorial, Samuel ti assize kot Wiesława ek ti montré li bann verset lor ki ti pé kozé. Sa ti impressionne Wiesława. Li ti bien content Mémorial ek li ti apprecié ki ti servi bann mot simple pou explik bann pensée bien profond. Li ti aussi touché par fason ki la congregation ti accueillir li, ek par zot bonté. Depuis sa, Wiesława inn contigne montré plus l’interet pou bann kitsoz spirituel ek li’nn commence assisté reunion regulierement. Dernierement li ti dire: “Mo honté ki mo pa finn ecoute zot avant kan zot ti vinn devant mo la-porte. Mo bizin reconette ki mo finn ecoute zot message zis a cause enn ti-garson neuf an, a cause Samuel.”

En Pologne ena beaucoup lezot Témoins de Jéhovah, pareil couma Samuel, ki loué Bondié kan zot koz lor Li ek kan zot ena enn bon conduite. Si ou enn jeune, ou aussi ou kapav aide bann dimoune sincere pou interessé avek bann kitsoz spirituel.