Agé, abandonné, ek maltraité

ALORS ki li ti pé faire so la-tournée a-soir, enn gardien ti gagne choc kan li’nn trouve enn kitsoz terrible. Là, zis en dehors enn flat kot bann dimoune riche resté, li ti decouvert deux cadavre—enn couple agé ki ti’nn saute par la fenetre zot appartement ki ti lor huitieme l’etage. Deja suicide-la-mem ti enn choc, mais raison suicide-la ti encore pli choquant. Lor enn note ki ti ena dan poche missié-la, ti ecrire: “Nou pé suicide-nou parski nou garson ek nou belle-fille trop mauvais, ek zot trop maltraite nou.”

Pa toulé-jour ki nou tann enn cas kot ena bann detail coumsa, mais malheureusement sa problem-la li courant. Oui, preské partout dan le monde bann dimoune agé gagne maltraité. Guette sa bann cas-la:

• Enn l’etude ki’nn faire dan Canada montré ki 4 pourcent bann dimoune agé inn gagne maltraité ou-soit exploité—en general par enn membre zot famille. Mais, beaucoup dimoune agé trop honté ou-soit zot trop peur pou raconte misere ki zot passé. Bann expert dire ki en realité ena preské 10 pourcent bann dimoune agé ki dan sa situation-la.

• Magazine India Today dire: “En Inde kot bann lien familial parette bien fort, la nation pé affaibli zordi parski ena enn augmentation dan quantité dimoune agé ki zot zenfant refuse pou occupé.”

• The National Center on Elder Abuse dire ki dapré bann pli bon estimation ki zot ena, “entre 1 ek 2 million Américain ki ena 65 an ou-soit plus, inn blessé, exploité, ou-soit inn gagne maltraité dan lezot fason par enn kikenn lor ki zot ti depann pou occupe zot ou-soit pou protege zot.” Enn adjoint procureur dan San Diego, Californie dire ki mauvais traitement ki bann dimoune agé gagné, li “enn parmi bann problem pli grave ki la police bizin faire face zordi.” Li aussi dire: “Mo trouve sa problem-la pé vinn encore pli grave dan bann prochain l’année”

• En Nouvelle Zélande, dan Canterbury, pli allé bann habitant tracassé parski bann dimoune agé pé vinn victime zot prop famille—surtout si bann membre zot famille drogué, alkolik, ou-soit joué pou l’argent. Dan Canterbury, bann cas dimoune agé ki gagne maltraité inn augmenté; sa inn sorti 65 en 2002 pou arrive 107 en 2003. Directeur enn agence ki’nn etabli pou evité ki bann dimoune agé gagne maltraité, dire ki sa chiffre-la li nanyin ditou comparé ar sa quantité dimoune agé ki vrai-mem pé gagne maltraité.

• The Japan Times dire: “Federation japonais bann avocat ti recommandé ki “bann dimoune agé ki bann victime mauvais traitement bizin gagne plus l’attention ki bann zenfant ki victime l’agression sexuel ou-soit lezot forme violence.” Kifer? Journal Times ajouté ki c’est parski “li prend plus lé-temps pou decouvert kan bann dimoune agé pé gagne maltraité ki kan bann zenfant ou-soit bann conjoint pé gagne maltraité. Sa c’est parski bann dimoune agé senti-zot responsable a cause zot victime zot prop zenfant, ek a cause gouvernement ek bann l’autorité dan zot l’endroit pa finn reussi ziska l’heure trouve enn fason efficace pou traite sa problem-la.”

Sa dé-trois l’exemple lor seki pé arrivé inpé partout dan le monde faire nou pose nou sa bann question-la: Kifer pa prend compte bann dimoune agé ek kifer maltraite zot? Eski ena kit l’espoir ki sa situation-la pou amelioré? Ki reconfort ena pou bann dimoune agé?