Bann dimoune pé rod ressenti la paix dan zot

ALBERT ti ena enn la-vie mariage heureux, ek deux joli zenfant. Mais, li ti ena l’impression ki enn kitsoz ti manké dan so la-vie. Pendant ki li ti pé faire bann grand demarche pou reussi trouve enn travail, li ti commence faire politik ek li ti vinn enn socialiste. Li ti mem vinn enn membre actif dan branche local parti communiste.

Mais, li pa ti tardé pou perdi tou bann l’espoir ki li ti mette dan parti communiste. Alors li finn abandonne politik pou devoué tou so la-vie pou so famille. Faire bonheur so famille, ti vinn so l’objectif principal. Malgré sa, li ti toujours ena sentiment ki enn kitsoz ti manké dan so la-vie.

Zistoire Albert, li pa enn zistoire exceptionnel. Bann million dimoune inn essaye tou qualité l’idée, philosophie, ek religion, pou zot trouve enn but dan la vie. Dan bann l’année 60, en Amérique ek en Europe, mouvement hippie ti enn revolte kont bann moral traditionnel ek bann valeur social. Bann jeune, surtout, ti rod bonheur ek signification la vie a travers bann la-drogue ki affecté l’esprit, ek bann philosophie bann gourou ek lezot chef spirituel. Mais mouvement hippie pa finn reussi amenn vrai bonheur. Plutot, li finn faire bann jeune vinn bann drogué, ek li finn faire zot amenn enn la-vie immoral, seki finn faire le monde tombe pli vite dan confusion moral.

Pendant bann siecle, beaucoup dimoune finn rod bonheur a travers la richesse, pouvoir, ek bel l’instruction. Mais en realité sa bann kitsoz-la pa amenn vrai bonheur. Jésus ti dire: “Mem si enn dimoune li dan l’abondance, so la-vie pa depann lor bann kitsoz ki li ena.” (Luc 12:15) Plutot, kan bann dimoune galope a tou prix derriere richesse, en general sa rann zot malheureux. La Bible dire: “Bann ki bien decidé pou vinn riche, tombe dan tentation, dan enn piege ek dan beaucoup desir ki pena sens, ki faire di-tort, ek ki plonge bann dimoune dan destruction ek dan la ruine. Parski l’amour pou l’argent li enn racine toute sorte qualité mauvais kitsoz, ek parski zot finn galope derriere sa l’amour-la, certain finn . . . faire zot-mem beaucoup di-tort.”—1 Timothée 6:9, 10.

Alors, couma nou kapav arrivé ressenti la paix dan nou ek ena enn but dan la vie? Eski nou bizin faire tou qualité l’experience dan la vie pou essaye trouve enn kitsoz ki nou pa mem sur nou pou arrivé trouvé? Heureusement, non. Couma nou pou trouvé dan prochain lartik, pou nou trouve la solution, nou bizin satisfaire enn besoin ki bien important, enn besoin ki concerne zis bann dimoune.

[Zimage, page 3]

Eski galope derriere la richesse, pouvoir, ou-soit bel l’instruction pou aide ou ressenti la paix dan ou?