Bann la-Guerre en Parole—Kifer Zot Blessant?

“Bann la-guerre ek bann la-lutte ki ena parmi zot, kot-sa zot sorti?”—JACQUES 4:1.

JACQUES ki ti enn parmi bann ecrivain la-Bible, pa ti pose sa question-la avek bann soldat dan l’armée Romain, ki ti pé laguerre dan sa lepok-la pou grandi zot territoire. Li pa ti pé envie koné kifer bann Sicaire Juif [En Grec: sikarioi “bann zom armé avek poignard”] ti pé laguerre kont bann Romain. Jacques ti pé pense bann discussion ki ti implik kitfois zis deux dimoune. Kifer? Parski pareil couma bann la-guerre entre nation, bann la-guerre entre dimoune kapav faire beaucoup di-tort. Anou guette dé-trois zistoire ki la Bible raconté lor la.

Bann garson Jacob ti tellement ena la haine pou zot frere, Joseph, ki zot ti vann li couma enn esclave. (Genèse 37:4-28) Plitar, Saül ki ti le roi en Israël ti rod touye David. Kifer? Parski li ti jaloux David. (1 Samuel 18:7-11; 23:14, 15) Dan premier siecle, deux soeur Chrétien, Évodie ek Syntyche, ti troublé la paix toute enn congregation avek zot bann discussion.—Philippiens 4:2.

Pli pré avek nou lepok, bann zom ti reglé bann problem entre zot par combat a deux, kot zot ti servi l’epée ou-soit pistolet. Souvent enn parmi sa deux dimoune-la ti mort ou-soit ti handicapé pou la vie. Zordi, en general, bann ki laguerre entre zot servi bann parole dur, ki blessé couma zarme. Mem si di-sang pa coulé, sa bann attak ar parole-la blesse bann sentiment ek reputation bann dimoune. Bann ki innocent souvent souffert dan sa bann “la-guerre”-la.

Guette seki ti arrivé ena dé-trois l’année kan enn pretre Anglican ti accuse enn lot pretre pou mal servi l’argent l’eglise. Zot bagarre ti vinn publik, ek congregation ti divisé en plusieurs group. Certain ti refuse vinn l’eglise si sa pretre avek ki zot pa ti d’accord-la, ti pé faire la messe. Chaque group ti tellement meprise lot-la ki zot refuse koz ar zot camarade kan zot ti dan l’eglise. Kan ti mette enn charge mauvais conduite sexuel lor sa pretre ki ti’nn accuse lot-la, situation ti vinn pli pire.

L’archeveque Cantorbéry ti supplié sa deux pretre-la pou arreté ek li ti dire ki zot la-guerre ti “enn cancer” ek “enn scandale ki deshonore nom Nou Seigneur.” En 1997, enn parmi sa pretre-la ti accepté pou prend so retraite. Lot-la ti reste dan so poste ziska ki li ti bizin allé parski li ti’nn arrive l’age obligatoire pou prend retraite. Seulement, li’nn resté ziska pli dernier l’heure possible, ek li’nn prend so retraite le 7 Août 2001, jour li gagne 70 an. The Church of England Newspaper (enn journal l’Eglise Anglican) ti dire ki jour ki li ti prend so retraite-la ti tombe jour fete “Saint” Victrice. Kisannla “Saint” Victrice? Li ti enn l’eveque ki ti vive dan bann l’année 300 ek ki apparemment ti gagne batté ar fouet parski li ti refuse laguerre dan enn l’armée. Pou bien montré difference entre l’attitude sa pretre-la ek l’attitude “Saint” Victrice, sa journal-la ti dire: “Sa pretre ki, a la fin ti pé prend so retraite-la, pa ti paré pou refuse laguerre pareil couma “Saint” Victrice.”

Sa bann pretre-la ti’nn kapav evite blesse zot camarade ek aussi lezot, si zot ti’nn applik conseil ki donné dan Romains 12:17, 18: “Pa rann personne le mal pou le mal. Faire seki bien devant lizié tou dimoune. Si possible, autant ki sa depann lor zot, vive en paix avek tou dimoune.”

Ou, couma ou reagir? Si enn dimoune offense ou, eski ou tellement en colere ar li ki ou pou laguerre kozé avek li? Ou-soit eski ou evite bann parole dur ek ou toujours paré pou faire la paix? Si ou offense enn dimoune, eski ou evite li ek esperé ki avek le temps li pou blié sa problem-la? Ou-soit eski ou demande excuse sans tardé? Ki ou demande pardon ou-soit ki ou pardonné ou-mem, si ou essaye faire la paix, sa pou aide-ou pou ou senti-ou pli bien. Bann conseil ki la Bible donné kapav aide nou pou resoudre mem bann desaccord ki’nn duré pendant bien longtemps. Nou pou trouve sa dan prochain l’article.