Enn Lettre Adressé ar Noé
“CHER Noé, plizir fois dans la Bible mo’nn lire lor toi, couma to’nn arrange l’arche ek to’nn réussi sauve toi ek to famille dans Déluge.”
C’est coumsa ki Minnamaria, enn tifi 15 ans finn commence so lettre. En fait li ti pé participe dans enn concours pou bann zélèves entre 14 à 21 ans. Sa concours-la ti organisé par bann services de postes en Finlande, ek Fédération bann professeurs pou la langue maternel sa pays-la, ek Société Littéraire de Finlande. Bann participants ti supposé écrire enn lettre basé lor enn livre. Sa lettre-la ti kapav adressé ar l’auteur sa livre-la ou-soit n’importe ki caractère ki faire parti ladan. Bann professeurs ti choisir plis ki 1,400 lettres parmi bann compositions ki zot zélèves ti écrire, ek zot ti envoye sa ar panel ki ti responsable sa compétition-la. Enn lettre finn gagne 1er prix, dix finn gagne 2ème prix ek dix encore finn gagne 3ème prix. Minnamaria ti bien content ki so lettre ti classé dans troisième groupe.
Kifer Minnamaria, enn jeune étudiant, finn écrire enn lettre adressé ar Noé, enn dimoune ki’nn vive apeupré 5,000 ans de çela? Li dire: “Premier kitsoz ki ti vinn dans mo l’esprit, c’est la Bible. Mo konn bien bann personnages ki décrire dans la Bible. Telman mo’nn lire lor zot ki zot parette coumadire zot encore existé devant moi. Mo ti choisir Noé parski so la-vie ti bien intéressant ek bien différan ar mo la-vie.”
Dans so conclusion Minnamaria dire Noé: “To encore enn l’exemple en séki concerne la foi ek l’obéissance. To la-vie encourage tou bann ki lire la Bible pou mette en pratique séki zot aprann.”
Sa lettre ki sa jeune tifi-la finn écrire montré clairement ki la Bible “vivant ek li éna pouvoir” lor bann dimoune, ki zot jeune ou-soit vieux.—Hébreux 4:12.