Eski Bondié Responsable Nou Bann Problèmes?

KAN so tifi ki ti enn adulte, ti pé souffert parski so cerveau ti gravement blessé, Mariona ti faire séki nou tou nou ti pou faire dans sa cas-la. Li ti prié Bondié pou gagne so l’aide. Marion dire: “Jamais mo pa’nn senti moi aussi perdu ek tousel dans mo la-vie.” Plitar, kan l’état so tifi finn agravé, Marion finn commence doute Bondié. Li finn demann limem: “Mais, kifer eski sa pé arrivé?” Li pa ti kapav comprend couma enn Bondié ki bon ek ki éna l’amour, kapav abandonne li.

Pareil couma Marion, beaucoup dimoune finn faire sa mem l’experience-la. Beaucoup dimoune partout dans le monde finn éna sentiment ki Bondié inn abandone zot dans bann moments kot zot ti bien bizin so l’aide. Après ki so ti zenfant ti mort assassiné, Lisa dire: “Mo encore casse mo la tête avec bann questions couma: kifer Bondié permette bann mauvais kitsoz. Mem si mo pa’nn perdi complètement la foi en Bondié, mais mo la foi népli pareil couma avant.” Pareillement, après ki li’nn perdi so garçon ki ti encore enn ti baba, enn madame dire: “Bondié pa finn donne moi okenn réconfort. Li pa’nn éna okenn pitié pou moi.” Li ajouté: “Jamais mo pou pardonne Bondié.”

Éna lézot ki en colère avec Bondié, sirtou kan zot guette seki pé passé dans le monde autour zot. Zot trouve bann pays ki rempli avec la misère ek la famine; bann réfugiés de guerre ki péna okenn l’espoir; enn quantité zenfants ki’nn vinn orphelins à cause SIDA, ek par millions dimoune ki affecté par bann lézot maladies. Devant tou sa bann malheurs-la, ek lézot encore, beaucoup dimoune blame Bondié parski zot pensé ki Li pa pé faire nanyien.

Mais, la vérité, c’est ki Bondié pa responsable pou tou bann problèmes ki affecté l’humanité. D’ailleurs, éna enn quantité raison bien solid pou croire ki bientôt Bondié pou répare tou malheur ki l’humanité finn koné. Nou invite ou pou examine prochain l’article ek ou pou trouvé ki Bondié vrémem intéresse Li avec nou.

[Note]