Kan Tu Bann Promes Pu enn Garanti

LISTWAR ranpli avek bann promes ki pa finn realize. Bann nasyon suvan pa’nn reysi respekte bann lakor ofisyel ki zot finn siyne pu pa atak bann lezot nasyon. Rezilta: Sa bann nasyon-la finn fer bann lager terib. Enn fwa Napoleon ti fer sa remark-la: “Bann guvernman gard zot promes zis kan zot oblize fer sa, uswa kan li dan zot lavantaz.”

Me ki nu kapav dir konsernan promes ki sak dimunn fer? Kan enn kikenn pa gard so parol, sa byin desevwar nu. Sirtu si se enn kikenn ki u kone ek ki u fer konfyans. Byinsir, defwa bann dimunn-la swa zot pa kapav uswa zot pa anvi gard zot promes.

Me ena enn gran diferans ant promes bann dimunn ek promes Bondye! Nu kapav kont antyerman lor bann promes Bondye. Ninport ki promes ki Bondye Zeova fer, li enn garanti. Izai 55:11 fer referans ar parol Bondye ki sir, kan li dir: “Li parey pu parol ki sorti dan mo labus. Li pa pu return ar mwa san rezilta, me li pu vremem realiz sa kitsoz ki mo finn kontan-la, ek vremem li pu reysi dan sa kitsoz ki mo finn avoy li-la.”

Donk, kuma eski nu bizin konsider bann promes Bondye ki truv dan Labib? Pena dut ki nu kapav kont lor zot. Par egzanp, lapot Pol ti ekrir: “Gete! Latant Bondye avek bann imin, ek Li pu res avek zot, ek bannla pu vinn so bann lepep. Ek Bondye Limem pu avek zot. Ek Li pu suy tu larm dan zot lizye, lamor pu nepli egziste. Personn pu nepli an dey, ek personn pa pu kriye akoz problem, ek pu nepli ena duler. Bann kitsoz avan finn disparet.” (Revelasyon 21:3, 4) U kapav profit sa bann benediksyon-la si u azir an armoni avek bann parol Zezi: “Ala seki vedir lavi pu tuletan: Se aprann konn twa, sel vre Bondye ek Zezi Kris, sa kikenn ki to finn avoye-la.”—Zan 17:3.