Labib Kapav Ed U dan U Maryaz

MARYAZ—pu sertin, sa mo-la fer zot pans bann kitsoz agreab. Pu lezot, sa fer zot leker fermal. Enn madam dir: “Mo santi kumadir mo’nn fini divorse lor plan afektif. Tuletan mo santi mwa abandone ek tusel.”

Me ki kitsoz ki amenn de dimunn, ki enn lepok ti promet pu kontan zot kamarad, pu elwayne kumsa? Enn kitsoz ki fer sa, seki sa de dimunn-la pa kone ki maryaz vedir vremem. Enn zurnalis dan domenn medikal fer sa komanter-la: “Nu kumans lavi maryaz san okenn formasyon.”

Dapre enn letid ki enn lekip Rutgers University dan New Jersey, U.S.A. (The National Marriage Project) finn fer, zot dir ki byin tigit dimunn zordi kone ki ete maryaz. Bann direkter sa proze-la ekrir: “Buku dimunn ki ti partisip dan sa letid-la finn grandi avek bann paran ki pa ti ere dan zot maryaz uswa avek bann paran ki’nn divorse. Zot kone egzakteman ki ete enn move maryaz, me zot pa tro kone kuma enn bon maryaz sipoze ete. Sertin dir ki enn bon maryaz se ‘lekontrer ar mo bann paran.’ ”

Eski bann Kretyin afekte par sa bann problem-la? Wi, zot afekte. Dayer, sertin Kretyin dan premye syek ti bizin bann konsey direk pu zot “aret sey detas zot” ar zot konzwin. (1 Korintyin 7:27) Wi, dan ninport ki maryaz ant de dimunn inparfe, pu ena bann problem. Me nu ena led. Bann mari ek bann fam kapav amelyor zot relasyon kan zot aplik bann prinsip Labib.

Se vre ki Labib li pa enn liv ki koz zis lor maryaz. Me, pwiski li inspire par sa Kikenn ki finn etabli maryaz-la, nu kapav atann ki bann prinsip ki ena ladan kapav ed nu. Atraver profet Izai, Bondye Zeova ti dir: “Mwa Zeova, mo to Bondye, sa Kikenn ki pe anseyn twa pu [to] tir profi-la, sa Kikenn ki pe fer twa mars lor semin kot to bizin marse. A si selman to ti pran kont mo bann komannman! Lerla to lape ti pu vinn parey kuma enn larivyer, ek to lazistis parey kuma bann vag lamer.”—Izai 48:17, 18.

Eski sa lamur ki ti ena okumansman ant u ek u konzwin-la finn kumans diminye? Eski u santi u anprizone dan enn maryaz kot pena lamur? Enn madam ki marye depi 26 an dir: “Pa kapav dekrir lapenn ki mo kone dan mo maryaz. Sa lapenn-la li la, li tuletan prezan.” Olye ki u bes lebra ek u aksepte enn maryaz ki pa satisfer u, kifer eski u pa fer kitsoz pu rezud sa problem-la? Prosin lartik pu montre bann mari ek bann fam kuma bann prinsip Labib kapav ed zot maryaz sirtu dan enn domenn partikilye, setadir zot langazman.