“Vinn Pros ar Bondye, ek Li Pu Vinn Pros ar Zot”

SANDRA, se enn madam ki res dan Mexique. Li ti dir ki li ti tuzur diferan avek lezot manb so fami ek zot pa ti dakor avek so manyer viv. Li ti santi li rezete ek li ti mank lafeksyon. Tusala, finn gat so ladolesans. Li dir: “Tutlong mo ladolesans, mo ti santi mwa mank kitsoz ek mo ti ena buku dut konsernan mo legzistans ek lor lavi an zeneral.”

Alor ki li ti pe al kolez, Sandra finn kumans bwar divin ki so papa ti ena lakaz. Avek letan, li finn kumans aste so bann prop butey lalkol ek li’nn vinn enn alkolik. Li rekonet: “Mo pa ti ena okenn rezon pu viv.” Li ti telman dezespere ki li finn kumans pran ladrog. Li dir: “Sel kitsoz ki ti ed mwa pu bliye mo bann problem se enn butey lalkol, detrwa konprime, uswa enn tigit ladrog ki ti dan mo sakamin.”

Apre ki Sandra finn fini so bann kur medsinn, li finn tom ankor plis dan lalkol. Li finn sey swisid li, me li finn res vivan.

Sandra ti rod led spirityel ek afektif dan plizir diferan relizyon. Parski li ti perdi lespwar ek li ti tom dan dezespwar li ti kontiyn kriy osekur ek demann Bondye: “Kot to ete? Kifer to pa ed mwa?” Ti ariv enn pwin kot li ti santi ki li nepli vo nanyin, ki li ti nepli ena okenn dinite. Se lerla ki enn madam Temwin Zeova finn koz avek li. Sandra finn kumans enn letid personel lor Labib. Li ti byin tuse kan li’nn aprann ki “Zeova pre ar bann dimunn ki ena enn gran sagrin dan zot leker.”—Psom 34:18.

Madam ki ti etidye Labib avek Sandra finn ed li pu konpran ki Zeova kone ki nu feb akoz pese ek linperfeksyon ki nu finn erite ar Adan. Sandra finn realize ki Bondye konpran ki nu pa kapav viv an akor avek so bann prinsip ki drwat dan enn fason parfe. (Psom 51:5; Romin 3:23; 5:12, 18) Li ti byin kontan kan li ti aprann ki Zeova pa port so latansyon zis lor nu bann febles, ek Li pa demann nu pu fer plis ki seki nu kapav. Enn ekrivin Psom ti demande: “Si to bizin pran kont nu bann fot, O Ya, O Zeova, kisannla ti pu kapav tini devan twa?”—Psom 130:3.

Enn lanseynman Labib byin inportan ki finn tus leker Sandra se sakrifis Zezi Kris. Grasa sa, avek buku mizerikord, Zeova konsider nu kuma bann bon dimunn malgre nu bann inperfeksyon. (1 Zan 2:2; 4:9, 10) Wi, nu kapav gayn “pardon pu nu bann fot.” Nu kapav gayn usi led ki nu bizin pu sirmont santiman ki nu pa vo nanyin.—Efezyin 1:7.

Sandra finn aprann bann kitsoz byin inportan grasa legzanp lapot Pol. Lapot Pol ti ena enn gran apresyasyon pu bonte Bondye. Kifer? Parski, avek konpasyon, Bondye ti pardonn bann fot ki li ti’nn fer ek Li ti ed li dan gran lalit ki li ti pe amene pu sirmont so bann febles ki pa ti ule kit li. (Romin 7:15-25; 1 Korintyin 15:9, 10) Pol ti sanz so lavi. Li ti ‘donn so lekor bann ku ek amenn li kuma enn esklav’ pu ki li kapav res lor semin ki Bondye apruve. (1 Korintyin 9:27) Li pa finn les so bann tandans pu fer pese amenn li kuma enn esklav.

Bann febles ki Sandra ti ena ti kontiyn fatig li, me li ti kontiyn lite kont zot. Avek sinserite li’nn priye pu gayn led Zeova pu sirmont sa bann febles la ek gayn so mizerikord. (Psom 55:22; Zak 4:8) Sandra finn kapav sanz so lavi parski li ti santi ki Bondye interes ar li personelman. Li dir: “Mo ena lazwa pu anseyn bann dimunn Labib, aplintan.” Sandra finn gayn privilez pu ed so gran ser ek ti ser pu aprann konn Zeova. Amezir li travay pu “fer dibyin,” li port li volonter pu donn bann swin medikal pandan bann lasanble bann Temwin Zeova.—Galat 6:10.

Eski Sandra ankor esklav lalkol, ladrog, ek sigaret? Avek konfyans, li dir: “Mo lespri kler. Mo nepli bwar, fime uswa pran ladrog. Mo pa bizin sa bann kitsoz la. Mo’nn truv seki mo ti pe rode.”

[Zimage page 9]

“Mo’nn truv seki mo ti pe rode”

[L’encadré page 9]

Bann Prinsip Labib an Aksyon

Ala detrwa prinsip Labib ki finn ed buku pu liber zot ar bann kitsoz ki sali zot lekor:

“Anu tir tu kitsoz ki sali nu lekor ek nu lespri ek anu vinn konpletman sin avek lakrint pu Bondye.” (2 Korintyin 7:1) Bondye beni bann ki finn tir tu kitsoz ki sali zot lekor, ek evit sa bann pratik ki sal la.

“Lakrint Zeova vedir degut seki move.” (Proverb 8:13) Lakrint pu Bondye ansam avek enn gran respe, ed enn dimunn pu liber li ar bann move labitid, parmi ena ladrog. Sa dimunn ki’nn sanze la li pa zis fer Zeova plezir, me li protez li kont bann maladi ki fer per.

“Zot bizin sumet ek obeir bann guvernman ek bann lotorite parski se bann dirizan.” (Tit 3:1) Dan buku landrwa, kan enn kikenn posed uswa servi sertin ladrog, li pe dezobeir enn lalwa. Bann vre Kretyin pa posed ni servi bann ladrog ilegal.