Enn Tan pu Revel Kitsoz Konfidansyel

Gard sertenn kitsoz konfidansyel kapav amenn swa lape swa dispit. Me eski ena enn letan pu revel enn kitsoz konfidansyel? Note ki profet Amos dir konsernan so Bondye: “Zeova pa pu fer nanyin san ki Li revel so bann serviter, bann profet, so kitsoz konfidansyel.” (Amos 3:7) Par sa bann parol la, nu kapav aprann kitsoz konsernan gard kitsoz konfidansyel. Zeova kapav gard sertenn kitsoz konfidansyel pu enn peryod letan ek revel sa bann kitsoz la ar sertin dimunn plitar, kan bizin. Kuma eski nu kapav imit Zeova dan sa domenn la?

Parfwa, bann berze etabli dan kongregasyon Kretyin truve ki li plis dan lavantaz kongregasyon pu pa revel enn sertenn kitsoz. (Akt 20:28) Par egzanp, pu pran kont lintere kongregasyon, zot kapav deside pu pa revel, pu enn sertenn letan, bann detay konsernan sertin dispozisyon uswa konsernan bann responsabilite dan kongregasyon.

Selman, dan sa ka la, li inportan fer bann ki konserne byin konpran si bizin revel sa kitsoz la, kan pu fer li ek ki manyer pu fer li. Pwiski zot kone kan enn zafer pu revele an piblik, sa pu ed zot pu gard sa kitsoz la konfidansyel.—Proverb 25:9.