Kestyon Bann Lekter

Eski li saz pu enn vre Kretyin asiste enn lanterman uswa enn maryaz dan enn legliz?

Kan nu pran par dan ninport ki form fos relizyon, sa pa fer plezir Zeova, donk nu bizin evit fer sa. (2 Korintyin 6:14-17; Revelasyon 18:4). Enn lanterman dan legliz, li enn seremoni relizye kot sirman ena enn sermon ki pu atir latansyon lor bann doktrinn ki pa baze lor Labib, kuma nam imortel ek ki tu bann bon dimunn pu gayn rekonpans pu al dan lesyel. Pandan sa seremoni la kapav usi ena bann pratik kuma siyn dekrwa uswa partisip dan enn lapriyer ki fer par enn pret uswa enn paster. Dan enn seremoni maryaz relizye ki fer dan legliz, kapav usi ena bann lapriyer ek bann lezot pratik relizye ki kont bann lanseynman Labib. Enn Kretyin kapav truv difisil pu reziste kont presyon pu partisip avek lezot dan enn servis fos relizyon kan li dan enn grup. Wi, li pa saz ki enn kikenn expoz li ar sa kalite presyon la!

Ki arive si enn Kretyin santi li oblize pu asiste enn lanterman uswa enn maryaz dan enn legliz? Enn mari inkrwayan, par egzanp, kapav insiste ki so madam Kretyin akonpayn li dan bann lokazyon kumsa. Eski madam la kapav akonpayn li zis kuma enn sinp obzervater? Par konsiderasyon pu so misye, madam la kapav deside pu akonpayn li si li determine pu pa partisip dan okenn seremoni relizye. Ubyin, li kapav deside pu pa ale parski li panse ki si li asiste sa seremoni la, lemosyon riske tro for, ek sa kapav amenn li fer konpromi avek bann prinsip Bondye. Se enn desizyon ki li, li bizin pran. Sirman, li pu anvi ena enn leker kler ek enn konsyans prop.—1 Timote 1:19.

Antuka, li pu dan so lavantaz ki li explik so misye ki li pa pu kapav, avek tu so konsyans, partisip dan okenn seremoni relizye uswa sant bann kantik ansam avek bann ki la, uswa bes so latet kan pe fer lapriyer. Apre sa konversasyon la, kitfwa misye la pu tir konklizyon ki prezans so madam kapav met li dan enn sityasyon anbarasan. Li kapav desid pu al tusel parski li kontan so madam, li respekte so bann krwayans, uswa parski li anvi evit enn sityasyon anbarasan. Me si li insiste pu ki so madam akonpayn li, madam la kapav ale zis kuma enn obzervater.

Fode pa bliye reaksyon ki nu bann frer ek ser kapav ena kan zot kone ki nu finn asiste enn servis relizye dan enn legliz. Eski sa kapav bles konsyans sertin? Eski sa kapav afebli zot determinasyon pu pa partisip dan lidolatri? Lapot Pol donn sa konsey la: “Verifye byin bann kitsoz ki pli inportan, kumsa zot kapav res san defo ek pa fer lezot tonbe ziska zur Kris.”—Filipyin 1:10.

Si sityasyon la konsern enn paran pros, lafami kapav fer plis presyon. Antuka, enn Kretyin bizin pran byin an konsiderasyon tu bann fakter ki inplike. Dan sertin ka, li kapav tir konklizyon ki li pa pu gayn okenn problem letan li asiste enn seremoni lanterman uswa maryaz dan legliz kuma enn obzervater. Selman, li kapav arive ki letan enn Kretyin asiste sa seremoni la, ditor ki sa kapav fer so prop konsyans uswa konsyans lezot buku plis ki bann lavantaz ki li’nn kapav gayne kan li’nn asiste sa seremoni la. Ninport ki so sityasyon, enn Kretyin bizin fer sir ki so desizyon pa pu anpes li gard enn bon konsyans devan Bondye ek devan bann dimunn.