Zame Tro Vye pu Aprann

KSENIYA ti ne an 1897. Li ti ena 3 tifi, enn garson, 15 ti zanfan, ek 25 aryer ti zanfan. Tutlong so lavi li’nn fer seki so bann paran ti anseyn li. Mem si li ti vinn Moscou kuma enn refizye ki sorti dan République d’Abkhazie, peyi desire par lager ki truv ant la mer Noire ek bann montayn Caucase, li ti ase satisfe ar so lavi, sirtu avek so relizyon ki li ti finn erite avek so bann anset.

An 1993, Meri, tifi Kseniya finn vinn enn Temwin Zeova. Meri finn kumans koz avek Kseniya lor Bondye Zeova ek Labib, me li pa ti anvi ekute. Kseniya ti kontiyn dir so tifi, “Mo tro vye pu mo al aprann enn kitsoz nuvo.”

Kan mem sa, so tifi Meri; Londa, fam so ti zanfan; so bann ti zanfan Nana ek Zaza, ki ti’nn vinn bann Temwin Zeova, finn kontiyn koz ar li lor Labib. Enn swar an 1999, zot finn lir enn pasaz Labib ar Kseniya ki finn tus so leker. Sa pasaz la ti bann dernye parol tusan ki Zezi ti dir so bann zapot fidel kan li ti etabli Repa Diswar Senyer. (Lik 22:19, 20) Alor ki Kseniya ki ti ena 102 an, sa swar la li’nn desid pu kumans etidye Labib.

Kseniya dir: “Apre ki mo’nn viv 102 an, mo finn finalman konpran sans lavi. Asterla mo realize ki pena nanyin pli bon ki servi Zeova, nu Bondye extraordiner ki ranpli ar lamur. Mo ankor fit ek an bonn sante. Mo kapav lir san linet ek mo tuletan ansam avek mo fami.”

Le 5 Novam, 2000, Kseniya finn pran batem. Li dir: “Asterla mo donn Zeova mo lavi pu servi Li avek lamur. Mo plas bann peryodik ek bann trak pandan ki mo asiz lor bistop ki pre kot mo lakaz. Suvan bann fami vinn rann mwa vizit, ek avek lazwa mo partaz laverite lor Zeova avek zot.”

Kseniya pe atann avek inpasyans sa zur kan ‘so laser pu vinn pli fre ki dan zenes, ek kan li pu vinn parey kan li ti ena lafors ladolesans.’ (Zob 33:25) Si enn dimunn ki ena plis ki santan pa santi li tro vye pu aprann ki sans lavi dan Labib, u eski u panse u tro vye?