Eski Lafwa Bizin Baze lor Rezonnman?

Direkter enn seminer teolozik an États Unis ekrir ki “ena tro buku dimunn ‘relizye’ ki pratik enn relizyon zis pu evit servi zot kapasite rezone.” Li azute: “zot sinpleman anvi aksepte tu ‘san demann okenn prev.’”

SA LES konpran ki laplipar dimunn ki dir zot ena bann krwayans relizye pa reflesi lor bann rezon pu kifer zot krwar ladan, uswa si ena enn baz rezonab pu zot lafwa. Li pa etonan ki relizyon finn vinn enn size ki buku dimunn ezite pu koze.

Li domaz ki bann pratik kuma par egzanp ladorasyon bann zimaz ek resitasyon bann lapriyer parker pa ankuraz bann dimunn servi zot rezonnman lozik. Sa bann pratik la, ansam avek bann gran-gran legliz inpresyonan, bann vit kolorye, ek lamizik emuvan, zot bann sel kitsoz ki reprezant dan enn sertenn fason relizyon plizir milyon dimunn. Mem si sertin legliz pretann ki zot lafwa baze lor Labib, zot mesaz ‘krwar dan Zezi ek zot pu sove’ dekuraz bann dimunn pu ena enn letid Labib serye. Lezot pres levanzil sosyal uswa politik. Ki rezilta tusala?

Enn ekrivin relizye finn dir konsernan sityasyon an Amérique du Nord: “Relizyon Kretyin . . . donn enn konesans anler-anler, [ek] so bann manb pa byin edike dan lafwa.” Enn kikenn ki fer bann sondaz finn mem al pli lwin ziska dekrir États-Unis d’Amerique kuma “enn nasyon ki iletre an seki konsern Labib.” Me fransman, sa bann remark la ti pu aplik usi avek bann lezot peyi kot swadizan relizyon Kretyin domine. Pareyman, buku relizyon ki pa Kretyin pa ankuraz zot bann manb pu rezone ek zot plito met laksan lor bann sante, bann seremoni lapriyer ek plizir form meditasyon swadizan pu rant an kontak avek Bondye, olye ki zot ena bann panse lozik ek pratik.

Purtan, dan zot lavi tulezur, sa bann mem dimunn ki pa kas latet pu kone si zot krwayans egzak uswa vre, pas buku letan pu reflesi lor bann lezot size avek serye. Eski u pa truv sa drol ki enn dimunn ki fer bann gran-gran resers zis pu aste enn loto—ki enn zur pu fini dan enn ta feray—dir lor so relizyon: ‘Si li ti bon pu mo bann paran, li bon pu mo’si’?

Si nu interese sinserman pu fer Bondye plezir, eski fode pa nu egzaminn serye-serye si seki nu krwar lor Li, li egzak? Lapot Pol ti koz lor sertin dimunn relizye so lepok ki ti ena “enn zel pu Bondye, me pa enn zel ki dapre konesans egzak.” (Romin 10:2) Kapav konpar sa bann dimunn la ar enn pint ki finn anplwaye pu penn enn lakaz me ki pa servi bann bon kuler parski li pa’nn ekut bann linstriksyon propryeter lakaz la. Kitfwa pint la satisfe ar so travay, me eski propryeter la li, li pu dakor ar sa?

Ki Bondye aksepte konsernan vre ladorasyon? Labib reponn: “Sa li bon ek akseptab devan lizye nu Sover, Bondye, ki anvi ki tut sort kalite dimunn sape ek gayn enn konesans egzak lor laverite.” (1 Timote 2:3, 4) Sertin kapav panse ki li inposib truv sa kalite konesans la parmi tu bann relizyon ki egziste zordi. Me reflesi—si li volonte Bondye ki dimunn gayn enn konesans egzak lor laverite, eski li pu kasyet zot sa dan enn fason inzis? Antuka, pa dapre Labib, ki dir: “Si to rod [Bondye], Li pu les twa truv Li.”—1 Kronik 28:9.

Kuma eski Bondye fer bann ki rod Li sinserman, konn Li? Prosin lartik pu reponn sa kestyon la.