Let Komite Santral

Nou Bann Frer ek Ser Ki Nou Bien Kontan:

Kan nou kontan Bondie ek nou kontan nou prosin, sa motiv nou pou ‘al get bann dimounn dan tou nasion ek ansegn zot pou vinn bann disip Zezi, ek batiz zot.’ (Mat. 28:​19, 20; Mark 12:​28-31) Si nou ena sa kalite lamour-la pou bann dimounn, nou pou kapav ed bann ki “ena enn bon kondision leker pou gagn lavi eternel.”—Zist. 13:48.

Dan lepase, nou ti fer boukou zefor pou aprann bann model konversasion par-ker ek pou les bann piblikasion ar bann dimounn. Me azordi, nou bizin konsantre plis lor kouma nou kapav amelior nou bann konversasion avek zot. Enn fason ki nou montre ki nou kontan bann dimounn, se kan nou koz lor bann kitsoz ki interes zot. Sa vedir ki nou bizin adapte nou ar sak dimounn ki nou zwenn ek reflesi lor seki vremem interes zot. Kouma sa brosir-la kapav ed twa pou fer sa?

Dan sa brosir-la, ena 12 leson ki pou montre twa bann kalite ki to bizin devlope. Sa bann kalite-la pou ed twa pou montre lamour anver bann dimounn, pou ki to kapav ed zot pou vinn bann disip Zezi. Sak leson sorti dan enn zistwar ki ena dan Labib, ek li koz lor enn kalite presi ki Zezi ouswa bann Kretien dan premie siek ti montre anver bann dimounn. Lobzektif sa brosir-la, se pa pou aprann bann model konversasion par-ker; se pou rod bann fason pou montre lamour anver bann dimounn. Mem si to bizin ena toule 12 kalite kan to prese, to pou trouve kouma sertin parmi zot pli itil kan to koumans bann konversasion, kan to fer bann vizit, ouswa kan to fer letid.

Amezir ki to examinn sak leson, reflesi kouma to kapav met an pratik seki to’nn aprann lor sa kalite-la kan to koz avek bann dimounn dan to landrwa. Fer zefor pou ogmant to lamour pou Zeova ek pou bann dimounn, parski mem si to ena boukou kapasite, se sa lamour-la ki pou ed twa pou fer bann disip.

Nou bien kontan servi Zeova ansam avek twa. (Sof. 3:9) Nou priye nou Bondie pou ki Li beni bann zefor ki to pe fer pou kontan bann dimounn ek pou fer bann disip!