Zezi Swazir Sol

Sol ti enn sitwayen Romin. Li ti ne dan enn lavil ki apel Tars. Li ti enn Farizien ki ti konn bien Lalwa zwif, ek li ti deteste bann Kretien. Li ti rant dan lakaz bann Kretien, li ti trenn bann zom ek bann fam deor, ek li ti met zot dan prizon. Kan enn lafoul ankoler ti lapid (touy kout ros) enn disip Zezi ki ti apel Etienn, Sol ti pe debout akote ek li ti pe gete.

Sol ti anvi met bann Kretien ki pa ti res dan Zerizalem osi dan prizon. Alor, li ti demann gran pret pou avoy li dan lavil Damas, pou li aret bann Kretien ki ti res laba. Kan Sol ti ariv pre kot lavil Damas, enn kout, enn lalimier bien for ti eklere otour li, ek li ti tom anba. Li ti tann enn lavwa dir: ‘Sol, kifer to pe persekit mwa?’ Sol ti demande: ‘Kisann-la to ete?’ Lavwa-la ti dir li: ‘Momem Zezi. Al Damas. Laba, to pou kone ki to bizin fer.’ Deswit, Sol ti vinn aveg, ek li ti bizin led bann dimounn pou li rant dan lavil-la.

Dan Damas, ti ena enn Kretien fidel ki ti apel Ananias. Dan enn vizion, Zezi ti dir Ananias: ‘Al dan enn sime ki apel Lari Drwat, rant dan lakaz Zida, ek rod Sol.’ Ananias ti reponn: ‘Segner, mo bien konn sa zom-la! Li pe met to bann disip dan prizon!’ Me Zezi ti dir li: ‘Al rod li. Mo’nn swazir Sol pou pres bon nouvel ar boukou pep.’

Lerla, Ananias ti al rod Sol, ek li ti dir: ‘Sol, mo frer, Zezi finn avoy mwa pou ouver to lizie.’ Deswit, Sol ti rekoumans trouv kler. Li ti aprann konn Zezi ek li ti vinn so disip. Sol ti pran batem ek li ti koumans prese dan bann sinagog, ansam avek lezot Kretien. Mazine kouma bann Zwif ti gagn sok kan zot ti trouv Sol pe ansegn bann dimounn lor Zezi! Zot ti dir: ‘Pa limem ki ti pe persekit bann disip Zezi?’

Pandan trwa-z-an, Sol ti pres ar bann abitan Damas. Bann Zwif ti deteste Sol ek zot ti fer enn konplo pou touy li. Me kan bann frer ti tann koz lor sa konplo-la, zot ti ed Sol pou sove. Zot ti met li dan enn panie ek zot ti fer li desann par enn trou dan miray lavil.

Kan Sol ti al Zerizalem, li ti esey zwenn bann frer ki ti laba. Me zot ti per li. Lerla, enn disip ki ti apel Barnabas ti amenn Sol kot bann zapot ek ti fer zot konpran ki Sol ti vremem sanze. Avek kouraz, Sol ti koumans pres bon nouvel ansam ar lasanble ki ti dan Zerizalem. Plitar, bann dimounn ti pou apel li Pol.