LESON 6

Ki Proze Bondie Ena pou Later?

BONDIE ti kree later pou ki li vinn enn plas parfe pou ki bann dimounn viv ere. Li dir dan so Parol: “Lesiel, sa li pou Zeova, me later li finn donn sa bann dimounn.”—Psom 115:16.

Avan ki li ti kree premie zom ki ti apel Adan, Bondie ti swazir enn ti plas lor later pou kree enn zoli zardin ki ti apel Eden. Bann Lekritir Sakre dir ki lasours Larivier Lefrat ek Larivier Tig (Idekel) ti dan Eden.a Li posib ki zardin Eden ti trouv dan enn rezion ki azordi trouv dan les Tirki. Wi, zardin Eden ti vremem existe lor later!

Bondie ti kree Adan ek ti met li dan zardin Eden “pou ki li kiltiv li ek pran li swin.” (Zenez 2:15) Plitar, Bondie ti kree enn madam pou Adan ki ti apel Ev. Bondie ti donn zot lord pou “gagn zanfan, vinn boukou, ranpli later ek ena kontrol lor li.” (Zenez 1:28) Li kler ki Bondie ‘pa’nn kree later pou nanye, me li’nn form li pou ki dimounn res lor la.’—Izai 45:18.

Selman, Adan ek Ev ti rebel kont Bondie kan zot ti swazir pou dezobeir so lalwa. Lerla, Bondie ti met zot deor depi zardin Eden ek zot ti perdi posibilite pou viv dan Paradi. Akoz pese ki Adan inn fer, finn ena ankor plis dega. Bann Lekritir Sakre dir: “Par enn sel zom, pese finn rant dan lemond, ek pese finn amenn lamor, ek lerla lamor finn fane parmi tou bann dimounn, parski zot tou finn fer pese.”—Romin 5:12.

Proze ki Zeova ena, se ki bann dimounn viv ere dan paradi lor later. Me apre tou seki’nn arive, eski so proze inn sanze? Non! Bondie dir: ‘Parol ki sorti dan mo labous pa pou retourn ver mwa san okenn rezilta. Me vremem li pou realiz tou seki fer mwa plezir, ek li pou reisi akonpli seki mo’nn avoy li fer.’ (Izai 55:11) Later pou vinn enn paradi!

Kouma lavi pou ete dan Paradi? Anou get seki bann Lekritir Sakre promet dan de prosin paz.

a Zenez 2:10-14 dir: “Ti ena enn larivier ki ti sorti Eden ki ti aroz zardin-la, ek apre sa li ti divize an kat. Nom premie larivier-la se Pishonn.” “Nom deziem larivier-la se Giyonn.” “Nom trwaziem larivier-la se Idekel [ouswa, Tig]; li al ver Les Lasiri. Ek katriem larivier-la se Lefrat.” Pena lezot detay lor de premie larivier la.

Biento Later Pou Vinn enn Paradi

Bann ki’nn mor pou resisite: “Tou bann ki dan tom pou tann so lavwa ek pou sorti.”—Zan 5:28, 29.

Bann dimounn pou nepli vinn vie, pou nepli malad, ek mor: “Okenn abitan pa pou dir: ‘Mo malad.’” (Izai 33:24) Bondie “pou souy tou larm dan zot lizie, ek lamor pou nepli existe, pou nepli ena ni dey, ni plore, ni douler.”—Revelasion 21:4.

Pou ena enn kantite bon manze: “Later pou donn so rekolt; Bondie, wi, nou Bondie pou beni nou.”—Psom 67:6.

Bann bon lakaz ek enn travay ki fer gagn lazwa: “Zot pou ranz bann lakaz ek zot pou res ladan.” “Bann ki mo’nn swazir pou profit maximum tou travay zot lame.”—Izai 65:21, 22.

Nepli pou ena lager, krim, ouswa violans: Zeova “pe fer bann lager arete partou lor later.” (Psom 46:9) “Pou tir bann move dimounn lor later.”—Proverb 2:22.