Enn prophete en exil gagne bann vision lor l’avenir

DANIEL ti enn jeune homme ki ti ena enn fidelité extraordinaire. Zis avant ki Jérusalem ti detruire, bann Babylonien ti prend li ti amenn li en exil dan Babylone. Zot ti donne li ek lezot Juif—ki ti sorti dan royaume Juda—enn certaine liberté. Pendant tou sa le temps ki li ti reste dan Babylone-la, Bondié ti bien beni Daniel. Bondié ti mem sap li dan la mort kan bannla ti jette li dan enn trou kot ena bann lion, ek Li ti donne li bann vision ki ti permette li trouvé seki pou arrivé bien-bien loin dan l’avenir. Bann prophetie pli important ki Daniel ti gagné ti ena enn rapport avek le Messie ek So regne.

Daniel aprann kan Messie ti pou vini. Bondié ti dire Daniel kan So peuple ti kapav attann ki “Messie le Guide” ti pou vini—69 semaine l’année apré ki ti donne l’ordre pou retablir ek reconstruire bann muraille Jérusalem. Dan enn semaine normal ena sept jour; dan enn semaine l’année ena sept an. Bann Israélite ti gagne sa l’ordre-la bien apré lepok ki Daniel ti vive, setadir en 455 a.n.l. A partir sa date-la, si nou compte 69 “semaine,” setadir 483 an, nou tombe l’an 29 n.l. Dan prochain section sa brochure-la, nou pou trouvé ki ti arrivé sa l’année-la. Daniel ti trouvé aussi ki Messie ti “pou mort,” ou-soit executé, pou couvert nou peché.—Daniel 9:24-26.

Messie ti pou vinn le Roi dan le ciel. Daniel ti gagne enn vision extraordinaire kot li ti trouve seki ena dan le ciel. Dan sa vision-la li ti trouve le Messie—ki la Bible appel “enn kikenn ki ressemblé garson enn zom,”—approche avek trone Jéhovah Li-mem. Jéhovah ti donne li “domination, grandeur ek enn royaume.” Sa Royaume-la ti pou dure touletan. Daniel ti aprann enn lot detail interessant concernant sa Royaume Messianik-la—pou ena lezot dimoune ki pou regné ensam avek sa le Roi-la. Sa bann dimoune-la zot forme enn groupe ki la Bible appel “bann saint sa Kikenn ki Supreme-la.”—Daniel 7:13, 14, 27.

Sa Royaume-la pou detruire bann gouvernement sa le monde-la. Bondié ti donne Daniel capacité pou explik signification enn rêve ki ti troublé Neboukadnetsar, le roi Babylone. Sa le roi-la ti trouve enn grand statue avek enn la tête en or, so poitrine ek so deux la main en argent, so ventre ek so la hanche en cuivre, so deux la jambe en ferraille, ek so deux lipié en ferraille ek l’argile melangé. Enn roche ki sorti dan enn montagne ti tape sa deux lipié fragile-la ek ti crase sa statue-la ziska li vinn la poussiere. Daniel ti expliké ki chaque partie sa statue-la represente bann puissance mondial ki’nn vini enn apré lot, commencé par Babylone, la tête en or. Daniel ti trouvé ki c’est dan lepok ki bann dernier puissance mondial pou dirige sa mauvais le monde-la, ki Royaume Bondié pou agir. Li pou crase tou bann gouvernement sa le monde-la. Lerla li pou regne pou touletan.—Daniel, chapitre 2.

Daniel ti vinn bien vié, mais li ti reussi trouve Babylone tombé. Pareil couma bann prophete ti annoncé, le roi Cyrus ti detruire sa la ville-la. Pa trop longtemps apré, bann Juif ti finalement liberé exactement apré enn periode 70 an kot zot pays ti reste desolé, couma sa ti annoncé. Enba direction bann gouverneur, bann pretre ek bann prophete ki ti fidele, bann Juif finalement ti reconstruire Jérusalem ek ti retabli temple Jéhovah. Mais ki ti pou arrivé a la fin sa 483 an-la?

—Basé lor livre Daniel.