SECTION 12
Sagesse Bondié donne nou enn direction dan nou la vie
Dan livre Proverbes ena enn quantité conseil inspiré par Bondié ki donne nou la vie enn direction. La plupart finn ecrire par Salomon
ESKI Jéhovah li enn le Roi ki ena la sagesse? Enn fason important ki aide nou pou reponn sa question-la c’est pou examine conseil ki Li donne nou. Eski sa bann conseil-la zot efficace? Eski kan nou applik zot, nou la vie amelioré ek nou gagne plus satisfaction? Le roi Salomon, ki ti sage, ti ecrire plusieurs centaine proverbe. Sa bann proverbe-la applik dan tou domaine nou la vie. Anou guette certain parmi zot.
Mette nou confiance en Bondié. Pou nou ena enn bon relation avek Jéhovah li bien important ki nou ena confiance en Li. Salomon ti ecrire: “Faire Jéhovah confiance avek tou to leker ek pa fié lor to prop l’intelligence. Dan tou seki to faire, prend Li compte, ek Li, Li pou faire to bann chemin vinn droite.” (Proverbes 3:5, 6) Faire Jéhovah confiance vedir ki nou rod so direction ek nou obeir Li. Kan nou faire sa, nou la vie ena enn vrai sens. Enn dimoune ki agir coumsa pou faire leker Bondié content ek sa donne Jéhovah enn reponse pou bann question ki so l’ennemi Satan ti soulevé.—Proverbes 27:11.
Nou agir avek sagesse dan nou relation avek lezot. Bann conseil ki Bondié donné pou bann mari, bann femme ek bann zenfant, tombe dan enn bon moment dan lepok ki nou pé vive zordi. Bondié donne sa conseil-la bann mari: “Trouve la joie avek femme ar ki to’nn marié depuis to jeunesse.” Sa vedir ki enn mari bizin reste fidele envers so femme. (Proverbes 5:18-20) Dan livre Proverbes, bann femme marié kapav trouve enn joli description lor enn femme capable ki gagne l’admiration so mari ek so bann zenfant. (Proverbes, chapitre 31) Ek bann zenfant gagne conseil pou obeir zot parent. (Proverbes 6:20) Sa livre-la montré aussi ki li important ki nou ena bann camarade, ek ki si enn kikenn reste dan so coin tousel, sa kapav faire li vinn egoïste. (Proverbes 18:1) Bann camarade kapav influence nou pou faire seki bon ou-soit seki mauvais, alors nou bizin bien konn choisir bann camarade ki nou frequenté.—Proverbes 13:20; 17:17.
Prend nou-mem bien soin. Dan livre Proverbes ena bann conseil ki ena enn grand valeur, par exemple couma nou kapav evite boire trop beaucoup, developpe bann bon sentiment, combatte bann sentiment ki kapav ena enn mauvais l’effet lor nou, ek vinn enn kikenn ki travail dur. (Proverbes 6:6; 14:30; 20:1) Li averti nou ki si nou mette nou confiance dan conseil bann dimoune au lieu ki nou faire confiance conseil Bondié, sa pou faire nou gagne bann malheur. (Proverbes 14:12) Li encourage nou pou protege nou leker kont bann mauvais l’influence, ek li rappel nou ki “[dan nou leker-mem] ki bann la source la vie sorti.”—Proverbes 4:23.
Plusieurs million dimoune dan le monde finn trouvé ki zot la vie finn amelioré kan zot finn mette sa bann conseil-la en pratik. Resultat: Zot ena encore plus raison pou accepté Jéhovah couma zot Chef.
—Basé lor livre Proverbes.