Bann Israélite demann enn le roi

APRÉ la mort Samson, Samuel ti servi en tant ki prophete ek juge en Israël. Bann Israélite ti contigne dire li ki zot envie gagne enn le roi, pareil couma bann lezot nation. Mem si sa ti bien offense Jéhovah, Li ti donne Samuel l’ordre pou faire seki le peuple ti demandé. Bondié ti choisir Saül, enn zom bien humble, pou vinn le roi. Mais avek le temps, le roi Saül ti commence ena l’orgueil ek li ti desobeir Jéhovah. Bondié ti rejette li ek ti dire Samuel nomme enn lot le roi, enn jeune homme ki ti appel David. Mais, beaucoup l’année ti pou passé avant ki David ti pou vinn le roi.

Alors ki David ti encore enn adolescent, li ti al rann visite so bann frere ki ti pé servi dan l’armée Saül. Sa l’armée-la en entier ti peur a cause enn soldat ennemi, enn geant ki ti appel Goliath. Goliath pa ti pé arrete provok zot ek provok zot Bondié. David ti en colere. Alors li ti accepté pou al laguerre kont sa geant-la. Avek zis enn fronde ek deux-trois roche, sa jeune homme-la ti sorti pou al joinde sa geant ki ti mesure environ trois metre-la. Goliath ti bouffonne David. Mais David ti reponn li ek ti dire li ki li pli bien armé ki li, parski li, li ti pé laguerre au nom Jéhovah! Avek zis enn sel roche, David ti touye Goliath, ek li ti coupe la tête sa geant-la avek so prop l’epée. L’armée bann Philistin ti sauvé tellement zot ti peur.

Au commencement, Saül ti impressionné par courage ki David ti ena, ek li ti mette li en charge so l’armée. Mais avek le temps, Saül ti commence ena enn grand jalousie pou David, parski li ti gagne beaucoup victoire. David ti bizin sauvé pou sap so la vie, ek li ti vive couma enn fugitif pendant beaucoup l’année. Mais, David ti reste fidele envers le roi ki ti essaye touye li, parski li ti dire ki c’est Jéhovah ki ti choisir Saül pou vinn le roi. Finalement, Saül ti mort dan laguerre. Zis apré, David ti vinn le roi, pareil couma Jéhovah ti promette.

En tant ki le roi, David ti ena enn grand desir pou range enn temple pou Jéhovah. Mais, Jéhovah ti dire li ki c’est enn so descendant ki ti pou faire sa, ek c’est so garson Salomon ki ti construire sa temple-la. Mais Bondié ti recompense David kan li ti faire enn l’alliance extraordinaire avek li: Dan so descendance ti pou ena bann le roi couma jamais pa finn ena. A la fin, Sauveur ou-soit Descendance ki Bondié ti promette en Éden, ti pou sorti dan so descendance. C’est li-mem ki pou vinn le Messie, “enn Oint,” setadir sa kikenn ki Bondié ti choisir-la. Jéhovah ti promette ki sa Messie-la pou vinn Chef enn gouvernement ou-soit enn Royaume ki pou reste pou touletan.

David, avek enn leker rempli ar reconnaissance, ti ramasse enn quantité materiaux construction ek bann metal ki ti ena enn grand valeur, pou construction temple. Li ti aussi compose plusieurs psaume inspiré par Bondié. Vers la fin so la vie, David ti reconette ki “c’est l’esprit Jéhovah ki ti koz par [li], ek so parole ti lor [so] la langue.”—2 Samuel 23:2.

—Basé lor 1 ek 2 Samuel; 1 Chroniques; Isaïe 9:7; Matthieu 21:9; Luc 1:32; Jean 7:42.