Ki Ariv enn Dimounn kan Li Mor?

Lamor li lekontrer lavi. Lamor li koumadir enn profon somey. (Jean 11:11-14) Bann dimounn mor pa kapav tande, trouve, koze, ni zot kapav pans kitsoz. (Ecclésiaste 9:5, 10) Fos relizion ansegne ki kan bann dimounn mor, zot al dan lemond bann lespri pou viv avek zot bann gran dimounn. Labib pa ansegn sa.

Bann ki finn mor pa kapav ed nou, ni fer nou ditor. Souvan bann dimounn fer bann servis ek bann sakrifis parski zot panse ki sa pou fer plezir bann dimounn ki finn mor. Me Bondie pa kontan sa ditou, parski sa bann kitsoz-la baze lor bann mansonz ki Satan ansegne. Ek sa pa kapav fer bann dimounn mor la osi plezir parski zot pena lavi. Fode pa ki nou per bann dimounn mor, ouswa nou ador zot. Nou bizin ador zis Bondie.​—Matthieu 4:10.

Bann dimounn mor pou reviv. Jéhovah pou redonn bann dimounn mor lavi dan enn paradi lor later. Me sa pou arive dan lavenir. (Jean 5:28, 29; Actes 24:15) Bondie kapav lev bann mor parey koumadir ou pe lev enn dimounn ki pe dormi.​—Marc 5:22, 23, 41, 42.

Satan Lediab ki finn fann sa mansonz-la, ki swadizan nou pa mor. Satan ek so bann demon fer bann dimounn krwar ki lespri bann dimounn mor kontign viv ek ki li fer zot malad ouswa gagn lezot problem. Parfwa, Satan anbet bann dimounn atraver bann vizion ek bann rev. Jéhovah kondann bann ki sey koz avek bann dimounn mor.​—Deutéronome 18:10-12.