Leson 13

Couma ou kapav trouve vrai religion?

Eski Bondié accepté tou religion, ou-soit Li accepté zis enn sel? (1)

Kifer ena enn quantité religion ki pretann ki zot chrétien? (2)

Couma eski ou kapav reconnette bann vrai chrétien? (3-7)

1. Jésus ti commence enn sel vrai religion chrétien. Alors zordi, bizin ena zis enn sel group ki adore Jéhovah dan fason ki Li demandé. (Jean 4:23, 24; Éphésiens 4:4, 5) La Bible expliké ki ena zis enn tigit dimoune ki lor sa chemin serré ki amenn ziska la vie-la.—Matthieu 7:13, 14.

2. La Bible ti annoncé ki apré la mort bann zapotre, tigit-tigit bann fausse l’enseignement ek bann pratik ki pa chrétien ti pou rente dan congregation chrétien. Certain zom ti pou pousse bann croyant pou suive zot au lieu ki zot suive Christ. (Matthieu 7:15, 21-23; Actes 20:29, 30) A cause sa-mem, nou trouve enn quantité religion ki pretann ki zot chrétien. Mais couma eski nou kapav reconnette bann vrai chrétien?

3. Seki identifié bann vrai chrétien plus ki tou, c’est vrai l’amour ki zot ena entre zot. (Jean 13:34, 35) Pa finn aprann zot pou pensé ki zot pli superieur ki bann dimoune lot race ou-soit lot couleur la peau. Pa finn montré zot aussi ena la haine pou bann etranger ki sorti lezot pays. (Actes 10:34, 35) Alors, zot pa participe dan bann la-guerre. Entre zot-mem bann vrai chrétien traite zot camarade couma frere ek soeur.—1 Jean 4:20, 21.

4. Enn lot maniere ki nou kapav reconnette vrai religion, c’est ki so bann membre ena enn grand respé pou la Bible. Zot accepté li couma Parole Bondié ek zot croire seki li dire. (Jean 17:17; 2 Timothée 3:16, 17) Pou zot, Parole Bondié pli important ki bann l’idée ek coutume bann dimoune. (Matthieu 15:1-3, 7-9) Zot essaye mette seki la Bible dire en pratik dan zot la-vie toulé-jour. Alors, zot pa preche enn kitsoz ek apré zot faire enn lot.—Tite 1:15, 16.

5. Vrai religion bizin aussi donne nom Bondié l’honneur. (Matthieu 6:9) Jésus ti faire bann lezot dimoune konn nom Bondié, setadir Jéhovah. Bann vrai chrétien aussi bizin faire pareil. (Jean 17:6, 26; Romains 10:13, 14) Dan ou l’endroit, kisannla pé koz lor nom Bondié avek lezot?

6. Bann vrai chrétien bizin preche Royaume Bondié, pareil couma Jésus. Touletan li ti koz lor sa Royaume-la. (Luc 8:1) Li ti donne so bann disciple l’ordre pou preche sa mem message-la lor la terre entier. (Matthieu 24:14; 28:19, 20) Bann vrai chrétien croire ki zis Royaume Bondié pou kapav amenn vrai la-paix ek vrai securité lor la terre.—Psaume 146:3-5.

7. Fodé pa ki bann disciple Jésus forme partie dan sa mauvais lé-monde-la. (Jean 17:16) Zot pa participe dan bann zaffaire politik ek dan bann manifestation. Zot evite bann mauvais pratik, l’attitude ek conduite ki parette normal dan le monde. (Jacques 1:27; 4:4) Dan ou l’endroit, eski ou konn enn group religieux ki pé faire bann kitsoz ki vrai religion chrétien demandé?

[Zimage, page 27]

Bann vrai chrétien content zot camarade, zot ena respé pou la Bible ek zot preche Royaume Bondié