NAOUM
1 Mesaz kont Niniv: Liv lor vizion Naoum* ki sorti Elkos:
2 Zeova li enn Bondie ki demann enn latasman zis pou li tousel ek ki tir vanzans;
Zeova tir vanzans ek li pare pou exprim so koler.
Zeova tir vanzans kont so bann lennmi,
Ek li rezerv so koler pou so bann lennmi.
3 Zeova pa ankoler vit ek li ena enn gran lafors,
Me Zeova zame pa pou ezite pou pini bann dimounn ki merite.
Kan li marse, enn gran divan ek enn tanpet leve,
Ek lapousier ki anba so lipie leve kouma bann niaz.
4 Li kriy ar lamer, ek li fer li sek;
Ek li fer tou bann larivier sek.
Basann ek Karmel fletri,
Ek bann fler dan Liban fletri.
5 Akoz li, bann montagn pe tranble,
Ek bann kolinn pe fonn.
Akoz so figir, later pou sakouye,
Ansam avek pei-la ek tou bann ki res ladan.
6 Kisann-la kapav tini devan so koler?
Ek kisann-la kapav siport so gran koler?
Pou devers so gran koler parey kouma dife,
Ek akoz li, bann ros pou exploze.
7 Zeova li bon, li enn fortres dan zour maler.
Li interese ar* bann ki rod so proteksion.*
8 Li pou detrir Niniv* net avek enn inondasion ki balie tou lor so pasaz,
Ek nwarte pou galoup deryer so bann lennmi.
9 Ki konplo zot pou fer kont Zeova?
Li pou detrir zot net.
Maler pa pou arive enn deziem fwa.
10 Mem si zot inn may ansam parey kouma pikan,
Ek ki zot parey kouma bann ki’nn sou avek labier;*
Pou bril zot parey kouma lapay sek.
11 Enn kikenn ki pe konplote pou fer bann move kitsoz kont Zeova, pou sorti kot twa,
Ek li pou donn bann konsey ki pena valer.
12 Ala seki Zeova dir:
“Mem si zot for ek boukou,
Kanmem sa, pou detrir zot ek pou fer zot disparet.*
Mo’nn fer twa* soufer, me mo pou nepli fer twa soufer.
13 Ek aster-la mo pou kas zoug* ki li’nn met lor twa,
Ek mo pou kas to bann lasenn an-de.
14 Zeova inn donn sa lord-la ki konsern twa,*
‘Pa pou ena personn ki pou port to nom ankor.
Mo pou tir bann zidol skilpte ek bann stati an metal* dan lakaz* to bann bondie.
Mo pou fer enn tom pou twa parski to degoutan.’
15 Gete! Lor montagn ena lipie enn kikenn ki amenn bann bon nouvel,
Sa kikenn ki anons lape la.
A Zida, selebre to bann fet, tini to bann promes,
Parski sa kikenn ki pa vo nanye la pa pou pas kot twa ankor.
Pou detrir li net.”
2 Enn kikenn ki dispers lezot inn mont kont twa.*
Protez bann miray.
Vey sime.
Prepar zot* ek rasanble tou zot lafors.
2 Parski Zeova pou redonn Zakob so laglwar,
Li pou redonn Izrael osi so laglwar,
Parski bann ki fer ravaz inn ravaz bann-la;
Ek zot inn detrir bann-la zot bann ti brans.
3 Boukliye so bann zom for inn penn an rouz,
So bann gerye ena bann linz kouler rouz fonse.
Bann metal lor so bann kales lager eklere kouma dife
Zour ki li pe prepar li pou lager,
Ek zot pe lev bann lans ki’nn fer ar pie zenevriye.
4 Bann kales lager pe roule kouma fou dan bann sime.
Zot ale-vini vit-vit dan bann plas piblik.
Zot briye parey kouma bann flanbo ki pe brile ek zot rapid parey kouma zekler.
5 Li pou fer apel so bann ofisie.
Zot pou tonbe amezir ki zot avanse.
Zot degaze pou al ver miray lavil;
Zot mont enn baraz.
7 Inn fini deside:* Inn met li* touni,
Inn pran li inn ale, ek so bann tifi ki esklav pe plengne;
Zot fer bann son parey kouma bann kolonb amezir ki zot bat zot lestoma.*
8 Depi touletan Niniv ti parey kouma enn basin delo,
Me aster-la zot pe sove.
Sertin ti pe kriye: “Pa ale! Pa ale!”
Me personn pa pe vir deryer.
9 Pran larzan,* pran lor!
Bann trezor-la an-abondans.
Li ranpli ar tou sort kalite kitsoz ki ena boukou valer.
10 Pena personn dan lavil-la, li’nn abandone, ek li’nn detrir!
Zot leker pe fonn ar laper, zot zenou nepli ena lafors, zot laans pe tranble;
Ek zot tou zot figir inn vinn blem.
11 Kotsa sa plas kot bann lion reste la ete? Kotsa bann zenn lion gagn manze?
Kotsa lion-la marse avek so tipti,
Kot pena personn ki fer zot per?
12 Lion-la lasas enn zanimo ek desir li bout-bout pou donn so bann tipti ase manze,
Ek li trangle enn zanimo pou so bann femel lion.
Plas kot li reste ranpli avek bann zanimo ki li’nn touye,
Avek bann zanimo ki li’nn desir bout-bout.
13 Ala seki Zeova Sef bann larme dir: “Gete! Mo pe vinn atak twa.
Mo pou bril to bann kales lager ek fer zot vinn lafime,
Ek lepe pou touy to bann zenn lion.
Mo pou fer twa aret lasas bann zanimo lor later,
Ek pou nepli tann lavwa to bann mesaze.”
3 Maler lor lavil ki vers disan!
Li ranpli ar bann dimounn ki anbet lezot ek ki kokin.
Touletan li pe lasas ek touy bann dimounn!
2 Pe tann son bann kout fwet ek tapaz bann larou,
Seval ki pe galoupe bien vit ek bann kales ki pe bondi.
3 Kavalie lor so seval, lepe ki pe eklere, ek lans ki pe briye,
Ena enn kantite dimounn ki’nn touye ek bann kadav ki’nn anpile
—Pa kapav konte komie dimounn mor ena.
Zot res kogne akoz sa bann kadav-la.
4 Se parski pena okenn limit ar prostitision ki sa prostitie-la pe fer,
Limem ki atiran ek ki sedwir lezot, enn exper dan sorselri.
Limem ki piez bann pep avek so prostitision ek bann fami avek so sorselri.
5 Ala seki Zeova Sef bann larme dir: “Gete! Mo pe vinn atak twa.*
Mo pou lev to zip lor to figir;
Mo pou fer bann pep trouv twa touni,
Ek bann rwayom trouv to laont.
6 Mo pou zet bann salte lor twa
Ek mo pou fer twa vinn enn kitsoz ki lezot meprize;
Mo pou fer twa vinn enn kitsoz ki lezot boufone.
7 Tou dimounn ki trouv twa pou sove pou al lwin ar twa ek pou dir,
‘Niniv inn detrir!
Kisann-la pou sagrin li?’
Kotsa mo pou trouv bann dimounn ki pou rekonfort twa?
8 Eski to pli bon ki No-Amon,* ki ti asiz kot bann kanal Larivier Nil?
Delo ti antour li;
Lamer ti so rises ek lamer ti so miray.
9 Letiopi ek Lezip ti donn li enn lafors ki pena limit.
Pout ek bann Libien ti vinn ed li.*
10 Me li osi li ti al an-exil;
Li ti ale kouma enn prizonie.
Ti osi desir so bann zanfan bout-bout dan tou kwin semin.*
Ti fer tirazosor pou swazir so bann zom inportan,
Ek ti atas tou so bann dirizan avek lasenn.
11 Twa osi to pou sou;
To pou al kasiet.
To pou rod proteksion akoz to lennmi.
12 Tou to bann miray zot parey kouma bann pie fig, kot ena bann premie frwi;
Si sakouy zot, zot tonbe dan labous bann ki manz zot.
13 Gete! To bann solda parey kouma bann madam.
Bann laport dan to pei pou res gran ouver pou to bann lennmi.
Dife pou bril net bann bar to bann laport.
14 Ramas delo avan ki bann lennmi anserkle twa!
Ranforsi to bann miray.
Desann dan labou ek pil-pil larzil.
Pran moul ki servi pou fer bann brik.
15 Mem la, dife pou bril twa net.
Enn lepe pou detrir twa.
Li pou devor twa parey kouma bann zenn sotrel fer.
Fer to bann abitan vinn boukou parey kouma bann zenn sotrel!
Wi, fer zot vinn boukou parey kouma bann sotrel!
16 To’nn ogmant to bann marsan plis ki bann zetwal ki dan lesiel.
Bann zenn sotrel sanz zot lapo ek anvole ale.
17 To bann gardien parey kouma bann sotrel,
Ek to bann ofisie parey kouma enn larme sotrel.
Zour kot fer fre, zot res dan bann miray ros,
Me kouma soley briye, zot anvole zot ale;
Ek personn pa kone kot zot ete.
18 A lerwa Lasiri, to bann berze dan somey;
To bann zom inportan res dan zot bann zoli lakaz.
To pep inn disperse lor bann montagn,
Ek pena personn pou rasanble zot.
19 Pena okenn soulazman pou maler ki’nn tom lor twa.
Pena okenn gerizon pou to blesir.
Tou bann ki tann sa nouvel-la lor twa pou tap zot lame;
Parski kisann-la ki pa’nn soufer akoz bann move kitsoz ki to pe kontign fer?”
Vedir “Sa Kikenn Ki Donn Rekonfor La.”
Ouswa “pran swin.” Lit., “konn.”
Ouswa “rod refiz kot li.”
Lit., “so plas.”
Ouswa “labier ki fer ar dible.”
Ouswa kitfwa, “Pou detrir zot kan li pou pase.”
Setadir, Zida.
Get Lexplikasion Bann Mo.
Setadir, Lasiri.
Ouswa “bann stati ki’nn fer avek bann metal ki’nn fonn.”
Ouswa “tanp.”
Setadir, Niniv.
Lit., “Fer bann laans vinn for.”
Ouswa “pou fonn.”
Ouswa “etabli.”
Setadir, Niniv.
Lit., “leker.”
Isi sa fer referans ar enn metal ki apel larzan.
Setadir, Niniv.
Setadir, Teb.
Lit., “twa.”
Lit., “kot latet tou bann semin.”