ABDIAS
1 Vizion ki Abdias* ti gagne:
Ala seki Segner Siprem* Zeova dir konsernan Edom:
“Nou’nn tann enn mesaz ki sorti kot Zeova,
Inn avoy enn mesaze parmi bann pep:
‘Leve, anou prepar nou pou lager kont li.”
2 “Gete! Mo’nn fer twa vinn enn nanye ditou parmi bann pep.
Pou bien deteste twa.
3 Lorgey ki dan to leker inn anbet twa,
Twa ki res parmi bann fant enn falez,
Ki res dan oter ek ki pe dir dan to leker,
‘Kisann-la pou amenn mwa anba lor later?’
4 Mem si to res lao parey kouma enn leg,
Ouswa si to met to nik parmi bann zetwal,
Mo pou fer twa desann depi laba,” ala seki Zeova dir.
5 “Si bann voler ti vinn kot twa, si zot ti vini aswar,
Eski zot pa ti pou kokin zis seki zot anvi?
Ouswa si bann dimounn ki rekolte rezin ti vinn kot twa,
Eski zot pa ti pou kit inpe lor pie pou ki lezot ramase?
Me to bann lennmi pou detrir twa net!*
6 Gete kouma inn fouy Ezai!
Inn rod partou so bann trezor ki ti kasiet!
7 Zot inn fer twa al ziska kot frontier.
Tou bann ki ti fer enn lalians avek twa* inn anbet twa.
Bann zom ki ti pe viv dan lape avek twa inn dominn lor twa.
Bann ki ti pe manz dipin avek twa pou met enn file pou piez twa,
Me to pa pou remark sa.
8 Sa zour-la,” ala seki Zeova dir,
“Eski mo pa pou detrir bann ki ena sazes dan Edom?
Eski mo pa pou detrir bann ki ena bon zizman ki dan rezion kot ena bann montagn ki pou bann desandan Ezai?
9 Ek to bann gerye pou gagn per, A Temann,
Parski dan enn masak, pou touy bann ki dan rezion kot ena bann montagn ki pou bann desandan Ezai.
10 Akoz violans ki to’nn fer anver to frer Zakob,
To pou kouver ar laont,
Ek pou detrir twa pou touletan.
11 Zour kot to’nn res enn kote ek to pa’nn fer nanye,
Zour kot bann etranze inn amenn so bann solda kouma prizonie,
Kan bann etranze inn rant par so laport ek inn fer tirazosor lor Zerizalem,
To’nn fer parey kouma zot.
12 Fode pa ki to kontan zour ki to trouv to frer pe pas par enn maler,
Fode pa ki to kontan zour kot pep Zida pe detrir,
Ek fode pa ki to koz dan enn fason arogan zour kot to trouv zot pe bien soufer.
13 Fode pa ki to vinn kot laport mo pep zour so maler,
Fode pa ki to kontan zour so maler,
Ek fode pa ki to pran so dibien zour so maler.
14 Fode pa to debout lor lakrwaze pou touy bann ki’nn reisi sape,
Ek fode pa ki zour maler to livre bann ki’nn reisi sove ar zot bann lennmi.
15 Parski zour Zeova, zour kot li pou pini bann pep, bien pros.
Parski seki to’nn fer, samem pou fer ar twa.
Fason ki to’nn tret lezot, koumsa mem pou tret twa.*
16 Parski fason ki zot inn bwar lor mo montagn ki sin,
Koumsa mem tou bann pep pou kontign bwar, san arete.
Zot pou bwar ek avale,
Ek zot pou vinn koumadir zame zot inn existe.
17 Me bann ki pou sape pou lor Montagn Sion,
Ek montagn-la pou sin;
Ek bann desandan Zakob pou repran bann kitsoz ki ti pou zot.
18 Bann desandan Zakob pou vinn enn dife,
Bann desandan Zozef pou vinn enn laflam,
Ek bann desandan Ezai pou kouma lapay;
Dife-la pou bril zot net,
Ek personn pa pou sape parmi bann desandan Ezai,
Parski Zeova limem inn koze.
19 Zot pou pran Negev ek rezion kot ena bann montagn ki pou bann desandan Ezai,
Zot pou pran Sefela ek pei bann Filistin.
Zot pou pran bann laplenn Efraim ek bann laplenn Samari,
Ek Binzamin pou pran Galaad.
20 Pei bann Kananeen ziska Sarepta pou vinn pou bann ki ti al kouma prizonie depi sa baraz-la,
Setadir pou pep Izrael.
Bann dimounn ki ti amenn depi Zerizalem kouma bann prizonie dan Sefarad, pou pran bann lavil Negev.
21 Ek bann ki sov lepep pou mont lor Montagn Sion
Pou ziz rezion kot ena bann montagn ki pou bann desandan Ezai,
Ek Zeova pou regne kouma lerwa.”
Vedir “Serviter Zeova.”
Ouswa “Souverin Segner.”
Ouswa kitfwa, “Ki kantite zot ti pou detrir?”
Lit., “to bann alie.”
Lit., “sa pou revinn lor to latet.”