ZOEL
1 Ala seki Zeova ti dir Zoel* garson Petouel:
2 “Ekout sa, zot bann ansien,
Ek pran kont, zot tou bann dimounn ki res dan pei-la.*
Eski enn kitsoz koumsa inn deza arive dan zot lepok,
Ouswa dan lepok zot bann anset?
3 Rakont sa zot bann garson,
Ek ki zot bann garson rakont sa zot bann garson,
Ek ki bann-la zot bann garson rakont sa prosin zenerasion.
4 Seki sotrel ki devore pa’nn manze, sotrel ki ena lezel inn manze;
Ek seki sotrel ki ena lezel pa’nn manze, sotrel ki pena lezel inn manze;
Ek seki sotrel ki pena lezel pa’nn manze, sotrel ki voras inn manze.
5 Leve, zot bann soular, ek plore!
Kriye ek plore zot tou ki bwar divin,
Parski inn tir divin dou depi zot labous.
6 Parski enn pep inn mont dan mo pei, enn pep ki pwisan ek ki pa kapav konte.
So ledan parey kouma ledan enn lion, ek so lamaswar parey kouma lamaswar enn lion.
7 Li’nn detrir mo karo rezin ek li’nn fer mo pie fig vinn enn siko,
Li’nn plis zot bann lekors ek li’nn zet zot enn kote,
Nepli ena okenn lekors lor zot bann brans.
8 Kriye ek plore parey kouma enn vierz* ki ena enn latwal sak lor li,
Ki pe plore pou fianse* ki li ti ena dan so zenes.
9 Inn aret ofer ofrand sereal* ek ofrand divin dan lakaz Zeova;
Bann pret ki pe servi Zeova an-dey.
10 Inn detrir tou seki ti ena dan karo, later an-dey;
Parski inn detrir sereal, nouvo divin inn sek, ek delwil inn fini.
11 Bann fermie dan lapenn, bann planter rezin pe kriye ek pe plore,
Akoz dible ek lorz;
Parski rekolt ki dan karo inn detrir net.
12 Pie rezin inn sek,
Pie fig inn fletri.
Pie grenad, pie palmis, ek pie pom,
Tou bann pie dan karo inn sek;
Parski lepep nepli dan lazwa me li pe gagn onte.
13 Zot bann pret, met latwal sak lor zot* ek bat zot lestoma;*
Zot ki pe servi kot lotel, kriye ek plore.
Rantre ek pas lanwit dan latwal sak, zot ki pe servi mo Bondie;
Parski inn aret ofer ofrand sereal ek ofrand divin dan lakaz zot Bondie.
14 Anonse ki pou ena enn karem;* anonse ki pou ena enn rasanbleman sakre.
Rasanble bann ansien ansam, avek tou bann abitan pei-la,
Pou ki zot vinn dan lakaz Zeova zot Bondie, ek kriye Zeova pou ki zot gagn so led.
15 Maler akoz sa zour-la!
Parski zour Zeova li pre,
Ek li pou vinn parey kouma enn destriksion ki sorti kot Tou-Pwisan!
16 Eski pa’nn tir manze devan nou lizie,
Ek inn tir lazwa ek kontantman dan lakaz nou Bondie?
17 Bann lagrin* inn sek anba zot bann lapel.
Nepli ena nanye dan bann stor.
Inn detrir zot bann grenie, parski bann sereal inn sek.
18 Mem bann troupo pe plengne!
Bann troupo bef pe tourn an-ron dan konfizion, parski zot pena patiraz!
Ek bann troupo mouton pe soufer akoz seki’nn arive.
19 A Zeova, se twa ki mo pou kriye;
Parski dife inn detrir bann patiraz ki ti dan bann landrwa dezer,
Ek enn laflam dife inn bril net tou bann pie ki ti dan karo.
20 Mem bann zanimo sovaz pe atann twa,
Parski bann larivier delo inn sek
Ek dife inn detrir net bann patiraz ki ti dan bann landrwa dezer.”
2 “Soufle enn korn dan Sion!
Anonse dan mo montagn ki sin ki pou ena enn lager.
Ki tou bann abitan sa pei-la* tranble,
Parski zour Zeova pe vini! Li pre!
2 Li enn zour kot ena nwarte ek ki som,
Enn zour kot ena niaz ek kot fer bien nwar,
Parey kouma premie lalimier lizour ki pe leve lor montagn.
Ena enn pep ki pwisan ek zot enn kantite;
Zame finn ena enn pep kouma li avan,
Ek zame pa pou ena enn lot
Pandan tou bann zenerasion ki pou vini.
3 Devan li ena enn dife ki devore,
Ek deryer li ena enn laflam ki bril tou.
Pei ki devan li parey kouma zardin Eden,
Me deryer li ena enn landrwa dezer, ki abandone,
Ek kot nanye pa kapav sape.
4 So laparans parey kouma laparans bann seval,
Ek zot galoupe parey kouma bann seval lager.
5 Son ki zot fer kan zot pe sote pou al lao bann montagn parey kouma son bann kales,
Parey kouma tapaz ki enn gro dife fer kan li bril lapay,
Parey kouma enn pep ki for ki’nn rasanble pou al lager.
6 Akoz zot, bann pep pou dan langwas.
Zot tou zot figir pou vinn blem akoz laper.
7 Zot atake parey kouma bann gerye,
Zot grinp enn miray parey kouma bann solda,
Sakenn res lor so semin,
Ek zot pa kit zot semin.
8 Zot pa pous zot kamarad,
Sak zom swiv so semin.
Si ena tonbe akoz bann zarm,*
Lezot pa kit zot ranze.
9 Zot degaze rant dan lavil, zot galoupe lor miray.
Zot grinp lor bann lakaz, zot pas par bann lafnet koumadir voler.
10 Devan zot, later tranble ek lesiel sakouye.
Soley ek lalinn inn vinn som,
Ek bann zetwal nepli briye.
11 Zeova pou lev so lavwa devan so larme, parski so larme bien boukou.
Parski sa kikenn ki pe realiz so parol la li pwisan;
Parski zour Zeova li bien gran ek li fer extra per.
Kisann-la pou kapav siport sa?”
12 “Pourtan,” ala seki Zeova dir, “li pa tro tar pou zot retourn ar mwa avek tou zot leker,
Gard karem, kriye ek plore for-for.
13 Desir zot leker, pa zot linz,
Ek retourn ar Zeova zot Bondie,
Parski li ena konpasion* ek mizerikord,* li pa ankoler vit ek li ena lamour fidel an-abondans,
Ek li pou sanz* so desizion konsernan sa maler-la.
14 Ki kone, kitfwa li pou aret ankoler ek sanz* so desizion
Ek donn zot enn benediksion.
Lerla zot pou kapav ofer Zeova zot Bondie, enn ofrand sereal ek enn ofrand divin.
15 Soufle enn korn dan Sion!
Anonse ki pou ena enn karem;* ek anonse ki pou ena enn rasanbleman sakre.
16 Rasanble lepep; sanktifie lasanble.
Rasanble bann vie misie;* rasanble bann zanfan ek bann ti-baba ki ankor bwar avek zot mama.
Ki nouvo marye sorti dan so lasam ki trouv andan, ek lamarye dan so lasam.
17 Ki bann pret, bann ki servi Zeova,
Ki ant lavarang ek lotel, plore ek dir:
‘A Zeova, ena pitie pou to pep;
Pa les to leritaz vinn enn kitsoz ki bann dimounn meprize,
Kan to les bann pep diriz zot.
Kifer bann pep bizin dir, “Kot zot Bondie ete?”’
18 Lerla Zeova pou montre ki kantite li kontan* so pei
Ek li pou ena pitie pou so pep.
19 Zeova pou reponn so pep:
‘Gete, mo pe avoy zot sereal, nouvo divin, ek delwil,
Ek zot pou manze vant plin;
Mo pou nepli fer zot gagn onte parmi bann pep.
20 Mo pou fer sa kikenn ki sorti dan Lenor la al lwin ar zot;
Mo pou dispers li dan enn landrwa ki sek ek abandone,
Mo pou pous so bann solda ki par devan, dan direksion lamer ki dan Les*
Ek so bann solda ki par deryer, dan direksion lamer ki dan Lwes.*
So move loder pou leve,
So pianter pou kontign leve;
Parski Bondie pou fer bann gran kitsoz.’
21 A pei, pa bizin per.
To pou bizin kontan ek dan lazwa, parski Zeova pou fer bann gran kitsoz.
22 Pa per, zot bann zanimo ki dan laplenn,
Parski bann patiraz ki dan bann landrwa dezer pou vinn ver,
Ek bann pie pou donn bann frwi;
Pie fig ek pie rezin pou donn frwi an-abondans.
23 Zot, bann garson Sion, zot bizin kontan ek dan lazwa akoz seki Zeova zot Bondie pou fer;
Parski li pou donn zot lapli lotonn kantite ki zot bizin,
Ek li pou fer bann gro lapli tom lor zot,
Lapli lotonn ek lapli printan, parey kouma avan.
24 Bann plas kot bat dible pou ranpli ar lagrin ki prop,
Ek bann preswar pou deborde ar nouvo divin ek delwil.
25 Ek mo pou dedomaz zot pou seki bann sotrel inn manze pandan tou sa bann lane-la,
Bann sotrel ki ena lezel, bann sotrel ki pena lezel, bann sotrel ki voras, ek bann sotrel ki devore,
Mo gran larme ki mo ti avoy kont zot.
26 Zot pou vremem manze vant plin,
Ek zot pou donn loner nom Zeova zot Bondie,
Ki’nn fer bann kitsoz extraordiner pou zot;
Zame pa pou fer mo pep gagn onte ankor.
27 Ek zot pou bizin kone ki mo omilie Izrael
Ek ki momem Zeova zot Bondie—pena enn lot apart mwa!
Zame pa pou fer mo pep gagn onte ankor.
28 Apre sa, mo pou devers mo lespri sin lor tou kalite dimounn,
Ek zot bann garson ek zot bann tifi pou anons bann profesi,
Zot bann vie dimounn pou fer bann rev,
Ek zot bann zenom pou gagn bann vizion.
29 Dan sa lepok-la mo pou devers mo lespri sin
Mem lor mo bann esklav zom ek fam toule-de.
30 Ek mo pou fer bann kitsoz extraordiner* dan lesiel ek lor later,
Pou ena disan, dife, ek bann kolonn lafime.
31 Soley pou vinn nwar ek lalinn pou vinn disan
Avan ki zour Zeova, zour ki gran ek ki fer per vini.
32 Ek tou dimounn ki met so konfians dan* nom Zeova pou sape;
Parski lor Montagn Sion ek dan Zerizalem pou ena bann ki’nn sape, parey kouma Zeova ti’nn dir,
Bann sirvivan ki Zeova apele.”
3 “Parski gete! dan sa bann zour-la ek dan sa lepok-la,
Kan mo pou retourn bann prizonie ki sorti Zida ek Zerizalem,
2 Mo pou osi rasanble tou bann pep
Ek mo pou amenn zot anba dan Vale Zozafat.*
Mo pou ziz zot laba
Akoz seki zot inn fer ar mo pep ek mo leritaz Izrael,
Parski zot inn dispers bann-la parmi bann pep,
Ek zot inn partaz mo pei ant zot.
3 Zot ti fer tirazosor pou partaz mo pep;
Zot ti vann enn garson pou pey enn prostitie
Ek zot ti vann enn tifi pou gagn divin pou bwar.
4 Ek zot, A Tir, Sidon, ek tou bann rezion dan Filisti,
Ki zot ena kont mwa?
Eski zot pe fer mwa peye pou enn kitsoz ki mo’nn fer?
Si zot pe fer mwa peye,
Deswit, mo pou degaze fer zot peye* pou seki zot inn fer.
5 Parski zot inn pran mo larzan* ek lor,
Ek zot inn amenn mo bann trezor ki ena plis valer dan zot bann tanp;
6 Ek zot inn vann pep Zida ek Zerizalem ar bann Grek,
Pou fer zot al lwin ar zot teritwar;
7 Gete, mo pou fer bann-la leve depi plas kot zot inn vann bann-la,
Ek mo pou fer zot peye* pou seki zot inn fer.
8 Mo pou vann zot bann garson ek zot bann tifi ar pep Zida,*
Ek bann-la pou vann zot ar bann zom Saba, ar enn pep ki res bien lwin;
Parski Zeova limem inn dir sa.
9 Anons sa parmi bann pep:
‘Prepar* zot pou lager! Motiv zot bann zom for!
Ki tou bann solda avanse ek atake!
10 Fer zot bann zouti pou labour later vinn bann lepe ek zot bann laserp vinn bann lans.
Ki sa kikenn ki feb la dir: “Mo for!”
11 Vini ek ede, zot tou bann pep ki toutotour, rasanble ansam!’”
A Zeova, fer to bann gerye* desann dan sa plas-la.
12 “Ki bann pep leve ek vinn dan Vale Zozafat;
Parski se laba mem ki mo pou asize pou ziz tou bann pep ki toutotour.
13 Pas enn fosi, parski zot inn mir pou rekolt.
Desann ek kraz rezin, parski preswar-la inn ranpli.
Bann basin pe deborde, parski bann move kitsoz ki sa bann pep-la pe fer inn vinn boukou.
14 Ena bann lafoul, bann lafoul dimounn dan vale kot pran desizion,
Parski zour Zeova pe koste dan vale kot pran desizion.
15 Soley ek lalinn pou vinn som,
Ek bann zetwal pou nepli briye kouma avan.
16 Ek Zeova pou kriye kouma enn lion lor Montagn Sion,
Depi Zerizalem li pou lev so lavwa.
Lesiel ek later pou sakouye;
Me Zeova pou vinn enn refiz pou so pep,
Enn fortres pou pep Izrael.
17 Ek zot pou bizin kone ki momem Zeova zot Bondie ki res dan Sion, mo montagn ki sin.
Zerizalem pou vinn enn plas ki sin,
Ek bann etranze pou nepli pas laba.
18 Sa zour-la divin dou pou koule lor bann montagn,
Dile pou koule lor bann kolinn,
Ek bann larivier Zida pou ranpli ar delo.
Enn lasours delo pou koule depi lakaz Zeova,
Ek li pou aroz Vale Bann Pie Akasia.
19 Me Lezip pou vinn enn landrwa ki’nn abandone,
Ek Edom pou vinn enn dezer kot personn pa reste,
Akoz violans ki’nn fer ar pep Zida,
Laba kot zot inn vers disan bann dimounn inosan.
20 Me pou touletan ena bann dimounn ki pou res dan Zida,
Ek Zerizalem, zenerasion apre zenerasion.
21 Zot disan* ki mo pa ti konsider kouma inosan, mo pou konsider li kouma inosan;
Ek mwa, Zeova, mo pou res dan Sion.”
Vedir “Zeova Limem Bondie.”
Ouswa “ki lor later-la.”
Ouswa “zennfi.”
Ouswa “mari.”
Ouswa “ofrand lagrin.”
Lit., “pik zot linz dan zot lerin.”
Ouswa “zot bizin an-dey.”
Lit., “Sanktifie enn karem.”
Ouswa kitfwa, “Bann fig sek.”
Ouswa “later-la.”
Ouswa “prozektil.”
Ouswa “pitie.”
Get Lexplikasion Bann Mo.
Ouswa “regret.”
Ouswa “regret.”
Lit., “Sanktifie enn karem.”
Ouswa “ansien.”
Ouswa “pou bien devwe pou.”
Setadir, Lamer Mor.
Setadir, Lamer Mediterane.
Ouswa “mo pou donn bann sign.”
Lit., “apel.”
Vedir “Zeova Limem Ziz.”
Lit., “fer zot peye lor zot latet.”
Isi sa fer referans ar enn metal ki apel larzan.
Lit., “fer zot peye lor zot latet.”
Lit., “dan lame pep Zida.”
Lit., “Sanktifie.”
Ouswa “to bann kikenn ki pwisan.”
Ouswa “Disan ki zot inn verse.”