Sofoni

1 Parol Zeova ki Sofoni, garson Kousi, garson Gedalia, garson Amarya, garson Ezekias, ti tande dan bann zour Zozias, garson Amonn lerwa Zida: 2 “Vremem, mo pou fini tou seki ena dan sa pei-la,” ala seki Zeova dir. 3 “Mo pou touy zom lor later ek zanimo. Mo pou touy, kreatir ki anvole dan lesiel ek pwason dan lamer, ek bann baryer avek bann seki move; ek mo pou touy tou dimounn lor later,” ala seki Zeova dir. 4 “Mo pou avoy mo lame kont Zida ek kont tou bann ki res Zerizalem, Ek dan sa landrwa-la, mo pou tir tou ti tras Baal, nom bann pret ki servi bann bondie etranze, 5 ek bann seki lor zot lakaz pe bes latet devan larme lesiel, ek bann seki pe bes latet ek pe fer serman par Zeova ek pe fer serman par Malkam; 6 ek tou bann ki pe vir ledo ar Zeova ek ki pe aret swiv Li ek ki pa finn rod Zeova ek kont bann ki pa finn kestionn Li.” 7 Res trankil devan Segner Siprem Zeova; parski zour Zeova li pre, parski Zeova finn prepar enn sakrifis; li finn fer so bann invite vinn sin. 8 “Zour ki pou ena sakrifis pou Zeova, mo pou demann bann kont ar bann prins, bann garson lerwa, ek ar zot tou ki ena lor zot, bann linz bann pep etranze. 9 Ek sa zour-la mo pou pran kont tou seki grinp lor lestrad, bann seki pe ranpli lakaz zot met avek violans ek desepsion. 10 Ek sa zour-la,” samem seki Zeova pe dir, “pou ena enn son koumadir enn kriye bien for ki pou sorti depi Laport Pwason, ek enn son koumadir pe irle ki pou sorti depi Deziem Kar lavil, ek enn gran tapaz koumadir pe kraze ki pou sorti depi bann kolinn. 11 Irle, zot bann seki res dan Maktes, parski labous tou bann komersan finn ferme; ek finn touy tou bann seki pez larzan. 12 Ek sa pou bizin arive lerla, ki avek enn enn lalanp mo pou fouy Zerizalem, ek mo pou pran kont bann zom ki pa bouze kot zot ete, kouma divin ki’nn lese lor so lamar, ki’nn depoze dan fon ek ki pe dir dan zot leker: ‛Zeova pa pou fer seki bon ek Li pa pou fer seki move.’ 13 Ek lezot pou kokin zot rises ek zot lakaz pou vinn enn plas dezer. Ek zot pou ranz bann lakaz, me zot pa pou res ladan; ek zot pou plant bann pie rezin, me zot pa pou bwar divin sa bann rezin-la. 14 Gran zour Zeova bien pre! Li bien pre, ek li pe vini vit-vit! Son ki zour Zeova fer li amer. Laba enn zom for pe kriye. 15 Sa zour-la, li enn zour gran koler, enn zour maler ek laper, enn zour siklonn ek destriksion, enn zour kot fer nwar ek kot pena lalimier ditou, enn zour kot ena niaz ek enn brouyar epe, 16 enn zour kot pou tann son korn ek signal alarm, kont bann lavil ki ena boukou ranfor ek kont bann gran latour ki trouv dan bann kwin. 17 Mo pou fer bann dimounn tom dan maler, ek vremem zot pou mars koumadir bann aveg, parski se kont Zeova ki zot finn fer pese. Ek zot disan pou koule kouma dir lapousier ek zot lintestin kouma dir malpropte. 18 Ni zot larzan ni zot lor pa pou kapav sap zot dan zour gran koler Zeova; So koler kouma enn dife ki pou bril later antie, parski Li pou fer enn destriksion, wi enn destriksion ki vremem terib, lor tou bann dimounn ki res lor later.”