1 Lerwa
2 Ek tigit-tigit, bann zour David finn koste pou li mor; ek li finn koumans donn lord so garson Salomon, li finn dir li: 2 “Mo pre pou mor. Alor, to bizin for ek azir kouma enn zom. 3 To bizin obeir Zeova to Bondie kan to mars lor so semin ek kan to obeir so bann lord, so bann komannman, so bann zizman ek so bann rapel, parey kouma inn ekrir dan Lalwa Moiz; lerla to pou reisi dan tou seki to fer ek partou kot to pou ale. 4 pou ki Zeova realiz so parol ki li ti dir lor mwa, ‘Si to bann garson pou pran kont zot semin, ek zot mars devans mwa dan laverite avek tou zot leker ek tou zot nam, lerla okenn parmi bann zom ki asiz lor tronn Izrael pa pou mor.’ 5 “Ek to konn bien seki Yoab, garson Zerouya ti fer mwa, seki li ti fer ar de sef larme Izrael, Abner garson Ner ek Amaza garson Yeter, kan li finn touy zot ek li finn plas disan lager dan peryod lape, ek li finn met disan lager lor so sintir ki ti autour so lerin ek lor so sandalet ki ti dan so lipie. 6 Ek to bizin azir an-akor avek to sazes, ek pa les so seve blan desann anpe dan Tom. 7 “Ek anver bann garson Barzilay, enn Galaadit, to bizin montre lamour fidel, ek bann-la bizin vinn bann ki manz lor latab ar twa; parski koumsa mem ki zot ti apros mwa kan mo ti pe sove devan Absalon, to frer. 8 “Ek ena osi Shimei garson Gera enn Binzaminit ki sorti Baourim; limem ki finn apel lemal lor mwa par enn malediksion blesan, zour ki mo ti pe al Maanaim; me kan li finn vinn zwenn mwa kot zourdin, mo finn fer serman par Zeova, mo finn dir, ‘Mo pa pou touy twa par lepe.’ 9 Ek aster-la, pa les li san pinision, parski to enn dimounn saz ek to kone ki to bizin fer li, to bizin fer so seve blan desann dan Tom dan disan.” 10 Apre sa, David finn al dormi avek so bann anset ek li finn antere dan Lavil David. 11 Ek David finn regne lor Izrael pandan 40 an. Li finn regne pandan 7 an dan Ebronn, ek li finn regne dan Zerizalem pandan 33 an. 15 Li ti dir: “To bien kone ki se mwa ki ti bizin vinn lerwa ek tou Izrael ti atann ki se mwa ki pou vinn lerwa. Zot pa’nn donn mwa rwayom-la, zot inn donn sa mo frer, parski sa ti volonte Zeova. 35 Apre sa, Lerwa ti fer Benaya garson Zoad vinn sef so larme. Ek li ti fer Zadok vinn pret dan plas Abiatar.