MACHI 23-29, 2026
RWĨMBO NA. 18 Tunathamini Fidia
Ũrĩa Ũũmba Kwonania Nkaatho Tontũ bwa Ĩkũũri
‘Narĩ wendani bũrĩa Kristũ atwendete nabu nĩbu bũtũinyaga.’—2 Ako. 5:14.
Jarĩa Tũkairitana
Tũgacũnkũũna ũrĩa twinthe tũũmba kwonania nkaatho tontũ bwa ĩkũũri.
1-2. Kĩgongwana kĩa ĩkũũri rĩa Jesũ kĩbuĩrĩte gũtũma tũthithia atĩa, na nĩkĩ? (2 Akorintho 5:14, 15) (Tega kinya mbica.)
Muntũ akeeja gũkwonokia ũmamĩri nĩ nyomba ĩmomokangi, nĩatĩa ũũmba kwigua bũmwegie? Kinya gũkethĩrwa bwoonokerue amwe na antũ bangĩ, ũgwe na bwaku wenda mono kũmũcokeria nkaatho tontũ bwa ũntũ bũu bwa gĩtũmi aakũthithĩĩrie.
2 O ta ũrĩa twairitanĩre kĩthomone kĩrĩa gĩkũrũkĩte, tũtĩũmba gũcionokia kuumania na wĩyia bwa kaumo. Amwe nou, kĩgongwana gĩa ĩkũũri rĩa Jesũ kĩomba gũtwonokia na njĩra ya (1) kũrekerwa meyia jarĩa tũthithagia, (2) gũtwa wĩrĩgĩĩro bwa kwaa babojũru ĩgiita rĩĩjĩte, na (3) kwĩthĩrwa na ngwatanĩro ĩnjega amwe na Mũrungu. Ta maumĩĩra, tũrĩna wĩrĩgĩĩro bwa gũtũũra nthĩgũrũ ĩnjerũ kenya na kenya. Kamma, ĩkũũri nĩrĩonanagia Jesũ neendete antũ kinya mbere eeja nthĩgũrũne. (Nju. 8:30, 31) Mũtũmwa Paũlũ naandĩkĩre atĩ, ‘wendani bũrĩa Kristũ atwendete nabu nĩbu bũtũinyaga’ kana bũtũtongagĩĩria. (Thoma 2 Akorintho 5:14, 15.) Bũu bũrĩonania nĩtũbuĩrĩte kwĩthĩrwa na nkaatho tontũ bwa wendo bwa Jesũ gũtwerekera na tũtĩbuĩrĩte kũũrĩrua nĩ ũntũ bũrĩa aatũthithĩĩrie.
Kwĩthĩrwe ka twonoketue kuuma kĩrĩ nyomba ĩmomoki kana kuuma kĩrĩ wĩyia bwa kaumo, nĩtũbuĩrĩte gũcokeria nkaatho ũrĩa watwonokia (Tega gĩcuncĩ kĩa 1-2)
3. Nĩkĩ o muntũ omba kwonania nkaatho kĩrĩ ĩkũũri na njĩra mwanya na bangĩ?
3 Nĩatĩa ũũmba kwonania nkaatho tontũ bwa ĩkũũri? Ĩcokio rĩaku rĩomba kwĩthĩrwa rĩrĩ mwanya na rĩa muntũ ũngĩ. Ngerekano, thũgaanĩria antũ bathatũ betĩte gũntũ kũmwe, ĩndĩ o muntũ arĩambia rũgendo rwawe arĩ gũntũ mwanya. Njĩra irĩa bagatumĩĩra nĩ mwanya. Kwou, “njĩra” ĩrĩa ũgatumĩra nĩkenda ũkinyĩra mworoto jwaku jwa kwonania nkaatho tontũ bwa ĩkũũri, ĩrĩĩrĩgĩĩra ũrĩa ngwatanĩro yaaku na Jehova ĩrĩ nandĩ. Tũrĩ na jau mathũgaanione, kĩthomo gĩkĩ gĩkaarĩĩria ũrĩa aritwa ba Bibiria, Akristu barĩa babatithĩtue, na antũ barĩa batigĩte kũgwatanĩra na kĩũthũrano bomba kwonania nkaatho tontũ bwa ĩkũũri.
ARITWA BA BIBIRIA
4. Nĩatĩa Jehova aigagua bwegie aritwa ba Bibiria?
4 Kethĩra ũrĩ mũritwa wa Bibiria, thũgaanĩria ũntũ bũbũ: Gwĩtĩkĩĩria nkuma ĩnjega kũrĩonania atĩ ũrĩ ũmwe wa barĩa Jehova akucĩĩtie nĩkenda bethĩrwa na ngwatanĩro amwe nawe. (Joh. 6:44; Atum. 13:48) ‘Jehova nĩwe ũthũũjaga nkoro.’ Bũu bũrĩonania nonaga gũciũmia gwaku gwa kwiritana bũmwegie na nagwĩragua kwona ũkĩthithia mogarũrũku nĩkenda ũmũgwĩria. (Nju. 17:3; 27:11) Ĩkũũri nĩrĩtũũmbithagia kwĩthĩrwa na ngwatanĩro ĩnjega amwe na Jehova. (Aro. 5:10, 11) Menya ũũrĩrua nĩ ũntũ bũu.
5. Nĩatĩa aritwa ba Bibiria bomba gũtumĩĩra ũtaaro bwa Afilipi 3:16?
5 Kethĩra ũrĩ mũritwa Bibiria nĩatĩa ũũmba kwonania nkaatho tontũ bwa ĩkũũri? Njĩra ĩmwe nĩkũthingatĩĩra ũtaaro bwa mũtũmwa Paũlũ kĩrĩ Afilipi: ‘Imenyagĩĩreni bwĩtage na mĩĩtĩre ĩngˈuanene na ĩrĩa tũkinyĩrĩte.’ Bibiria ingĩ itaũraga mũstaarĩ jũu ũjũ: “O ũrĩa tũthithĩtie wĩti na mbere, twĩteni na mbere kũthithia o ũu”. (Afl. 3:16, NWT) Kwou, menya ũrekeeria ũntũ kinya bũrĩkũ bũkũrigĩĩria gwĩtĩĩra njĩrene ya mwoyo.—Mat. 7:14; Luk. 9:62.
6. Nĩatĩa aritwa ba Bibiria bomba kũthithia bakeeja kwona bũrĩ bũbũũmu kũthithia mogarũrũku? (Kuriikanithia Maathana 30:11-14) (Tega kinya mbica.)
6 Nĩatĩa ũũmba kũthithia kethĩra nũkwona bũrĩ bũbũũmũ gwĩtĩkĩĩria ũritani bũnna bwa Bibiria? Thithia ũcũnkũũni, na ũrombe Jehova agũtethie gũciũkĩrwa bwega nĩ ũntũ bũu. (Zb. 86:11) Kethĩra no ũkwona bũrĩ bũbũũmũ gũciũkĩrwa nĩbu, bwee kaanya ĩndĩ menya ũtiga kwiritana. Nĩatĩa ũbuĩrĩte kũthithia kethĩra nũkwona bũrĩ bũbũũmũ gũtigana na mũtugo mũnna jũrĩa Bibiria ĩmenagĩĩria? Riikana atĩ gũtĩrĩo Jehova atwĩraga tũthithie ũntũ bũrĩa tũtĩũmba. Womba gũtũũra kũringana na ithimi bawe. (Thoma Kuriikanithia Maathana 30:11-14.) Na Jehova neranĩte agagũtethia. (Isa. 41:10, 13; 1 Ako. 10:13) Kwou menya ũkua nkoro. Antũ a kũthũgaanĩria ũntũ bũbũũmu bũrĩa ũgũkũrũkĩĩra, ĩta na mbere kũthũgaanĩria itharimo birĩa Jehova akweete na kĩmwe kĩabio nĩ ĩkũũri. O ũrĩa wendo bwaku bũgeeta na mbere kwongereka, ũkoona atĩ, ‘maathana jawe jatĩ jamarito.’—1 Joh. 5:3.a
Jehova atĩtwĩraga tũthithie mantũ jarĩa tũtĩũmba. Agatũtethia gũtũũra kũringana na ithimi biawe (Tega gĩcuncĩ kĩa 6)
7. Nĩ mantũ jarĩkũ antũ babeethĩ barĩa barereri ũmmene babuĩrĩte kũthũgaanĩria?
7 A buĩ antũ babeethĩ barĩa barereri ũmmene? Kinya buĩ bũrĩ aritwa ba Bibiria. Kamma, nĩbuĩ aritwa ba gĩtũmi mono ba aciari beenu. Bibiria yugaga: ‘Thengeereni Mũrungu nawe akabũthengeera.’ (Jak. 4:8; 1 Kar. 28:9) Rĩrĩa wajũkia ĩtagaaria rĩa kũthengeera Jehova, kinya we agakũthengeera. Atĩgũkucĩĩtie kĩrĩ we tontũ aciari baaku nĩ Akũũjĩ baawe. Athithĩtie ũu tontũ nendaga wĩthĩrwa na ũcoore bwa akuĩ amwe nawe. Nĩatĩa Jehova athithĩtie nĩkenda ũũmba kũthithia ũu? Nakweete kĩewa kĩa gĩtũmi mono takĩo ĩkũũri. (Aro. 5:1, 2) Kwou, mbere ya Mũriikana jwa mwaka jũjũ, thũgaanĩria kĩndeene bwegie mantũ jarĩa Jehova na Jesũ bakũthithĩrĩtie. Kinya thũgaanĩria ũrĩa ũũmba gũtumĩra ũtũũro bwaku na mĩoroto ĩrĩa ũũmba gũciĩkĩra nĩkenda wonania nkaatho tontũ bwa ĩkũũri.b
AKRISTŨ BARĨA BABATITHĨTUE
8. Nĩ na njĩra ĩrĩkũ Akristũ barĩa babatithĩtue bonanĩtie wĩtĩkio kĩrĩ ĩkũũri?
8 Kethĩra nũbatithĩtue, nũrĩkĩĩtie kwonania wĩtĩkio kĩrĩ ĩkũũri na njĩra mwanya mwanya. Ngerekano, nũjũkĩtie ĩtagaria rĩa kwĩthĩrwa ũrĩ akuĩ na Jehova na gũtũũra kũringana na ithimi biawe. Nwathĩkĩrĩte watho bwa Jesũ na njĩra ya kwĩra bangĩ bwegie wĩtĩkio bwaku. Kinya, nĩwairitĩre kĩrĩ Jehova na ũrabatithua. Rĩ, kũrĩ na mantũ jamoomũ ũkũrũkĩĩrĩte tontũ bwa kũgwatĩĩra mũrũngamo jwaku kĩrĩ ũthathayia bwa mma? (2 Tim. 3:12) Kũũmĩĩria ũrĩ mwĩtĩkĩkua nĩkwonanagia nwendete Jehova na ũrĩ na nkaatho tontũ bwa ĩkũũri.—Ahi. 12:2, 3.
9. Nĩ ũgwati bũrĩkũ Akristũ babuĩrĩte kwimenyeera kuumania nabu?
9 Tũrĩ Akristũ babatithĩtue, nĩtũbuĩrĩte kwimenyeera kuumania na ũgwati bũnna. Nyuma ya kagiita, twomba gũtiga kwonania nkaatho kwerekera ĩkũũri. Nĩatĩa bũu bũũmba gũkarĩka? Thũgaanĩria Akristũ ba karine ya mbere narĩa Efeso. Jesũ naabacokeerie nkaatho tontũ bwa kũũmĩĩria kwao. Amwe nou, naaberĩre atĩ nĩbaatigĩĩte ‘wendani bũrĩa baarĩ nabu au mberene.’ (Kug. 2:3, 4) O ta ũrĩa biugo bia Jesũ bikwonania, Mũkristũ omba gũtiga kũthithia mantũ na nkoro yonthe. Muntũ ta ũu omba kwĩthĩrwa akĩrombaga, agĩĩtaga mĩcemanione, na kinya gwĩta ũtungatĩrine tontũ nĩ wĩthĩre kũthithia ũu, na tĩ tontũ nagũtongeerua nĩ wendo. Nĩatĩa ũũmba kũthithia ũkeeja kwĩthĩrwa ũkigagua wendo bwaku kĩrĩ Jehova nĩbũnyiĩte?
10. Nĩatĩa ũũmba gũtumĩra ũtaaro bũrĩa Paũlũ aaere Timotheo? (1 Timotheo 4:13, 15)
10 Mũtũmwa Paũlũ neerĩre Timotheo akare akĩthũgaanagĩria mantũ ja gĩkĩrundu na ‘agĩciejanaga’ kĩrĩjo. (Thoma 1 Timotheo 4:13, 15.) Ũkĩthingatagĩra ũtaaro bũu, ciũmie kũthũgaanĩria ũrĩa ũũmba kũthithia nĩkenda wagĩrithia ũthathayia bwaku na wĩta na mbere kwĩthĩrwa na wĩru. (Aro. 12:11; Tega study note kĩrĩ “Be aglow with the spirit.”) Ngerekano, no withuranĩre bwega tontũ bwa mĩcemanio nĩkenda ũũmba kũgunĩka nkũrũki kuumania nayo. Kinya no wagĩrithie wiritani bwaku kĩũmbe na njĩra ya gũcwa kaanya ũrĩ wenka nĩkenda ũthũgaanĩria jarĩa ũkwiritana. O ta ũrĩa ũũmba gwĩta na mbere kuurutĩĩra mwanki nĩkenda jwĩta na mbere gwakana, nou ũkũbatara kwiritanĩria mantũne jau nĩkenda ũcokeria Jehova nkaatho tontũ bwa ĩkũũri na jarĩa jonthe akũthithĩrĩtie. Kinya mbere ya Mũriikana no ũthũgaanĩrie itharimo birĩa tũgwĩragĩrua tũrĩ Akũũjĩ ba Jehova. Gũtĩ nkaanja bũu bũgagũtethia kwĩthĩrwa na nkaatho tontũ bwa ĩkũũri tontũ nĩju mũsingi jũrĩa jũkũũmbithagia wĩthĩrwa na ũcore bwa akuĩ amwe na Jehova.
11-12. Rĩ, kethĩra magiita jamwe nwigagua ũtĩ na wĩru ta au mberene, kũu nĩ kuuga ũtĩ na kĩrundu kĩa Mũrungu? Taarĩĩria. (Tega kinya mbica.)
11 Ĩgiita rĩnna ũkeeja kwigua ũtĩna wĩru kwerekera ũthathayia bwa mma o ta au mberene, menya uunĩka nkoro kana wona teka ũtĩna kĩrundu kĩa Mũrungu. Riikana mũtũmwa Paũlũ neerĩre Akorintho atĩ kinya magiita jarĩa aaigagua atĩ na wendi bwa gũtũmĩĩria, no airitanagĩria ngũgĩne ĩu tontũ nĩyo aabuĩrĩte kũrita. (1 Ako. 9:17) Nĩmbi tũũmba kwiritana kuumania nawe?
12 Magiita jamwe kinya Paũlũ naaigagua atĩna wendi bwa gũtũmĩĩria. Amwe nou, neetĩre na mbere kũmĩĩria ũtungatĩriene bwawe kinya kethĩra naaigagua ũu ĩgiitene rĩu. Kinya gwe no ũthithie ũu. Menya ũtiganĩria kũthithia mantũ jarĩa jagĩrĩte kinya rĩrĩa ũkwigua ũtĩna wendĩ bwa kũjathithia. Kwou, romba Mũrungu agũtethie kenda wĩthĩrwa na wendi na inya ya kũthithia ũrĩa endaga. (Afl. 2:13) Ĩta na mbere kũthithia mantũ jarĩa jagagũtethia kwĩthĩrwa na ũcoore bwa akuĩ na Jehova. Ĩthĩrwa na mma atĩ nyuma ya kagiita wendo bwaku kwerekera Jehova bakagĩta inya kaĩrĩ na ũgacokera wĩru bũrĩa waarĩ nabu.
Ĩta na mbere kũthithia mantũ ja gĩkĩrundu kinya rĩrĩa ũkwigua ũkĩremeerwa (Tega gĩcuncĩ kĩa 11-12)
13. Nĩatĩa tũũmba kũthithia nĩkenda twirikithĩria kethĩra nĩtũgũtũũra kũringana na ũrĩa Jehova endaga?
13 Nyuma ya kagiita, nĩbwega gwĩta na mbere gwicũnkũũna tũgĩtumagĩra ũtaaro bũrĩa bũrĩ kĩrĩ 2 Akorintho 13:5 ĩrĩa yũgaga: ‘Geragieni mantũ jeenu bwingwa bwone kethĩra ibwĩtĩkĩtie bwega.’ Ngerekano, no ũciũrie biũria ta bibi: ‘Rĩ nĩ mbĩkĩte mantũ ja Gĩkĩrundu mbere ũtũũrone bwakwa?’ (Mat. 6:33) ‘Mantũ ja kwigwĩria jarĩa nthuurĩte nĩjakwonania nĩnthwĩre mantũ jamaaĩ?’ (Zb. 97:10) ‘Rĩ, nĩnciũmagia kwaria na kũthithia mantũ jarĩa jatũmaga kwĩthĩrwa na thĩĩrĩ na ũrũmwe kĩũthũranone?’ (Aef. 4:2, 3) Ĩgiita rĩa mũriikana, nĩtwĩthagĩrwa na kaanya ga kũthũgaanĩria kĩewa kĩrĩa Jehova atweete kĩa ĩkũũri na ka gwĩncũnkũũna nĩkenda twona kethĩra nĩ tũgũtũũra tontũ bwa Kristũ na tĩ tontũ bwetũ.c
BARĨA BATIGĨTE KŨGWATANĨRA NA KĨŨTHŨRANO
14. Nĩmbi biũmba gũtũma Akristũ bamwe batiga kũgwatanĩra na kĩũthũrano?
14 Akristũ bamwe nĩbatigĩte kũgwatanĩra na kĩũthũrano nyuma ya gũtumĩkĩra Jehova barĩ etĩkĩkua mĩaka ĩmiingĩ. Nĩkĩ? Bamwe nĩbainyĩĩrĩtue nĩ mĩthangĩko ya ũtũũro. (Luk. 21:34) Bangĩ nĩbagitarĩtue nĩ biugo kana mathithio ja ataana na aarĩ ba baaba. (Jak. 3:2) Na bangĩ nĩbathithĩtie meyia jamarito na nĩbaigagua nthao kũromba ũtethio. Kinya ũkethĩrwa ũthithĩtie bũngˈana, nĩmbi biũmba gũgũtethia kethĩra nũtigĩĩte kũgwatanĩra na kĩũthũrano? Nĩatĩa ĩkũũri, na wendo bũrĩa Jehova na Jesũ bakwonetie bũgatũma ũthithia?
15. Nĩatĩa Jehova onanagia nakũmakĩra ngʼondu ciawe irĩa ciũrĩte? (Ezekieli 34:11, 12, 16)
15 Thũgaanĩria ũrĩa Jehova aigagua bwegie barĩa batigĩte kũgwatanĩra na kĩũthũrano. Atĩbatejanagĩria na atĩũragĩrua nĩbo. Nacwaga ngʼondu ciawe irĩa ciũrĩte. Naireraga na agaitethia kũmũcokera. (Thoma Ezekieli 34:11, 12, 16.) Rĩ, kwombĩka nagũkũthithĩria ũu kinya gwe? Ĩĩ! Kwiritana kĩthomo gĩkĩ kũrĩonania nũkwenda kũmũgwĩria. O ta ũrĩa Jehova oonere mwerekera jũmwega jwa nkoro yaaku aragũkuucia ũmmene, nou agagũtethia ũmũcokere.
16. Nĩmbi biũmba gũtethia barĩa batigĩte kũgwatanĩra na kĩũthũrano gũcokera Jehova? (Tega kinya mbica.)
16 Gauku Mrudie Yehova nĩkethagĩrwa na biugo bibi bia gwĩkĩra inya: “Ĩthĩrwa na mma atĩ Jehova akethĩrwa amwe nagwe rĩrĩa ũgũciũmia kũmũcokera. Agagũtethia gũciinda mantũ jarĩa jakwinyĩĩrĩtie, akworie ũrũrũ bũrĩa ũkwigua, na akwee thĩĩrĩ ya nkoro na ya mathũgaanio ĩrĩa yumanagia na thamiri ĩnjega. Bũu bũgagũtethia kwĩthĩrwa na wendi bwa kũmũtumĩkĩra kaĩrĩ amwe na athathayia bangĩ.” Riikana atĩ kinya akũrũ barĩ na wendi bwa gũgũtethia. Bakaa ‘giciitho gĩa gwiciithagwa kabubani, na giiciogo gĩa gwiciogaga kiurutani.’ (Isa. 32:2) Nĩkenda wonania nkaatho tontũ bwa ĩkũũri ciũrie ũjũ, ‘Nĩmbi mpũmba kũthithia nĩkenda mbĩthĩrwa na ũcoore bwa akuĩ amwe na Jehova kaĩrĩ?’ (Isa. 1:18; 1 Pet. 2:25) Ngerekano, to wĩte mĩcemanione Nyomba ya Ũnene? Rĩ, no waranĩrie na akũrũ ba kĩũthũrano na ũkabaromba ũtethio bwa gĩkĩrundu? No babanganie ũgatetheerua kwiritana Bibiria. Ĩthĩrwa na mma atĩ Jehova agakũtharima tontũ bwa gũciũmia kũmũcokera na kwonania nkaatho tontũ bwa ĩkũũri.
Ciũrie, ‘Nĩ matagaaria jarĩkũ mpũmba kũjũkia nandĩ nĩkenda mbĩthĩrwa na ngwatanĩro ĩnjega amwe na Jehova?’ (Tega gĩcuncĩ gĩa 16)
NĨATĨA ŨKATHITHIA?
17-18. Nĩatĩa tũũmba gũtumĩra ĩgiita rĩetũ bwega mbere ya Mũriikana jwa mwaka jũjũ?
17 Jesũ aaugĩre atĩ aaritĩre ĩkũũri nĩkenda ‘muntũ kinya ũrĩkũ ũrĩa ũkamwĩtĩkia atĩkeeje kũũra, ĩndĩ eeje agĩte mwoyo jwa kenya na kenya.’ (Joh. 3:16) Nĩju mũsingi jũrĩa Jehova atumagĩra gũtwonokia kuuma kĩrĩ meyia na gĩkuũ. Twinthe nĩtũbuĩrĩte kwonania nkaatho tontũ bwa ĩkũũri. (Aro. 3:23, 24; 2 Ako. 6:1) Ntukũ inkai mbere ya Mũriikana nĩtwĩthagĩrwa na kaanya ga kũthũgaanĩria wendo bũrĩa Jehova na Jesũ baatwonerie, na bũu bũgatwĩkĩra inya kwonania nkaatho cietũ.
18 Nĩatĩa ũũmba kwonania nkaatho tontũ bwa ĩkũũri? No ũthithie ũu na njĩra ĩrĩ mwanya na ya bangĩ. Ĩndĩ ĩthĩrwa na mma Jehova akatharima gũciũmia gwaku rĩrĩa ũkũgwatanĩra na athathayia bangĩ barĩa batũũraga ‘bakĩthũgaanagĩria mantũ ja ũrĩa wabakuĩrĩĩreʼ antũ a mantũ jaao.—2 Ako. 5:15.
RWĨMBO NA. 14 Kumsifu Mfalme Mpya wa Dunia
a Nĩkenda ũũmba gũtumĩra mantũ jarĩa ũkwiritana, tumĩra kathandũkũ ka “Mworoto” karĩa karĩ mũthiene jwa ithomo bionthe bia iuku Gwĩrĩrua Ũtũũro Kenya na Kenya!
b Nĩkenda wona mendekithia ja ũrĩa ũũmba kũthithia wĩti na mbere gĩkĩrundu, tega kĩthomo kĩrĩ na kĩongo “Vijana—“Endeleeni Kuufanyia Kazi Wokovu Wenu Wenyewe” kĩrĩ ngacĩti ya Kĩrĩngo kĩa Mũkaria ya Dicemba 2017.
c Nĩkenda wona mendekithia ja ũrĩa ũũmba kwonania nkaatho, tega kĩthomo kĩrĩ na kĩongo “Ni Nini Hukuchochea Kumtumikia Mungu?” kĩrĩ ngacĩti ya Kĩrĩngo kĩa Mũkaria ya Juni 15, 1995.