Womba Gũciinda Mathũgaanio Jamathũũku

1-2. Nĩatĩa mũtũmwa Paũlũ aaigagua magiita jamwe na nĩatĩa ũntũ bũu bũkũngʼuanana na ũrĩa twigagua? (Aroma 7:21-24)

RĨRĨA wathũgaanĩria mũtũmwa Paũlũ, nĩ ũntũ bũrĩkũ bwĩjaga mathũgaanione jaaku? Rĩ, ũmwonaga arĩ mũtũmĩĩria waarĩ na ũcamba, mũritani ũmwega, kana ta mwandĩki wa mauku jamaingĩ ja Bibiria? Nĩ mma naathithĩrie mantũ jau jonthe. Amwe nou, magiita jamwe naaunĩkaga nkoro. Bũu bũrĩononanĩa naakũrũkagĩĩra mantũ o ta jarĩa babaingĩ beetũ bagũkũrũkĩĩra ntukũne cietũ.

² Thoma Aroma 7:21-24. Kĩrĩ barũga ĩrĩa Paũlũ aandĩkĩĩre Aroma, noonanĩrie naaigagua o ta ũrĩa babaingĩ beetũ baigagua ntukũne cietũ. Kinya kethĩra naarĩ Mũkristũ mwĩtĩkĩkua na nendete kwathĩkĩra Mũrungu, magiita jamwe nĩbwarĩ bũbũũmũ kũthithia mantũ jarĩa Jehova eendete tontũ atoojũri. Kinya naaigagua bũbũũĩ tontũ bwa mantũ jarĩa aathithĩtie mbere ya kwaa Mũkristũ, na naarĩ na thĩĩna yaakaraga ĩkĩmũcumbũraga.

3. Nĩmbi tũkaarĩĩria kĩthomone gĩkĩ? (Tega kinya “Gũtaarĩĩria Biugo.”)

³ Kinya kethĩra kũrĩ na mantũ Paũlũ aarũjaga najo ndeene yaawe, ateetĩkĩĩrĩrie mathũgaanio jamathũũkua jamwinyĩĩria. Kĩthomone gĩkĩ tũkaarĩĩria biũria bibi: Nĩmbi biatũmaga magiita jamwe Paũlũ aunĩka nkoro? Nĩatĩa aathithĩthagia rĩrĩa eethagĩrwa na mathũgaanio jamathũũku? Na nĩmbi biũmba gũtũtethia gũciinda mathũgaanio jamathũũku?

NĨMBI BIATŨMAGA PAŨLŨ AUNĨKA NKORO

4. Nĩmbi biatũmĩre Paũlũ aigua bũbũũĩ?

⁴ Mantũ jarĩa aathithĩtie au mberene. Mbere ya kwaa Mũkristũ Paũlũ aaijĩkene ta Saũlũ, na naathithĩtie mantũ jarĩa jaatũmĩre airira nyumene. Ngerekano, rĩrĩa Stefano ooragwa na maiga, naarĩ o na neetĩkagĩĩria ũntũ bũu. (Atum. 7:58; 8:1) Kinya naathangĩkĩrie Akristũ babaingĩ.—Atum. 8:3; 26:9-11.

5. Nĩatĩa mantũ jarĩa Paũlũ aathithĩtie au mberene jaatũmaga aigua?

⁵ Nyuma ya mũtũmwa Paũlũ kwaa Mũkristũ, magiita jamwe naacumbũragwa nĩ mathithio jaawe ja au mberene. Mbuga o ũrĩa mĩaka yaakũrũkaga, naacumbũkaga tontũ bwa ũrĩa aathangĩkĩtie Akristũ. Ngerekano, akĩandĩka barũga yaawe ya mbere kĩrĩ Akorintho mwakene jwa 55 M.J., aaugĩre ũjũ: ‘Ntĩagĩrĩte gwĩtwa mũtũmwa tontũ nĩndanyamarĩrie [kĩũthũrano] kĩa Mũrungu.’ (1 Ako. 15:9) Akĩandĩka barũga yaawe kĩrĩ Aefeso mĩaka ĩtano nyumene, naaugĩre we ‘nĩ ũmũniini mono nkũrũki ya antũ barĩa atheru bonthe.’ (Aef. 3:8) Kinya rĩrĩa aandĩkagĩra Timotheo, naaugĩre au mberene ‘narumaga Mũrungu na naathangĩkanagia.’ (1 Tim. 1:13) Ũrĩthũgaania nĩatĩa Paũlũ aaigagua rĩrĩa aariũngagĩra biũthũrano na agacemania na antũ barĩa aathangĩkĩtie, kana kinya antũ ba nja ciao?

6. Nĩ ũntũ bũrĩkũ bũngĩ bwatũmaga Paũlũ athangĩka? (Tega kinya nteto iria irĩ gaiti.)

⁶ Mwigua mwĩrĩne jwawe. Paũlũ naangˈuanithanagia ũntũ bũrĩa bwatũmaga athangĩka na ‘mwigua mwĩrĩne jwawe.’ (2 Ako. 12:7) Aatagwetere nĩmbi biongwa biamũthangĩkagia, ĩndĩ biugo birĩa aatumĩrĩte bionanagia kwombĩka yaarĩ mbajua, kana ũntũ bũngĩ.b

7. Nĩkĩ bwarĩ ũntũ bũbũũmũ kĩrĩ Paũlũ kũthithia mantũ jameega magiita jamwe? (Aroma 7:18, 19)

⁷ Gũtaũkĩrwa kwawe. Paũlũ naarũjaga na gũtaũkĩrwa kwawe. (Thoma Aroma 7:18, 19.) Kinya kethĩra neendaga kũthithia mantũ jarĩa jaagĩrĩte, gũtaũkĩrwa kwawe nĩkwamũrigagĩĩria. Naaugĩre rĩrĩa eendaga kũthithia mantũ jameega aatombaga kũjathithia. Amwe nou, neetĩĩre na mbere gũciũmia. (1 Ako. 9:27) No mwanka ethĩrwe naaigagua bũbũũĩ mono tontũ bwa ũntũ bũu bwakaraga bũgicokagĩra!

ŨRĨA PAŨLŨ AATHITHAGIA RĨRĨA AIGAGUA AUNĨKI NKORO

8. Nĩ mantũ jarĩkũ Paũlũ aathithagia nĩkenda oombana rĩrĩa aigagua aunĩki nkoro?

⁸ O ta ũrĩa kwonanĩtue kĩrĩ barũga ciawe, Paũlũ noonanĩrie ũrĩa we na Akristũ bangĩ barĩngĩũmba kũrwa na gũciinda mĩerekera ya meyia bagĩtethagua nĩ kĩrundu kĩa Mũrungu. (Aro. 8:13; Gal. 5:16, 17) Kaingĩ naagwetaga mĩkarie ĩmĩthũũku na mairĩrĩĩria jarĩa Akristũ baabataraga kũrwa najo. (Gal. 5:19-21, 26) Gũtĩ nkaanja naathũgaanagĩria gũtaũkĩrwa kwawe, agacwa ũtaaro kuuma Maandĩkone, na akajũkia matagaaria jarĩa aabataraga nĩkenda ombana. Tũrĩ na mma kinya we naatumagĩra ũtaaro bũrĩa aaejaga bangĩ.

9-10. Nĩmbi biatethagia Paũlũ rĩrĩa aaigagua aunĩki nkoro? (Aefeso 1:7) (Tega kinya mbica.)

⁹ Kinya kethĩra magiita jamwe Paũlũ naaigagua aunĩki nkoro, kũrĩ na mantũ jaamũtethagia kwĩthĩrwa na kũgwĩrua. Ngerekano, naagwĩragua rĩrĩa aaigagua mantũ jameega jegie biũthũrano birĩa biarĩ kũraaja. (2 Ako. 7:6, 7) Kinya naarĩ na kũgwĩrua tontũ bwa kwĩthĩrwa na ũcoore bwa akuĩ na athathaayia bangĩ. (2 Tim. 1:4) Na naamenyaga atĩ Jehova naamwĩtĩkĩrĩte. Gũtĩ nkaanja naarĩ na kũgwĩrua agĩtũmĩkagĩra Jehova arĩ na thamiri ĩnjega. (2 Tim. 1:3) Kinya rĩrĩa aaingĩri naarĩa Roma, neetĩre na mbere gwĩkĩra Akristũ inya ‘bagwĩrague nĩ ũntũ bwa Mwathani.’ (Afl. 4:4) Biugo biu biawe nĩbikwonania atĩ kamma aaragia ta muntũ ũtaunĩki nkoro. Rĩrĩa mathũgaanio jamathũũku jaamwĩjagĩĩra, naajaciindaga na njĩra ya kũthũgaanĩria mantũ jarĩa jarĩngĩtũma ethĩrwa na kũgwĩrua kaĩrĩ.

¹⁰ Paũlũ kinya noombaga gũciinda mantũ jamathũũku tontũ neetĩkagia atĩ Mũrungu aaritĩre ĩkũũri tontũ bwawe. (Gal. 2:20; Thoma Aefeso 1:7.) Ta maumĩĩra, neerĩgagĩĩra atĩ Jehova arĩngĩ mũrekeera gũkũrũkĩĩra Jesũ Kristũ. (Aro. 7:24, 25) Kinya kethĩrwa naathithĩtie mantũ jamathũũku na naarĩ na gũtaũkĩrwa kwawe, naatumĩkĩĩre Mũrungu agwĩrĩtue.—Ahi. 9:12-14.

11. Nĩkĩ ngerekano ya Paũlũ ĩtwĩkagĩra inya?

¹¹ O ta Paũlũ, kinya tuĩ twomba kwigua tũkĩrũjaga na mantũ jatĩagĩrĩte ndeene yeetũ magiita jonthe. Kwombĩka nĩ tontũ bwa jarĩa tũthũgaanagia, tũthithagia, kana tuugaga. Bũu bwomba gũtũma rĩmwe twigua tuunĩki nkoro. Mwarĩ wa baaba ũgwĩtwa Elizac ariuga ũjũ bwegie ũrĩa aigagua: “Nĩmbĩkagĩrwa inya ndathũgaanĩria jarĩa Paũlũ aakũrũkagĩĩra. Nĩmboragĩĩrua ndamenya kinya bangĩ nĩbarũjaga na mantũ ta jau. Bũu nĩbũndikanagia Jehova namenyaga mantũ jamoomũ jarĩa antũ baawe bagũkũrũkĩĩra.” O ta Paũlũ, nĩatĩa tũũmba kũthithia nĩkenda, twĩthĩrwa na thamiri ĩnjega na tũgwĩria Jehova kinya kethĩra magiita jamwe nĩtwigagua tuunĩki nkoro?

ŨRĨA TŨŨMBA KŨTHITHIA RĨRĨA TWAIGUA TUUNĨKI NKORO

12. Nĩatĩa kũmenyeria kũthithia mantũ ja gĩkĩrundu kũũmba gũtũtethia kũrwa na mathũgaanio jamathũũku?

¹² Menyeria kũthithia mantũ ja gĩkĩrundu. Rĩrĩa twamenyeria kũthithia mantũ ja gĩkĩrundu, bũu bũgatũtethia kũthũgaanĩria mantũ jameega. Twomba kũngʼuanĩthania mantũ jau na jarĩa tũthithagia nĩkenda twĩthĩrwa na ũgima bũbwega bwa mwĩrĩ. Rĩrĩa twarea biakũrĩa bibiega, twamenyeria kũthithia mazoezi, na twamama bwa kũngʼana nĩtwigagua bwega. O ta ũu, rĩrĩa twethĩrwa na rũmenyeria rwa kũthoma Bibiria, twaithuranĩra na twacokia mĩcemanione, na kinya tweta ũtungatĩrine nĩtwigagua bwega. Mantũ ta jau ja gũtwĩkĩra inya nĩjatũtethagia kũrwa na mathũgaanio jamathũũku.—Aro. 12:11, 12.

13-14. Nĩatĩa Akristũ bamwe bagunĩkĩte tontũ bwa kũthithia mantũ ja gĩkĩrundu na wĩthĩre?

¹³ Thũgaanĩria ngerekano ya John ũrĩa wamenyere naarĩ na kansa arĩ na mĩaka 39. Mwambĩrione naainyĩragua mono nĩ mathũgaanio jamathũũku. ‘Naamakĩre mono kũmenya naarĩ na mũrimo jũu arĩ ũmwĩthĩ.’ Ĩgiita rĩu mũtaana waawe aarĩ na mĩaka ĩthatũ. Nĩmbi biamũtetherie kũrwa na mathũgaanio jamathũũku? Ariuga: “Kinya kethĩra nĩndaigagua nogi, nĩndaciũmagia nĩkenda tũthithia mantũ ja gĩkĩrundu tũrĩ amwe ta nja. Nĩtwethagĩrwa na rũmenyeria rwa gwĩta mĩcemanione, ũtungatĩrine na kũthithia ũthathayia bwa nja kinya rĩrĩa bũtethagĩrwa bũrĩ bũbũũthũ.” Athũgaanĩria ĩgiita rĩu ariuga: “Rĩrĩa twagwatwa nĩ ũntũ bũbũũmũ mwambĩrione nĩtũmakaga mono ĩndĩ Jehova natwejaga inya na agatwonia wendo. Agagũtethia o ta ũrĩa aantetherie.”

¹⁴ Eliza, ũrĩa ũkũgweti au mberene ariuga: “Gwĩta mĩcemanione na kũthithia wiritani bwakwa, nĩkũndikĩthagĩria Jehova nanthikagĩĩra na nampendete. Bũu nĩbũtũmaga mbĩthĩrwa na kũgwĩrua.” Nolan, mũtegeeri wa mũthiũrũko kuuma Afrika, akĩaragĩria bwegie we na mwekũrũ waawe, ariuga: “Nĩtwĩtaga na mbere kũthithia mantũ ja gĩkĩrundu kinya rĩrĩa twaigua tuunĩki nkoro. Rĩonthe, nĩtwonaga Jehova agĩtũtethia na tũkethĩrwa na kũgwĩrua. Nĩtwiriikanagia kamma Jehova agatũtethia na agatũtharima kinya kethĩra tũtijĩ nĩatĩa akathithia ũu.”

15. Nĩatĩa tũũmba kũthithia nĩkenda tũũmbana rĩrĩa tũkwigua tuunĩki nkoro? Taarĩĩria.

¹⁵ Kũrĩ na mantũ jangĩ tũkũbatara kũthithia kethĩra tũgeeta na mbere kwigua tuunĩki nkoro. Ngerekano, thũgaanĩria ũkeeja kwĩthĩrwa ũkiigagua ũrũrũ mũgongo. Gwĩta na magũrũ kwomba gũgũtethia kũnyiia ũrũrũ bũu, ĩndĩ womba kũbatara kwiritanĩria nkũrũki nĩkenda bũthira. Nĩkenda ũmenya gĩtũmi kĩa thĩĩna ĩu, womba kũbatara kũthithia ũcũnkũũni kana ũkaaranĩria na ndagitarĩ. O ta ũu, nĩtũkũbatara kũthithia ũcũnkũũni Bibiriene na maukune jeetũ kana kinya kwaranĩria na Mũkristũ ũmũgimaru ũrĩa ũũmba gũtwaa ũtaaro bũbwega.

16. Nĩmbi biũmba gũgũtethia kũmenya nĩkĩ ũgũcumbũka? (Zaburi 139:1-4, 23, 24)

¹⁶ Romba Jehova agũtethie kũmenya mobatu jaaku. Mũnene Daudi naaciũkagĩrwa atĩ Jehova naamwijĩ bwega. Kwou, naarombere Jehova amũtethie kũmenya kaumo ka ‘mathũgaanio’ jarĩa jaamũcumbũraga. (Thoma Zaburi 139:1-4, 23, 24.) Kinya gwe no ũmũrombe agũtethie kũmenya nĩkĩ ũkwigua ũgĩcumbũka na ũrĩa ũũmba gũciinda mathũgaanio jau. No ũciũrie biũria ta bibi: ‘Nĩmbi bigũtũma ncumbũka? Rĩ, kũrĩ na ũntũ bũnna bũgũtũma mbigua ũu? Rĩ, rĩrĩa ndambia kwigua bũbũũĩ, nĩngeragia kũthũgaanĩria mantũ jarĩa jomba gũtũma ngwĩrua?

17. Nĩ mantũ jarĩkũ jagwĩkĩra inya ũũmba kwiritana? (Tega kinya mbica.)

¹⁷ Iritane mantũ jarĩa jagwĩtanĩria na mobatu jaaku. Magiita jamwe nĩbwega kwiritana bwegie nkuma cia Jehova. Ngerekano, mũtũmwa Paũlũ naagunĩkĩre mono rĩrĩa aathũgaanĩrie ĩkũũri na ũrekeri bwa Jehova. Kinya gwe no ũthithie ũu. Tumĩra Ũtoongeria bwa Ũcũnkũũni bwa Akũũjĩ ba Jehova, Maandiko kwa Ajili ya Maisha ya Mkristo, kana ũthome mantũ jangĩ jarĩa jakwarĩĩria nkuma cia Jehova ta kĩao, ũrekanĩri, na wendo bwawe bwa kwĩrĩgĩĩrĩka kĩrĩ jw.org. Rĩrĩa wona icuncĩ biũmba kũgũtethia biandĩke antũ anna. Ĩĩka mantũ jau wandĩkĩte antũ arĩa ũũmba kũjoona na no ũjakũrũkĩĩre rĩrĩa waigua unĩki nkoro. Ciũmie gũtumĩra jarĩa ũkũthoma nĩkenda jagũtethia mantũne jarĩa ũgũkũrũkĩĩra.—Afl. 4:8.

18. Nĩ mĩoroto ĩrĩkũ ya kwiritana Akristũ baciĩkĩrĩte na bakoona ĩkĩbatethia?

¹⁸ Eliza, ũrĩa ũkũgweti au mberene, naathithĩrie ũcũnkũũni bwegie Ayubu Bibiriene. Ariuga: “Mantũ jarĩa ndakũrũkĩrĩĩre nĩjangʼuananaga na ja Ayubu. Naagwatĩrwe nĩ mathĩĩna jathingatene. Amwe nou, kinya rĩrĩa ainyĩrĩkĩĩte mono ataatigĩre kwĩrĩgĩĩra Jehova kinya kethĩra ataamenyaga nĩkĩ aathangĩkaga.” (Ayu. 42:1-6) Diane, ũrĩa ũkũgweti au mberene, ariuga: “Kĩrĩ wiritani bwetũ kĩũmbe, ũũni na mũkũrũ wakwa nĩtũkwiritana iuku Mkaribie Yehova. Tũrĩ na nkaatho tontũ nagũtũtethia kwigerekania nawe. Rĩrĩa twaunĩka nkoro tontũ bwa maatia jeetũ nĩtwiriikanagia Jehova natũritanaga na agatũtethia kwaa antũ babeega. Ũntũ bũu nĩbũtũmaga tũmũkuĩĩria.”—Isa. 64:8.

ĨTHĨRWA NA MMA JEHOVA AGAGŨTETHIA NA AGATŨTHARIMA

19. Nĩatĩa tũũmba kwigua magiita jamwe, ĩndĩ nĩ ũrikithia bũrĩkũ tũrĩ nabu?

¹⁹ Kinya rĩrĩa twatumĩra ũtaaro bunthe bũrĩa bũrĩ kĩthomone gĩkĩ, magiita jamwe no twigue tũgĩcumbũka tontũ bwa mathũgaanio jamathũũku. Ntukũ imwe no twigue tuunĩki nkoro mono! Amwe nou, Jehova agatũtethia kũrwa na mathũgaanio jau jatĩagĩrĩte rĩrĩa jaumĩra. No twĩthĩrwe na mma magiita jamaingĩ tũkethagĩrwa na kũgwĩrua tontũ tũrĩ na ũcoore amwe na Jehova na kũmenya nagwĩragua tontũ bwa mantũ jonthe jarĩa tũmũthithagĩria.

20. Ũtuĩte kũthithia atĩa?

²⁰ Rekeeni tũciũmie kũthithia jonthe jarĩa tũkũũmba tũtĩgetĩkĩĩrie mathĩĩna kana maatia jeetũ jatũrigĩĩria kũgwĩrĩrua ũtũũro. Tũgĩtethagua nĩ Jehova, tũgaciinda mathũgaanio jamathũũku. (Zb. 143:10) Nĩtwĩrĩgĩrĩte nthĩgũrũ ĩnjerũ rĩrĩa mantũ jonthe jarĩa tũkathũgaanĩria jagatũretagĩra kũgwĩrua. Tũgokagĩĩra o rũkĩĩri tũtĩkũthũgaanĩria mantũ jagũtũthangĩkia, tũkĩgwĩragĩrua gũtumĩkĩra Jehova, Mũrungu wa wendo!