Biũria Kuuma Kĩrĩ Athomi Beetũ

Mwandĩki wa Njuno 30:18, 19 aaugĩre atĩ ‘mũkondo jwa muntũ-mũrũme barĩ na mwarĩ’ jũtĩngĩũmba gũciũrwa. Nĩatĩa eendaga kwonania?

Antũ babaingĩ kinya barĩa baijĩ mantũ ja Bibiria mono nĩbarigaragua nĩ biugo biu. Tũcuncĩ tũu tugaga ũjũ kĩrĩ Tafsiri ya Ulimwengu Mpya: “Kũrĩ na mantũ jathatũ jakũrũkĩte ũũmbi bwakwa bwa kũthũgaania [kana, “jandigaragia mono,” ftn.], na jana jarĩa ntĩciũkagĩrwa nĩjo bwega: Mwĩtĩre jwa nderi ĩrĩ ĩgũrũ, na mwĩtĩre jwa njoka ĩgũrũ rĩa iiga, na mwĩtĩre jwa meri ĩriene gatĩgatĩ, na mwĩtĩre jwa muntũ mũrũme rĩrĩa arĩ na mwarĩ.”—Nju. 30:18, 19.

Mberene, biugo ‘mũkondo jwa muntũ-mũrũme barĩ na mwarĩ’ twonaga teka biaragĩĩria ũntũ bũtĩagĩrĩte. Nĩkĩ? Mĩstaarĩ ĩngĩ mũrangone jũu, yaragĩĩria into bithatũ bibithũũku birĩa gũtĩrĩo biugaga, ‘ndĩkũngˈania.’ (Nju. 30:15, 16) Na mũstaarĩ jwa 20 jwaragĩĩria ‘mũka mũthũngĩĩri’ ũrĩa ugaga gũtĩ ũthũũku athithĩtie. Kwou, twathũgaanagia atĩ, o ta nderi ĩburũkĩte, na njoka ĩtĩĩrĩte maigene, kana meri ĩtĩrĩte ĩriene, muntũ mũrũme no athithie ũntũ na atĩkamenywe akũthithia. Kwou, twaciũkagĩrwa atĩ biugo ‘mũkondo jwa muntũ-mũrũme barĩ na mwarĩ’ biaragĩĩria ũntũ bũbũthũũku, tabu, muntũ mũrũme ũrĩa waĩragia mwarĩ ũtĩna ũũme na akamenyana nawe kĩmwĩrĩ.

Amwe nou, kũrĩ na itũmi bibiega bia gwĩtĩkia atĩ mĩstaarĩ ĩu yaragĩĩria ũntũ bũbwega. Birĩa mwandĩki ũu aataarĩĩragia nĩ mantũ jarĩa jaamũrigaragia.

Mauku ja gũkũnjwa ja karaaja ja Kĩhibirania nĩjagwataga mbaru ũntũ bũu. Kũringana na dikshonarĩ ĩmwe ĩrĩa ĩtaarĩĩragia Maandĩko ja Kĩhibirania, kiugo gĩa Kĩhibirania kĩrĩa gĩtaũri “beyond my comprehension” kĩrĩ Njuno 30:18 “kĩrĩonania ũntũ bũrĩa muntũ . . . onete bũrĩ bwa kũrigaria, bũtĩũmbĩka, kana bũrĩ bwa kũmakania.”

Profesa Crawford H. Toy wa yunivasĩtĩ ya Harvard, Amerika, kinya we naaugĩre gacuncĩ kau gatĩarĩragia ũntũ bũtĩagĩrĩte. Aaugĩre: “Birĩa aataarĩĩragia nĩ mantũ jarĩa jaamũrigaragia.”

Kwou, nĩ ũntũ bũkwagĩra kuuga atĩ biugo bia Njuno 30:18, 19 birĩtaarĩĩria ũntũ bwa kũrigarania, na bũrĩa tũtĩũmba gũciũra. O ta mwandĩki ũu wa Bibiria, nĩtũrigaragua nĩ ũrĩa ndiũ ĩburũũkaga ĩgũrũ mono, ũrĩa njoka ĩtagĩĩra maigene na ĩtĩna magũrũ, na ũrĩa meri ĩndito ĩtagĩĩra ĩgũrũ rĩa rũũjĩ, na ũrĩa muntũ mũrũme ũmwĩthĩ na mwarĩ bendanaga na bagatũũrania amwe bagwĩrĩtue.