MACHI 2-8, 2026
RWĨMBO NA. 97 Uhai Unategemea Neno la Mungu
Ĩta na Mbere Kwiingia ‘Ũbatu Bwaku bwa Gĩkĩrundu’
ĨANDĨKO RĨA MWAKA JWA 2026: ‘Kũgwĩrua nĩ kĩrĩ barĩa baciũkagĩrwa nĩ ũbatu bwao bwa gĩkĩrundu.’—MAT. 5:3.
JARĨA TŨKAIRITANA
Tũkoona nĩatĩa tũbuĩrĩte kũthithia nĩkenda twĩtĩkĩĩria Jehova eta na mbere gũtũtongeeria, na twĩthĩrwa na kũgwĩrua kwa mma.
1. Nĩ into birĩkũ antũ babataraga nĩkenda beeta na mbere gũtũũra? (Mathayo 5:3)
JEHOVA naijĩ birĩa antũ babataraga nĩkenda beeta na mbere gũtũũra. Ngerekano, nĩtũbataraga biakũrĩa, nguũ, na gũntũ gũkwega kwa gũkara. Tũkeeja kwaga into bibi no tũkue kana ũtũũro bwetũ bũkethĩrwa bũrĩ bũbũũmũ mono. O amwe na gũtũũmba tũrĩ na ũbatu bwa into biu, Jehova kinya natũũmbĩte tũrĩna na ũbatu bwa gĩkĩrundu. (Thoma Mathayo 5:3.) Nĩkenda twĩthĩrwa na kũgwĩrua kwa mma, no mwanka tũciũkĩrwe tũrĩna ũbatu bũu na twĩte na mbere kũbwiingia.
2. Taarĩĩria gũciũkĩrwa nĩ ‘ũbatu bwa gĩkĩrundu’ nĩ kuuga atĩa.
2 ‘Gũciũkĩrwa’ nĩ ‘ũbatu bwa gĩkĩrundu’ nĩ kuuga atĩa? Magiita jamwe biugo biu nĩbitaũragwa “barĩa baciũkagĩrwa barĩna ũbatu bwa gĩkĩrundu.” Thũgaanĩria muntũ ũrĩ nkĩa mono. Nguũ ciawe itambũkangi na akarĩ nthĩ akĩrombaga ũtethio. Atĩna inya tontũ bwa kwaga biakũrĩa, na atindaga riũene na akaraara ome na tontũ antũ batĩendaga gũkaranĩria nawe, naigagua anogi na atĩna kũgwĩrua. Nĩkenda ũtũũro bwawe bwagĩra namenyaga atĩ nakũbatara ũtethio. Na njĩra o ta ĩu, barĩa baciũkagĩrwa nĩ ũbatu bwao bwa gĩkĩrundu nĩbamenyaga atĩ nĩbabataraga ũtethio bwa Mũrungu ũtũũrone bwao. Nĩbaciũmagia kũgunĩka kuumania na biakũrĩa bia gĩkĩrundu birĩa Jehova aejaga barĩa bamwendete.
3. Nĩmbi tũkairitana kĩthomone gĩkĩ?
3 Kĩthomone gĩkĩ tũkaarĩĩria, mantũ jarĩa tũũmba kwiritana kuumania na mũka Mũkanani ũrĩa weerencere Jesũ amũtethia. Tũkairitana nkuma ithatũ irĩa barĩa bagũciũkĩrwa nĩ ũbatu bwao bwa gĩkĩrundu babuĩrĩte kwĩthĩrwa nacio. Kinya tũkaarĩĩria ngerekano ya mũtũmwa Petero, Paũlũ, na Mũnene Daudi, barĩa beerĩgĩĩrĩre Jehova abatethia.
NĨTŨKŨBATARA WINYIIA, KŨROMBA TŨTĨGŨTIGA, NA WĨTĨKIO
4. Nĩmbi mwekũrũ Mũkanani eendaga Jesũ amũthithĩria?
4 Ntukũ ĩmwe, mwekũrũ wa kuuma ntũũra ya Tiro na Sidoni neejĩre kĩrĩ Jesũ. Mwari waawe naathangĩkagua nĩ irundu bithũũku. (Mat. 15:21-28) Mwekũrũ ũu naaturĩrie maru na arereenca Jesũ amũtethie. Noonanĩrie nkuma injega rĩrĩa aaranagĩria na Jesũ. Gatũcũnkũũne nkuma imwe irĩa oonanĩrie.
5. Nĩ nkuma irĩkũ mwekũrũ Mũkanani oonanĩrie na nĩatĩa Jesũ aathithĩrie? (Tega kinya mbica.)
5 Mwekũrũ ũu Mũkanani noonanĩrie winyiia bwa mma. Nĩkĩ tũkuuga ũu? Aatathũũrĩre Jesũ arĩkũmũringithania na kurũ irĩa antũ barĩa bataarĩ Ayahudi bethagĩrwa nacio kwao. Nĩatĩa ũrĩngĩthithia Jesũ arĩngĩkwĩra ũu? Rĩ, ũrĩngĩthũũra na ũgatiga kũmũromba ũtethio? Mwekũrũ Mũkanani aatathithĩrie ũu. Noonanĩrie winyiia na kinya areeta na mbere kũromba atĩgũtiga. Ataunĩkĩre nkoro. Nĩmbi biamũtetherie? Nĩ wĩtĩkio bwawe kĩrĩ Jesũ. Wĩtĩkio bũu bwawe bũũriku, nĩbwatũmĩre Jesũ amũtethia. Kinya kethĩra naamwĩrĩre atĩ aatũmi kĩrĩ Aisraeli akĩ, neengĩre irundu bithũũku birĩa biathangĩkagia mwarĩ waawe.
Mwekũrũ Mũkanani naabataraga winyiia, gwĩta na mbere kũromba atĩgũtiga, na wĩtĩkio nĩkenda aewa ũtethio bũrĩa eendaga (Tega gĩcuncĩ kĩa 5)
6. Nĩmbi tũkwiritana kuumania na mwekũrũ Mũkanani?
6 Nĩkenda twiingia ũbatu bwetũ bwa gĩkĩrundu no mwanka twĩthĩrwe na nkuma o ta iu. No mwanka twonanie winyiia, wĩtĩkio bũũriku, na twĩte na mbere kũromba tũtĩgũtiga. Winyiia nĩbũtethagia muntũ gwĩta na mbere kũromba Mũrungu atĩgũtiga. Kinya no mwanka twĩthĩrwe na wĩtĩkio bũũriku kĩrĩ Jesũ na twĩrĩgĩĩre barĩa agũtumĩra gũtũtongeeria. (Mat. 24:45-47) Jehova na Jesũ nĩbagwĩragua gũtethia barĩa bonanagia nkuma iu kwiingia ũbatu bwao bwa gĩkĩrundu. (Teganĩria na Jakubu 1:5-7.) Nandĩ gatũcũnkũũne ũrĩa Jehova atũtongagĩĩria na ũrĩa atwejaga birĩa tũkũbatara nĩkenda twĩthĩrwa na kũgwĩrua. Kinya tũkoona ũrĩa tũũmba kwĩgerekania na mũtũmwa Paũlũ, Petero, na Mũnene Daudi.
ĨTA NA MBERE KWIRERA GĨKĨRUNDU O TA PETERO
7. Nĩ ngũgĩ ĩrĩkũ Petero aaerwe, ĩndĩ nĩ ũntũ bũrĩkũ aabataraga kũthithia? Taarĩĩria. (Ahibirania 5:14–6:1)
7 Thũgaanĩria ngerekano ya mũtũmwa Petero. Naarĩ ũmwe wa Ayahudi ba mbere gũciũkĩrwa atĩ Jesũ nĩwe waarĩ Mesiya ũrĩa Jehova arĩngĩtumĩra kũrera antũ baawe na kũbaritana “nteto cia mwoyo jwa kenya na kenya.” (Joh. 6:66-68) Mbere Jesũ aitia ĩgũrũ, neerĩre Petero ũjũ: ‘Mathĩra ngʼondu ciakwa.’ (Joh. 21:17) Petero naathithĩrie ngũgĩ ĩu na njĩra ya wĩtĩkĩkua na Jehova kinya aramũtumĩra kwandĩka barũga ijĩrĩ irĩa ciaere gĩcuncĩ kĩa Bibiria. Amwe nou, no aabataraga gwĩta na mbere kwirera gĩkĩrundu. Ngerekano, naathomaga na aakairitana barũga irĩa mũtũmwa Paũlũ aandĩkĩte. Kinya naagwetere atĩ mantũ jamwe jarĩa Paũlũ aandĩkĩte ‘nĩ jaarĩ jamarito gũciũkĩrwa nĩjo na mpwĩ.’ (2 Pet. 3:15, 16) Ĩndĩ no eetĩre na mbere kwiritana arĩna wĩtĩkio atĩ Jehova akamũtethia gũciũkĩrwa, na kinya gũtumĩra ‘biakũrĩa bibiũmũ’ birĩa Paũlũ aatumĩri nĩ Mũrungu kwandĩka barũgene iu.—Thoma Ahibirania 5:14–6:1.
8. Nĩatĩa Petero aathithĩrie akwewa ũtongeeria bũbwerũ nĩ Jehova?
8 Tontũ Petero naarĩ na wĩtĩkio bũũriku naathĩkĩĩre mwerekera jwa Jehova. Ngerekano rĩrĩa aarĩ Jopa, noonerue kĩoneki na Mũraĩka wa Mũrungu aramwĩra athĩnje na arĩe nyomoo irĩa itatheri kũringana na watho bwa Musa. Kĩrĩ Ayahudi, mwerekera jũu nĩ jwarĩ jwa kũmakania mono. Mwambĩrione, Petero naacokerie arauga: ‘Arĩ, tĩu Mwathani: nĩkwĩthĩrwa ntarĩa kaĩrĩ gĩntũ gĩtĩ gĩkĩtheru kana gĩntũ kĩrĩ na mũgiro.’ Ĩndĩ neerĩrwe ũjũ: ‘Gĩntũ kĩrĩa kĩtheretue nĩ Mũrungu, ũkorouga kĩrĩ na mũgiro.’ (Atum. 10:9-15) Petero naathĩkĩre na aragarũra mwonere jwawe. Nĩkĩ tũkuuga ũu? Nyuma ya kĩoneki kĩu, antũ arũme bathatũ barĩa baatũmi nĩ Korinelio nĩbaakinyĩre na baramũromba eetanie nabo nĩkenda aaranĩria nawe. Kĩwĩthĩre, Petero atĩngĩĩtĩkĩĩria gũtonya nyomba ya muntũ ũtĩ Mũyahudi. Gĩtũmi nĩ tontũ Ayahudi boonaga antũ ba mĩgongo ĩngĩ barĩ antũ batĩtheri. (Atum. 10:28, 29) Ĩndĩ o rĩo Petero neetĩkĩrĩrie ũtongeeria bũu bwerũ Jehova aamwete gũkũrũkĩĩra kĩoneki. (Nju. 4:18) Neetĩre aratũmĩĩrĩria Korinelio na antũ ba nyomba yaawe na aragwĩrĩrua kwona bagĩtĩkĩĩria ũmma, baraewa kĩrundu gĩkĩtheru, na barabatithua.—Atum. 10:44-48.
9. Nĩatĩa tũũmba kũgunĩka twairitana mantũ jarĩa jomba kwĩthĩrwa jarĩ jamoomũ gũciũkĩrwa nĩjo?
9 O ta Petero, nĩtũbuĩrĩte kũmenyeria kũnyua ĩria, tarĩo mma cia mũsingi cia Rũteto rwa Mũrungu. Kinya nĩtũbuĩrĩte kwĩthĩrwa na wĩru bwa kũrĩa biakũrĩa bibiũmũ, tabio ũmma bũrĩa twonaga bũrĩ bũbũũmũ gũciũkĩrwa nĩbu. Nĩtũkũbatara gũcwa ĩgiita na kwĩthĩrwa na wendi bwa gũcũnkũũna Rũteto rwa Mũrungu kĩndeene, na gũciũmia gwetũ gũtĩthĩrwa kũrĩ kwa ũtheri. Nĩkĩ? Tũkagunĩka na njĩra ta ijĩrĩ ũu: Ya mbere, tũkairitana mantũ jegie Jehova jarĩa jagatũma tũmwenda na tũmũtĩĩa nkũrũki; na ya ijĩrĩ, tũkethĩrwa na wendi nkũrũki bwa kwĩra bangĩ mantũ ja kũrigarania jamwegie. (Aro. 11:33; Kug. 4:11) Ngerekano ya Petero nĩgũtũritana ũntũ bũngĩ: Rĩrĩa ũritani bũnna bwathithĩrua ũgarũrũku, nĩtũbuĩrĩte kũbwĩtĩkĩĩria na mpwĩ mathũgaanione na mathithione jeetũ. Twathithia ũu tũgeeta na mbere kwirera gĩkĩrundu na tũgatumĩkĩra Jehova tũrĩ etĩkua.
KŨRIA NKUMA IRĨA IGWĨRAGIA MŨRUNGU O TA PAŨLŨ
10. Kũringana na Akolosai 3:8-10 nĩatĩa tũkũbatara kũthithia nĩkenda tũgwĩria Jehova?
10 Kethĩra nĩtũkwenda kwĩthĩrwa na kũgwĩrua na tũreekeria Jehova atũtongeeria, nĩtũkũbatara kwĩthĩrwa na nkuma irĩa imũgwĩragia. Natwonagia ũrĩa tũũmba gwikũria. (Thoma Akolosai 3:8-10.) Nĩtũkũbatara ĩgiita na kwiritanĩria nĩkenda tũkũria nkuma iu. Thũgaanĩria ngerekano ya mũtũmwa Paũlũ. Kuuma arĩ ũmwĩthĩ naairitanagĩria mono nĩkenda etĩkĩrwa nĩ Mũrungu. (Gal. 1:14; Afl. 3:4, 5) Ĩndĩ aatamenyaga njĩra irĩa njega ya kũthathayia Mũrungu. Naarĩ na nkuma inthũũku na naathithagĩria antũ mantũ jatĩagĩrĩte tontũ aatamenyaga moritani ja Kristũ na naarĩ mwikumia.—1 Tim. 1:13.
11. Nĩ ũgarũrũku bũrĩkũ Paũlũ aabataraga kũthithia? Taarĩĩria.
11 Mbere Paũlũ aa Mũkristũ, naarĩ muntũ wa mũthũũro mono. Iuku rĩa Mathithio nĩrĩonanagia ũrĩa aarĩ na mũthũũro kwerekera aritwa ba Jesũ akĩendaga kũboraga. (Atum. 9:1) Arĩkwaa Mũkristũ, naairitanĩĩrie mono na aromba gũtigana na nkuma ĩu nthũũku. (Aef. 4:22, 31) Ĩndĩ rĩrĩa baakararanĩrie na Baranaba, Paũlũ naathũũrĩre mono. (Atum. 15:37-39) Ĩgiita rĩu, aatonanĩrie nkuma irĩa Mũrungu eendaga ethĩrwa nacio. Amwe nou, aataunĩkĩre nkoro, ĩndĩ neetĩre na mbere kũrwa na gũtaũkĩrwa kwawe, nĩkenda etĩkĩrĩka kĩrĩ Jehova.—1 Ako. 9:27.
12. Nĩmbi biatethererie Paũlũ gũtigana na mĩkarie ĩmĩthũũku?
12 Paũlũ noombĩre gũtigana na mĩkarie ĩmĩthũũku na arethĩrwa na mĩkarie ĩmĩega tontũ neerĩgĩĩre Jehova. (Afl. 4:13) O ta Petero, Paũlũ ‘neerĩgĩĩrĩre inya ĩrĩa Mũrungu aejanaga.’ (1 Pet. 4:11) Amwe nou magiita jamwe Paũlũ naathithagia maatia na akaunĩka nkoro. Ĩndĩ rĩrĩa bũu bwakarĩkaga, neetaga na mbere kũthũgaanĩria mantũ jameega jarĩa Jehova aamũthithĩrĩtie, na ageeta na mbere gũciũmia.—Aro. 7:21-25.
13. Nĩatĩa tũũmba kwigerekania na Paũlũ?
13 Kinya kethĩra nĩtũtumĩkĩrĩte Jehova mĩaka ĩmiingĩ, nĩtũkũbatara gwĩta na mbere gũkũria nkuma irĩa imũgwĩragia. Na kinya tũkeeja kwĩthĩrwa na nkuma itĩagĩrĩte ta kũthũũra na mpwĩ kana kwarĩria muntũ bũthũũku, tũtĩbuĩrĩte kuunĩka nkoro tũkĩonaga teka tũtĩũmba kũgwĩria Jehova. Mwanya nou, nĩtũbuĩrĩte gwĩta na mbere kũthingatĩĩra mworoto jwetũ jwa kũgarũra njĩra yeetũ ya kũthũgaania na ya kũthithia mantũ. (Aro. 12:1, 2; Aef. 4:24) Amwe nou, no mwanka tũriikane ũntũ bũbũ bwa gĩtũmi: Kethĩra nĩtũkwenda gwĩta na mbere kwagĩrithia nkuma cietũ, nĩtũbuĩrĩte gwĩtĩkĩĩria Jehova atũritana na tũciũmie kũmũmenya bwega.
KARA ŨKARIENE BWA JEHOVA O TA DAUDI
14-15. Nĩ na njĩra ĩrĩkũ Jehova aejaga antũ baawe ũkaria bwa gĩkĩrundu? (Zaburi 27:5) (Tega kinya karatacine ka mbere.)
14 Nĩkenda twĩthĩrwa na kũgwĩrua kwa mma kinya nĩtũkũbatara ũkaria bwa Jehova. Ũu nĩ kuuga atĩa, na nĩatĩa tũũmba kũthithia nĩkenda tũkara ũkariene bwawe?
15 Mũnene Daudi naarĩ na mma atĩ Jehova arĩngĩmũtethia rĩrĩa aakũrũkagĩĩra mantũ jamoomũ. (Thoma Zaburi 27:5.) Nĩatĩa Jehova akaragia antũ baawe ntukũne cietũ? Natũkaragia kuumania na gĩntũ kinya kĩrĩkũ kĩrĩa kĩũmba kũthũũkia ngwatanĩro yeetũ amwe nawe. Eranĩte atĩ gũtĩ ĩthaga rĩkathithua kũberekera rĩkorombana. (Zb. 34:7; Isa. 54:17) Kinya kethĩra Shaitani, irundu bithũũku, na antũ barĩa bamũgwataga mbaru barĩ na inya, Jehova nĩwe ũrĩ na inya nkũrũki yaao. Jehova agatũriũkia kinya bakeeja gũtũũraga. (1 Ako. 15:55-57; Kug. 21:3, 4) Agatũtethia kũũmĩĩria mĩthangĩko ĩrĩa tũgũkũrũkĩĩra, nĩkenda tũtĩgatige kũmũtumĩkĩra. (Nju. 12:25; Mat. 6:27-29) Natweete ataana na aarĩ ba baaba barĩa batwigĩkaga na kinya akũrũ ba kĩũthũrano barĩa batũrĩĩthagia gĩkĩrundu. (Isa. 32:1, 2) Rĩrĩa tweta mĩcemanione, nĩtwiritanaga njĩra mwanya mwanya, irĩa tũũmba kũthingatĩĩra nĩkenda tũgunĩka kuumania na ũkaria bwa Jehova.—Ahi. 10:24, 25.
Mwarĩ wa baaba agĩcwaga ũtethio bwa gĩkĩrundu na njĩra ya gwĩta mĩcemanione amwe na ataana na aarĩ ba baaba (Tega gĩcuncĩ kĩa 14-15)
16. Nĩatĩa Jehova aakarĩrie Daudi?
16 Rĩrĩa Daudi aathĩkagĩra Jehova, naamũkaragia na njĩra ya kũmũtethia gũtua matua jameega na akethĩrwa na kũgwĩrua. (Teganĩĩria na Njuno 5:1, 2.) Mwanya nou, rĩrĩa aaregaga kwathĩka, Jehova aatamũkaragia kuumania na maumĩĩra jamathũũku ja matua jaawe. (2 Sam. 12:9, 10) Rĩngĩ, naathangĩkaga tontũ bwa kũthithĩrua na njĩra ĩtĩagĩrĩte nĩ bangĩ. Magiita ta jau, neeraga Jehova jarĩa jaarĩ nkorone yaawe gũkũrũkĩĩra maromba, na Jehova naamũboragĩria na akamũrikithĩria atĩ naamwendete mono na arĩngĩ mũmenyeera.—Zb. 23:1-6.
17. Nĩatĩa tũũmba kwigerekania na Daudi?
17 Twomba kwigerekania na Daudi na njĩra ya gũcwa ũtaaro bwa Jehova rĩrĩa tũgũtua matua. Kinya nĩtũciũkagĩrwa atĩ magiita jamwe twomba kũgwatwa nĩ mantũ jamoomũ tontũ bwa matua jeetũ jamathũũku, na tĩ tontũ Jehova atĩtũkarĩtie. (Gal. 6:7, 8) Kinya rĩrĩa tũkũthangĩka tontũ bwa mantũ jangĩ, nĩtũbuĩrĩte kwĩra Jehova jarĩa jarĩ nkorone, tũrĩ na mma agakaria nkoro cietũ na mathũgaanio jeetũ.—Afl. 4:6, 7.
ĨTA NA MBERE KWIINGIA ŨBATU BWAKU BWA GĨKĨRUNDU
18. Nĩ mantũ jarĩkũ jamoomũ tũkũrũkagĩĩra na nĩatĩa tũũmba gwĩta na mbere kwiingia ũbatu bwetũ bwa gĩkĩrundu? (Tega kinya mbica.)
18 Ĩandĩko rĩetũ rĩa mwaka jwa 2026 rĩriuga: “Kũgwĩrua nĩ kĩrĩ barĩa baciũkagĩrwa nĩ ũbatu bwao bwa gĩkĩrundu.” Ĩandĩko rĩu nĩ rĩa gĩtũmi mono ntukũne cietũ. Nĩkĩ? Tontũ tũthiũrũki nĩ antũ babaingĩ batĩna kũgwĩrua barĩa bageragia kwiingia mobatu jaao ja gĩkĩrundu gũkũrũkĩĩra ndini cia ũrongo na mooritani ja antũ, na batĩĩrĩgagĩĩra Mũrungu na ũtongeeria bwawe. Nĩtũbuĩrĩte gũciebania na mwerekera jwao. Nĩatĩa tũũmba kũthithia ũu? Nĩ na njĩra ya kũrĩa biakũrĩa bia gĩkĩrundu birĩa Jehova atwejaga, gwĩta na mbere gũkũria nkuma irĩa imũgwĩragia, kũmwathĩkĩĩra, na gwĩtĩkĩĩria atũkaria.
Nĩtũkũbatara gwĩta na mbere kwiingia ũbatu bwetũ bwa gĩkĩrundu, gũkũria nkuma irĩa imũgwĩragia, na kũmũrekeeria atũkaria (Tega gĩcuncĩ kĩa 18)a
RWĨMBO NA. 162 Ũbatu Bwakwa bwa Kũmenya Mũrungu
a GŨTAARĨĨRIA MBICA: Mwarĩ wa baaba o ũu akiireraga gĩkĩrundu na njĩra ya kũthoma ngacĩti ya Kĩrĩngo kĩa Mũkaria, agĩtethagia bangĩ nĩkenda agwĩria Jehova, na akĩthithagĩrua ndiũnga ya ũrĩĩthi nĩ akũrũ ba kĩũthũrano na njĩra ya wendo.