Nĩ Cukuru Irĩkũ Irĩo cia Kũritana Mapainia?

Kĩthoomo gĩa kĩtheokracĩ kĩĩthĩrĩtwe kĩrĩ kĩmenyithania gĩa Akũũjĩ ba Jehova mĩaka ĩmiingĩ. Ũritani bwa mwanya nĩ bwejagwa barĩa bairitĩrĩte ĩgiita rĩonthe ngũgĩĩne ya gũtũmĩĩria Ũnene nĩkenda ‘bojuragia’ ũtungatĩri bwao bwega.—2 Timotheo 4:5.

Cukuru ya Ũtungatĩri ya Mapainia. Mũthiene jwa mwaka jũmwe, painia wa wĩthĩre naejagwa kaanya gwĩta cukuru ya ntukũ itantatũ, ĩrĩa yũũmba kũthithĩrua Nyomba ya Ũnene ĩrĩa ĩrĩ akuĩ. Mworoto jwayo nĩ gũteetheria painia gũkuĩĩria Jehova, aagĩrithia ũtea bwawe mantũne jonthe ja ũtungatĩri, na eeta na mbere arĩ mwĩtĩkua ũtungatĩrine.

Cukuru ya Atũmĩĩria ba Ũnene. Ĩjĩ nĩ cukuru ya mĩeri ĩĩrĩ ĩthithĩtue ya kũritana mapainia barĩa bamenyeretie ũpainia na bakwenda gũtiga nja ciao na kũthamĩra icigo birĩa birĩ na ũbatu. Baugaga ũjũ batĩkũthaa, “Ndi aja, ntuma” bakiigerekanagia na Jesũ Kristũ, Mũtũmĩĩria ũrĩa mũnene wanatũũra nthĩgũrũne. (Isaya 6:8; Johana 7:29) Gwĩta kũraaja na nja kwomba kwenda muntũ ambia ũtũũro bũtĩ na mantũ jamaingĩ. Wĩĩthĩre, rĩera, na biakũria biomba kwĩthĩrwa birĩ mwanya buru na birĩa muntũ aamenyeretie kwao. Kwomba kinya kwendekana muntũ airitana mũgaambo mũgeni. Cukuru ĩjĩ nĩteethagĩĩria ataana na aarĩ ba baaba barĩa batĩgũreene kana bagũrwa, na barĩa bagũreene ba mĩaka 23 gwĩta 65, gũkũria nkuma cia gĩkĩrundu irĩa bakũbatara ngũgĩĩne yao, na ũtea bũrĩa bũkaboombithia gũtumĩrwa bwega nkũrũki nĩ Jehova na ũthuranĩri bwawe.

Cukuru ya Bibiria ya Gileadi. Kĩrĩ Kĩhibirania kiugo “Gileadi” kĩonanagia “ũkũũjĩ bũbwingĩ.” Kuuma Gileadi ĩrĩkwambia mwaka jwa 1943, nkũrũki ya aritwa 8,000 kuuma cukuru ĩu nĩbatũmĩtwe barĩ amĩsonarĩ kwejana ũkũũjĩ “mwanka ituri bionthe bia nthiguru” na kwĩthĩrĩtwe na mpumi injega mono. (Mathithio 13:47) Rĩrĩa amĩsonarĩ baakinyĩre Peru rĩa mbere, gũtaarĩ na biũthũrano nthĩ ĩu. Nandĩ kũrĩ na biũthũrano nkũrũki ya 1,000. Rĩrĩa amĩsonarĩ baambĩrĩĩrie gũtũmĩĩria Japani, Akũũjĩ ba Jehova bataakinyi antũ ĩkũmi nthĩ ĩu. Nandĩ bakinyĩte nkũrũki ya 200,000. Ũritani bwa Gileadi bwa mĩeri ĩtano nĩ amwe na kwiritana Rũteto rwa Mũrungu kĩndeene. Barĩa bagũtumĩka ta mapainia ba mwanya, barĩa barĩ obicine cia ndwang’i, kana ngũgĩĩne ya kũthiũrũnka, nĩbetagwa cukuru ĩjĩ kũritanwa bwega nkũrũki kenda bomba gũteetheria ngũgĩ ya gũtũmĩĩria nthĩgũrũne yonthe, ĩrika na ĩgĩta inya.

• Mworoto jwa Cukuru ya Ũtungatĩri ya Mapainia nĩ jũrĩkũ?

• Nĩ baaũ bomba gwĩtwa Cukuru ya Atũmĩĩria ba Ũnene?