Cuma ca seho manene citukangula mu kuyoya kwetu cinapu kulikundika kuli Yehova na kumulemesela hamo na bandolome na bandokazi betu. Ebi bikebyo byatonda Yehova ngwendi tubaboshe tulinge. Mwafwa bika? Mwafwa Yehova atonda ngwendi banu balikute nendi busamba bwa kukanyama na kukalikuwa kuyoya myaka yoshe. (Detro 30:19, 20; Gala 6:7, 8) Nameme ngoco, Yehova kesi kusindiya banu bamulemese. Atonda ngwendi munu na munu alyangwile kumupangela. Ngeci, bika bibanapande kulinga bakulunu ba cikungulukilo nga muka-Kristu nalingi bubi bwakama? Nga shendi kutenguluka, co banapande kumutundisa mu cikungulukilo. (1 Kori 5:13) Nameme nga munu uje nalingi bubi bwakama banamutundisa mu cikungulukilo, Yehova atonda ngwendi uje munu atenguluke na kwiluka kuli ikeye. Ebi bikebyo byanabwahesela ndando ya kupatula, mangana ase kukonekela baje banalingi bubi bwakama. Yehova Njambi yetu wa cizemo, ali na kulanya banu boshe baje banalingi bubi batenguluke na kwiluka kuli ikeye.—Zaka 1:3; Loma 2:4; Jems 4:8. w24.08 14 ¶1-2

Ha simbu yakele na kusoneka kapositolo Iwano ou mukanda, kwakele banu bamo baje bakele na kulongesa biñanda bya makuli na kunena kulyangununa mu cikungulukilo. Nameme ngoco kwakele bamo baje batwaleleleho “kwenda mu busunga.” Bononokele Yehova, co bakele na “kwenda mu kulitombola na mashiko” endi. (2 Iwa 4, 6) Aba baka-Kristu bazibisile Yehova na Iwano kubwaha ku mbunge. (Prov 27:11) Bika bitulilongesako? Nga tupwa ba kulongwa kuli Yehova, co tupwa ba kubwahelela na kulingisa bakwetu bapwe ba kubwahelela. (1 Iwa 5:3) Cakumwenako, tubwahelela manene nga tuzibuka ngwetu tuli na kuzibisa Yehova kubwaha ku mbunge. Yehova akabwahelela mwakatumono tuseza futisi ya kaye na kwononoka mashiko endi. Tungelo nabo bakabwahelela. (Luka 15:10) Netu tukabwahelela mutukamono bakwetu batwalelelaho kupwa ba kulongwa kuli Yehova. (2 Tesa 1:4) Ngeci mukakanyonga kaye ka Satana tukabwahelela manene mwafwa twazibuka ngwetu twatwaleleleleho kupwa ba kulongwa kuli Yehova. w24.11 12 ¶17-18

Munapande kuzibuka munu ha simbu ya kupwa hali simbu kanda mumuleke ngweni mwamushaka? Nga muzambwila kuleka munu biyongola byeni, asa kumimona ngwe kumwesi kusinganyekesesa mwamubwa simbu kanda mulinge byuma. (Prov 29:20) Co lalo nga mwishwala manene, maneneni nga owo munu nananguka biyongola byeni, nasa kumimona kupwa munu uje akakwata-kwata ku masinde kulinga byuma bya seho. (Ekele 11:4) Anukeni ngweni simbu kanda musimutwiye na munu imushaka kulyambata nendi, kumwapandele kusinganyeka ngweni kubanga mulyambate bene nendi. Oloni munapande kulibwahesela kukobela mu bulo na kumona ngweni munu imushaka kulyambata nendi napande. Batico nga mwananguka ngweni munu umo ashaka kumizibuka mwamubwa? Nga kumushaka kukala nendi mu busamba, mweseni ngoco mu bilinga byeni. Kumulingi bwino nga mulingisa munu asinganyeke ngwendi hamo mukala mu busamba, okuni yeni kumwayongwele ngoco.—Efeso 4:25. w24.05 22-23 ¶9-10