Hachisatu, April 15
Keñañanenu.—Yow. 15:12.
Antu jaYehova akeña kudikwasha wumu namukwawu. (2 Kor. 8:4) Hela chochu, mpinji jikwawu chakeñekaña kwikala ahamuka hakwila twili mwenimu. Chakutalilahu, neyi kudi njita akulumpi muyipompelu elukaña nawu amanakwawu niahela anakukeñeka kuyikolesha, kuyikwasha, nawa hadaha muyuma yakuspiritu hela yakumujimba. Muloña wakukeña anyikoku, akulumpi ashaña wumi wawu muwubanji kulonda ayilili yuma yinakukeñawu. Mumpinji jamuchidiwu, chalema nankashi kutwalekahu kwikala anuñañana. Londelenu wunlomboli wunakufuma kukasanji kamutayi kadi mwituña denu. (Heb. 13:17) Mumpinji-mumpinji, akulumpi atela kuhitulukaña muntanjikilu yashawu kutalisha hachakudiloñeshela chadimu nawubanji wadimwekenaña, kushilahu niwunlomboli wutwatambwilaña mukuloñesha wahosha hachitwatela kwila neyi kunamwekani wubanji. (1 Kor. 14:33, 40) Ikalenu ahamuka ilaña ababala. (Yish. 22:3) Toñojokenuhu henohu kanda mwili chuma. Zatenu hakumina ñovu jenu kulonda mudikiñi. Mushindamenenu Yehova. Nateli kuyikwasha kulonda mukwashi amanakwenu kwikala akiñewa. w24.07 4 ¶8; 5 ¶11
Hachiwana, April 16
Hinadiña muyihuñu namutambikili Yehova, . . . nawa kudila kwami kwakukeña nami ankwashi kwashikili kumatu indi.—Mas. 18:6.
Mwanta Davidi wamwilukili Yehova nawa wamushindameneni. Chamukumpishileñawu kudi ayilumbu jindi, kushilahu niMwanta Sawulu, Davidi walombeli kudi Yehova kulonda amukwashi. Chelili Nzambi aakuli kulomba kwindi nawa amwamwini, Davidi wahosheli nindi: “Yehova wamumi!” (Mas. 18:46) Chahosheliyi awa mazu, Davidi watalishili hohu wanyi mukwila nindi Nzambi wekala kwoku. Davidi wakonkomweneneña nindi Yehova hiNzambi walala wakwashaña ambuñindi mpinji yejima. Mwamweni, yuma yahitilimu Davidi yamukwashili kwiluka nindi Nzambi yindi wadiña wamumi, nawa kukuhwelela muniyi njila kwamukwashili kwikala cheñi namuchima wakufwila kumukalakela Yehova nikumushimeka. (Mas. 18:28, 29, 49) Neyi tukuhwelela chikupu netu Yehova hiNzambi wamumi, chikutukwasha kumukalakela neyena. Tukwikalaña nañovu yakuumika kukala kutunakumona nimuchima wakufwila kutwalekahu kuzata nañovu mumudimu windi. Tukufwilaña cheñi kutwalekahu kwikala amabwambu jaYehova. w24.06 20-21 ¶3-4
Hachitanu, April 17
Bayi ayiluwañesha kudi muntu hela hantiku.—2 Tes. 2:3.
Chumanyi chitunateli kudizila kumazu ayisonekeleliyi kapostolu Pawulu aTesalonika? Neyi tutiya chuma chinambukiku nayuma yitwadizaña muBayibolu indi kwiji tutiya nsañu yakutiyisha woma, twatela kuzatisha kashinshi. Mumpinji yaNfulumendi yaSoviet Union, ayilumbu jetu ataandishili mukanda wamwekeneña neyi wafumini kukasanji keneni kamukaayi. Iwu mukanda walejeli amanakwetu amu nawu ekali nakuloñesha kwambukaku nawa kwadimena. Iwu mukanda wamwekeni neyi walala. Ilaña amanakwetu ashinshika hiyayiluwañesheliku. Elukili nawu nsañu yadiña muniwu mukanda yesekeni nansañu yayidizishileñawu. Makonu, ayilumbu jachalala mpinji jikwawu azatishaña yuma yinakutuñatuñawu katataka kulonda atuluwañeshi nikutwambula. Chatela ‘tuluwankani swayi muyitoñojoka yetu,’ twatela kudikiña etu aweni kuhitila mukumona neyi nsañu yitunatiyi hela kutaña yinesekani nansañu yalala yitweluka dehi.—2 Tes. 2:2; 1 Yow. 4:1. w24.07 12 ¶14-15