Chitwahembaña Chiwahi Matala Etu aWanta

Muhela wakansi Nicole washakamaña kuColombia wahosheli nindi “Natiyaña kuwaha chamwekanaña Itala detu daWanta, dimutwapompelaña nawamanakwetu niahela.” Komana ninenu dichimwatiyaña?

Mukaayi kejima Ayinsahu jaYehova apompelaña muMatala aWanta amavulu kwakwihi na 63,000. Munawa maluña amawahi dimutwadifukwilaña kudi Nzambi. Ilaña azataña cheñi mudimu wukwawu walema. Payiniya wampinji yejima David wakuColombia wahosheli nindi: “Matala etu aWanta akokolaña antu muchalala. Antu amavulu atuhamekeña chitwahembaña chiwahi Matala etu aWanta.” Ilaña hakwila amwekani lubanji neyi chamwekanañawu twadishañaku nakuyihemba chiwahi nikuloñesha hanakisiki. Twazataña ñahi iwu mudimu?

Chitwazataña Mudimu waKuhemba Chiwahi Matala aWanta

Amanakwetu niahela azatishaña Matala aWanta diwu enkawu mudimu wakuyihemba chiwahi, dichi amanakwetu niahela awahishaña Matala awu aWanta mpinji yejima. Nawa aloñeshaña yuma yinakisiki nikuwahisha yuma yinateli kuleta maposu.

Dipatimenti yatalaña mudimu wakutuña yaLDC yatondaña amanakwetu adizishaña amanakwetu niahela kulonda eluki chakuhemba chiwahi Matala awu aWanta. Awa amanakwetu ayinkaña mudimu wakwakamena Matala aWanta 6 kushika ku 10. Endelaña yipompelu nakuyidizisha chakuhemba chiwahi Matala awu aWanta. Chimwahita yaaka yisatu endelaña yipompelu kulonda amoni neyi kudi yuma yinakisiki Kwitala daWanta yatela kuwahishawu hela neyi kudi yuma yinateli kuleta maposu.

Amanakwetu niahela atiyaña kuwaha neyi ayendela nakuyidizisha chakuhemba chiwahi Matala awu aWanta kudi manakwetu wadizishaña. Muhela Indhumathi wakuIndia, hanyima yakuyidizisha wahosheli nindi: “Tunatiyi kuwaha chinatudizishiwu, ichi tuneluki chakuhemba chiwahi Itala detu daWanta.” Manakwetu Evans wakuKenya, niyena wahosheli nindi: “Ichi tuneluki netu hakwila tubuleña kuumba mali amavulu, twatela kuzatila hachuma chinakisiki swayi-swayi henohu kanda chisweji kukisika.”

Kwafumaña Mali Itwazatishaña

Mali itwazatishaña hachaaka akuwahisha nachu nikuloñesha yuma yinakisiki Kwitala daWanta avulaña hela kukeha kwesekeja neluña kudi odu Itala daWanta, yaaka yidinashakami niyipompelu yadizatishaña. Indi mali itwazatishaña kuwahisha nachu Matala aWanta afumaña kudi?

Mali akuwahisha nachu Matala aWanta afumaña muyawaana yimwahanaña. Manakwetu Alexander wakuKazakhstan, wahosheli nindi: “Mali amakwawu twayizatishaña kuintaneti, menji nikulanda malayiti. Amakwawu twayizatishaña kulandamu yuma yidi neyi matishu, maglovu, sopu nipenti.” Mali ashalañahu ayibombelaña kumali amudimu wamukaayi kejima kulonda akayizatishi kukwasha nachu mudimu wakuwahisha Matala aWanta mukaayi kejima.

Nyidimu Yamaneni Yakuwahisha Matala aWanta

Neyi nyidimu yakuwahisha Itala daWanta yikwiñija mali amavulu kubadika mali azatishañawu amanakwetu adi tukweji tuyedi hela tusatu, akulumpi amulejaña manakwetu wadizishaña chakuhemba chiwahi Matala aWanta. Neyi aLDC eteja kuzata owu mudimu, mali azatishañawu afumaña hayawaana yamudimu wamukaayi kejima. Muchaka chamudimu cha 2023 awahishili Matala aWanta akushika ku 8,793 nawa mali azatikili ashikili kumadolaa 76.6 miliyoni. Talenu Matala aWanta ayedi awahishiliwu

MuAngola, Itala daWanta dashakamini yaaka 15 kwafwili yuma yayivulu. Jamalayiti jejima jakisikili, mbañu jejima jelili nyaji, antuñi nawu enjili nakuyileja nawu menji anakufuma Hetala daWanta anakuya hamatala awu. Dipatimenti yatalaña mudimu wakutuña yaLDC yawahishili idi Itala daWanta azatishili mali akushika kumadola 9,285. Antuñi nawu asakililili nawa atiyili kuwaha chendeli iwu mudimu

MuPoland, Itala daWanta davwileña nawa kapeti yejima yakisikili. Dipatimenti yaLDC yetejeli kudiwahisha idi Itala daWanta nawa ashinkili hejima havwileña nikushamu kapeti yacheñi. Iwu mudimu wejima weñijili mali akushika kumadola 9,757. Chuma chachiwahi chinafumimu, hakwila idi Itala daWanta akadituñululi hakahita yaaka yayivulu.

Kuwahisha Matala aWanta Kwaletaña Kalemesha Hejina daYehova

Kuhemba chiwahi Matala aWanta mwafumaña yuma yiyedi yayiwahi, twahembaña mali nawa twaletaña kalemesha hejina daYehova. Manakwetu Shaun wakuTonga, wahosheli nindi: “Chineli Itala detu daWanta anadiwahishi, tunakudifukwila mwiluña dadiwahi nawa dawunyonji dinakuleta mpuhu nikalemesha hejina daYehova muchituñilu chetu. Ichi twatiyaña wanyi nsonyi kutambika antu kwinza nakupompa Hetala daWanta.”

Yuma Yitwatela Kwila

Wejima wetu tukweti mudimu wakuwahisha nikuhemba chiwahi matala etu akudifukwila. Manakwetu Marino wadizishaña chakuhemba Matala aWanta muAustralia, wahosheli nindi: “Wejima wetu tukweti mudimu wakuwahisha nikwakamena Matala etu aWanta. Neyi twila mwenimu, tukukwasha kuloñesha kuhemba mali akukwasha nachu akwetu anakankili.”

Manakwetu Joel wakuIndia, wakeña kuzata mudimu wakuwahisha Itala dawu daWanta. Wahosheli nindi: “Kuzatila hamu nawamanakwetu niahela kwankwashaña kufwikija chitukazataña nawamanakwetu niahela mwituña dadiha.” Muhela Nicole, ashimunawu hakusambila wahosheli nindi: “Mpinji yadiñawu amanakwetu nakuwahisha hadiña nakuvwa mutoyileti, ami nadiña nakufumisha menji, hela chakwila yami nadiña nakuloñesha wanyi, ninami nazatiluku muloña nakañesheli maposu.”

Neyi munakukeña kudihana kuwahisha Itala denu daWanta, lejenu akulumpi muchipompelu chenu. Yawaana yimwahanaña bayi neyi ayizatishaña kuwahisha hohu nachu Itala denu daWantaku ilaña ayizatishaña nikuwahisha nachu Matala aWanta amakwawu mukaayi kejima. Munateli kuhana yawaana kuzatisha yikasha yekala Mwitala daWanta hela kuzatisha donate.jw.org. Twasakililaña hayawaana yimwahanaña.