Lemeshenuña Yuma Yinafuukuli Akwenu

1-2. Muloñadi mpinji yikwawu yuma yitwafuukulaña chiyaambukilaña nayafuukulañawu amanakwetu niahela?

KUDIHU wayisompeshahu dehi muloña hohu wachuma chimwafuukwili? Mwasompeshahu dehi mukwenu mukaKristu muloña hohu wachuma chafuukwiliyi? Chakadi nikujina, etu amavulu tukwiteja netu eña kumalwihu ejima ayedi.

² Twatela wanyi kuhayama neyi mpinji yikwawu yuma yitunafuukuli yinaambuki nayinafuukuli amanakwetu niahela. Muloñadi? Muloña twekala ambuka. Muntu-himuntu wamwenaña yuma munjila yaambuka. Twatoñojokaña kwesekeja nachisemwa chetu, chisaka mutwakulila nimuloña wayuma yatumwekenahu dehi muchihandilu. Ilaña bayi twiteja kushiyashana kwayitoñojoka kuluwañeshi kuwunda nikunuñañana kutwekalaña naku muchipompeluku.—Efwe. 4:3.

3. Yumanyi yikuletesha tumusompeshi mukwetu mukaKristu kutalisha hayuma yinafuukuliyi?

³ Neyi mukwetu mukaKristu afuukula yuma yinaambuki nayitoñojoka yetu, hadaha tukukeña netu tumushinjili kulonda ahimpi munafuukuliyi indi kwiji tukutachika kuleja antu amakwawu netu nafuukuli chiwahi wanyi. Kafwampi, tunakwila mwenimu muloña tunakukeña kumukwasha. Twayikeña amanakwetu niahela nawa twakeñaña kuyilila yuma yayiwahi. (Yish. 17:17) Dichi twakeñaña wanyi netu afuukuli yuma yakaditoñeshawu kumbidi hela yikukisañana wubwambu wawu naYehova.

4-5. Chumanyi chitwatela kwila neyi mukwetu mukaKristu afuukula kwila chuma chinambuki nachuma chitwadi kwila neyi iyetu twafuukulaña?

⁴ Komana chidi hohu chiwahi kumuleja manakwetu yitoñojoka yetu neyi tunakaani munafuukuliyi? Kudi yuma yayivulu yitwatela kutoñojokahu. Chakutalilahu, neyi twiluka netu nakutoñojoka kwila chuma chikuletesha afumpi nshimbi jamuBayibolu, muloña wakumukeña, tukumukwasha kulonda ololi yitoñojoka yindi. (Yish. 27:​5, 6) Hela chochu, tukwila ñahi neyi manakwetu yafuukula kwila chuma chikubula kumuletesha afumpi nshimbi jaNzambi ilaña chinambuki nachuma chitwadi kwila neyi iyetu twafuukulaña? Ñakwilu yidi munsona hanashindameni achinu chibaaba. “[Hitwasompeshaña] hamuloña wakushiyashana kwayitoñojokaku.”—Rom. 14:1.

⁵ Hela chochu, mpinji yikwawu chinateli kutukalila kulemesha munafuukuliyi mukwetu. Muchinu chibaaba, tukuhanjeka muloña waweni chitwatela kulemeshela munafuukuliwu akwetu nichitwatela kwila mwenimu. Ilaña tusambilenu kuhanjeka hayuma yitwadifuukwilaña etu aweni yikuletesha tutachiki kusompesha amanakwetu niahela.

YUMANYI YITWATELA KUDIFUUKWILA ETU AWENI YIKULETESHA TUTACHIKI KUSOMPESHA AKWETU?

6-7. Shimunenu yakutalilahu yinashimuniwu yikuletesha tutachiki kusompesha akwetu kutalisha hayuma yinafuukuliwu.

⁶ Neyi chashimunawu dehi, kakavulu twakeñaña netu akwetu eleña yuma kwesekeja nachitunakutoñojoka muloña wankulilu yetu hela yuma yatumwekenahu dehi muchihandilu chetu. Tukutachika kutoñojoka netu akwetu niwena dichinakumonawu yuma. Ilaña diimu wanyi. Talenu iyi yakutalilahu yantesha. Chakutalilahu chatachi: Henohu kanda yadizi chalala, manakwetu amukulishili kudi atata yindi anwineña chatama walwa. Hampinji yinapompiwu nakudiila hamu, namoni akwawu akaKristu anakunwa walwa. Chinamuneñeshi nawa nayileji nindi chuma chinakwilawu chatama. Chakutalilahu chamuchiyedi: Muhela anamuuki chikatu cheneni chakatiliyi. Mukuhita kwampinji, neluki nindi kudi muhela anakwatiwu nachikatu chochimu. Iwu muhela nakukeña kukwashana, dichi nakumukanjikija ibwambu dindi nindi azatishi njila yoyimu yazatishiliwu hakumuuka, hadaha kuhitila mukumuleja yakuda yatela kulekayi indi kwiji kumuleja yitumbu yatela kuzatishayi, yakuchipateli hela yachilunda. Chakutalilahu chamuchisatu: Manakwetu wayileña mukudifukula kwakutwamba henohu kanda yadizi chalala. Wahela nankashi chadiña chihandilu chindi chakunyima. Ilaña chinatiyiyi nawu mukwawu mukaKristu wayili kuprogiramu yakufwa yekalili muchechi, natiyi kutama chikupu.a

⁷ Talenu iyi yakutalilahu yikwawu yantesha. Chakutalilahu chamuchiwana: Manakwetu wadiñaku hampinji antu amavulu yamweneñawu nawu chatelela wanyi antu awamayala kuhemba wevu hela antu awambanda kuvwala matoloshi hakupompa kwanyanya, kweneni nimumudimu wakushimwina. Hela chakwila iwu manakwetu neluki kuhimpika kutwatambwila katataka mukuloñesha kunakuhosha haniyi nsañu, natwalekihu kuleja akwawu nindi amanakwetu atela wanyi kuhemba wevu nawa nindi ahela niwena atela kuvwala madilesi neyi anakuya nakupompa hela nakushimwina. Chakutalilahu chamuchitanu: Mukulumpi weluka manakwetu wayili nakutañilahu shikola yikwawu yakumujimba nawa nkumininaku yafuma muchalala. Ichi manakwetu wakansi wekala muchipompelu mwekalayi, nafuukulihu kutañilahu shikola yikwawu yakumujimba. Iwu mukulumpi nakameni nawa nakufwila kumushinjila manakwetu wakansi nianvwali jindi nindi ahimpi munafuukuliwu.

8. (a) Chumanyi chinateli kumukojeja nvwali kutachika kwikala nayitoñojoka yakusompesha akwawu anvwali? (b) Chumanyi chinateli kumwekana neyi tutoñojokelaña amanakwetu niahela yuma yatama?

⁸ Talenu chuma chinateli kuyimwekena anvwali. Chakutalilahu chamu 6: Fwikijenu mudi nvwali, mwazataña nañovu kukulisha anyanenu “nakufumba nikukonkomwena kwaYehova.” (Efwe. 6:4) Ilaña anvwali akaKristu amakwawu anakwiteja anyanawu kwila yuma yimwabulaña kwiteja anyanenu kwila. Chakutalilahu, etejaña anyanawu kufunta hetala mukulaba, kuhema yisela yahamavidiyo mwabula madombu hela kuyilandila mafoni henohu achidi anyanya. Chikufumamu, mwanenu wukumona nindi munasweji kukalisha. Nateli kuyihula nindi: “Muloñadi chimwabulila kwikala neyi anvwali jawamabwambu jami?” Neyi chuma chamuchidiwu chimwekena, mukutachika kuyitoñojokela yuma yatama akwenu anvwali. Chalala chidi chakwila nawu chuma chinafuukuli mukwetu mukaKristu chinambuki nachitunafuukuli, chinateli kuletesha kubula kutiyaña. Chakutalilahu, tukutachika kujinoka hanzatishilu yindi yamali, kumaluña kwayañayi nakunookela indi kwiji yisela yatondañayi. Ilaña bayi twiteja yitoñojoka yetu yituleteshi kuluwañesha kunuñañana kutwekalaña naku muchipompeluku.

9. Chumanyi chitwatela kwanukaña? (Talenu nimwevulu.)

⁹ MukaKristu wumu nateli kufuukula yuma yaambuka nayinafuukuli mukwawu. Ichi hichinayi mukwila nawu wumu hakachi kawu nafuukuli chachiwahi nawa mukwawu nafuukuli chatamaku. (Rom. 14:5) Hela chakwila akaKristu ayileja “kwikala nayitoñojoka yoyimu” hampinji yinakwovwahilawu nshimbi jaYehova, ichi chatalisha wanyi mukwila nawu twatela kwikala nayitoñojoka yoyimu munsañu yejima yitwatela kudifuukwila etu aweni. (2 Kor. 13:11) Tunateli kwesekeja yuma yitwadifuukwilaña etu aweni nachitwelaña hakwila twendi nakushika kutunakuya. Kakavulu, kwekalaña njila jashiyashana jitunateli kuzatisha hakwila wejima wetu tushiki kwiluña dodimu kutunakuya. Twafuukulañahu kuzatisha njila yitunakeñi nawa yitunamoni netu diyinatupeleli. Munjila yoyimu, wejima wetu twafuukulaña yuma yaambuka, ilaña chuma chimu hohu chitwafwilaña hikumutiyisha Yehova kuwaha. Dichi, hitwasompeshaña akwetu hayuma yinadifuukwiliwuku.—Mat. 7:1; 1 Tes. 4:11.

MULOÑADI CHITWATELA KULEMESHELA YUMA YINAFUUKULIWU AKWETU?

10. Kwesekeja naYakoba 4:​12, wuswanyi wabula kutwinkawu, nawa muloñadi?

¹⁰ Bayibolu yashimuna yuma yayivulu yaleteshaña tulemesheña munafuukuli akwetu. Tuhanjekenu hayuma yantesha haniyi yuma. Tukweti wanyi wuswa wakusompesha akwetu muyuma yinateli kudifuukwilawu awenawu. (Tañenu Yakoba 4:12.) Yehova diyi Mukakuhana nshimbi nawa Nsompeshi waloña. Diyi hohu wukweti wuswa wakutuña nshimbi yitwatela kwovwahila muchihandilu chetu. Dichi amanakwetu niahela akalumbulula kudi Yehova hayuma yafuukulañawu, bayi kudi etuku. (Rom. 14:10) Hitukweti wuswa wakusompesha hela kuyitwika akwetu nyiloña hayuma yinadifuukwiliwu awenawu kushindamena hachitunakumona yuma netu dichiyatela kwikala indi kwiji hayitoñojoka yetuku.b

11. Yumanyi yitwatela hakwila kwila tuleti kunuñañana muchipompelu? (Talenu nimwevulu.)

¹¹ Yehova wakeñaña antu adifukulaña kudi yena kwikala anuñañana, bayi kwikala yowamuku. Kafwampi, Nzambi yetu watiyaña kuwaha chitwekala ashiyashana. Twamonaña chumichi muyuma yaleñayi. Chakutalilahu, ninyinu yakumakasa etu yaambuka. Nawa toñojokenu hachumichi. Hadi antu akubadika ha 8 biliyoni adi ahamaseki, kwosi antu adifwana jiika mummwekenu hela akweti yilwilu yoyimu. Yehova watuleñeli chochimu wanyi, nawa hakeñaña nindi twiikali tuhu neyi chekala akwetuku. Ilaña wakeñaña nindi twiikali anuñañana. Dichi chatela tuleki kushiyashana kwayuma yitunakufuukula kutwambuli, twazataña nañovu kuleta kuwunda. Twalemesha nankashi kunuñañana kwekalaña muchipompelu, bayi yitoñojoka yetu niyuma yitunakukeñaku.—Rom. 14:19.

CHITWATELA KULEMESHA YITOÑOJOKA YAWAKWETU

12-13. Yumanyi yitwatela kwanukaña neyi tunakutoñojoka netu kudi muntu wunafuukulihu “kukoña chuma chatama”? (AÑalija 6:​1, talenu nichikasha chinakwila nawu: “Neyi Munakutoñojoka Nenu Mukwenu Nafuukuli Chatama.”)

¹² Neyi akwetu adifuukwila yuma yinayikundami. Dihulenu nenu, ‘Komana iwu muntu nafuukulihu “kukoña chuma chatama” tahindi nafuukuli hohu munjila yaambukaku?’ Neyi nafuukulihu kukoña chuma chatama chinamuleteshi afumpi nshimbi jamuBayibolu, dihulenu nenu, ‘Komana nashikilimu kumukwasha haniyi nsañu tahindi muntu wacheñi diwatela kumukwasha, hadaha mukulumpi muchipompelu?’ Neyi munashikilimu kumukwasha, hanjekenu nindi naspiritu yakwovwaha. (Tañenu AÑalija 6:1.) Ilaña kakavulu mukuwana nawu owu muntu nafuukulihu chuma chatama wanyi, nafuukuli hohu munjila yinaambuki nachimunateli kufuukula. Neyi dichidi yuma, bayi mumujinoka hela kuhosha chatama hachuma chinafuukuliyiku. Lemeshenu wuswa wukwetiyi wakudifuukwila yomweni, nawa bayi mumusompeshaku.—Rom. 14:​2-4.

¹³ Toñojokenu hanichi chakutalilahu: Munayi nebwambu denu kwiluña kwalandishañawu yakuda. Komana mukumukanjikija nenu alandi yakuda yoyimu yimunalandi? Inehi. Mukulemesha wuswa wukwetiyi wakuditondela yomweni yakuda yinakeñiyi, muloña wukudidiila nkawindi. Nawa neyi mwadiña yena himwadi kukeña nenu ayileji nindi mulandi yakuda yoyimu yinalandiyiku. Munjila yoyimu, tukuyimwekeshela akwetu kalemesha neyi tuyileka kulonda afuukuli kwesekeja nachinakukeñawu chakadi kuyikanjikija netu afuukuli kwesekeja nayitoñojoka yetu.

14. Munateli kuleta ñahi kuwunda hampinji yimunakufuukula yuma yinayikundami? (1 AKorinda 8:​12, 13)

¹⁴ Neyi munakufuukula chuma chinayikundami. Mukuleta kunuñañana muchipompelu neyi muzata nañovu kubula kwila chuma chikuhukesha akwenu. (Tañenu 1 AKorinda 8:​12, 13.) Mpinji jikwawu munateli kwiluka nenu chuma chimunakufuukula ‘achiteja,’ dikwila nawu chatama wanyi. Ilaña chikwikala ‘chuma chachiwahi’ wanyi neyi chikuhukesha manakwenu.c (1 Kor. 10:​23, 24) Neyi dichidi yuma, chatela mukakeli hohu kuchuma chimunakukeña kufuukula, mukwila chiwahi neyi mutoñojokelañaku akwenu chikutiyawu hanochu chuma chimukufuukula. (Rom. 15:1) Komana twahosha wanyi netu akwetu atela kulemesha mutunafuukuli? Dichitwahosha. Atela kulemesha mutunafuukuli neyi chitunateli kulemesha munafuukuliwu. Ilaña twatela cheñi kwanukaña kufumba kwamuBayibolu kwekala haARoma 12:​18, kwahosha nawu: “Neyi chinatwesheki, ikalenu mukuwunda nawantu ejima kwesekeja nahanakumini ñovu jenu.” Dichi, twazataña hakumina ñovu jetu kutwalekahu kuleta kuwunda nawakwetu nikutondolwela kwila chuma chejima chikuyineñesha.

15. Akulumpi anateli kukwasha ñahi chipompelu kwikala chanuñañana? (1 AKorinda 4:6)

¹⁵ Akulumpi alemeshaña munafuukuli akwawu. Akulumpi akwashaña chipompelu kwikala chanuñañana neyi abulaña kutuñila amanakwawu niahela nshimbi hayuma yinateli kudifuukwilawu awenawu nawa atondolwelaña ‘kubadika hayuma yasonekawu’ muBayibolu. (Tañenu 1 AKorinda 4:6.) Chumichi chatalisha cheñi mukwila nawu hiyahoshaña yuma yabula kwesekana nakufumba kwashindamena haBayibolu kwekala munyikanda yetuku. Kubombelahu, neyi mukwawu mukaKristu nalombi nindi amukwashi, akulumpi ashindamenaña hohu wanyi hayuma yelukawu hampinji yinakumukwashawu. Ilaña kufumba kwawu kwashindamenaña Hezu daNzambi.—Isa. 48:​17, 18.

16. Mukulumpi wumu nateli kulemesha ñahi chuma chinafuukuli izanvu dawakulumpi dejima?

¹⁶ Mukulumpi nateli cheñi kumwekesha kalemesha neyi yalemesha munafuukuli izanvu dawakulumpi dejima. Neyi izanvu dawakulumpi dinalombi spiritu yajila, dinahituluki muwunlomboli washindamena haNsona nikuwuzatisha, nawa kudi chuma chinafuukuliwu, mukulumpi wejima watela kulemesha munafuukuli izanvu hela chakwila yitoñojoka yindi anayiteji wanyi kudi akulumpi amavulu. (Efwe. 5:17) Akulumpi atela cheñi kwikala asoñama kuhitila mukulondela wunlomboli wejima wekala muBayibolu nimunyikanda yetu chatela abombeleñamu yitoñojoka yawu. Chakutalilahu, mukulumpi hanateli hohu kuzomona mukuku wumu wamazu muchibaaba chidi munyikanda yetu kulonda yahakwiliku yitoñojoka yindi chakadi kutaña nsañu yejima yidi munochu chibaabaku.

17. Yumanyi yayiwahi yafumañamu neyi tulemeshaña munafuukuli akwetu?

¹⁷ Neyi chitunadizi, twekala ambuka chikupu. Wejima wetu muntu-himuntu wukweti yitoñojoka yashiyashana niyuma yakeñayi. Hela chochu, iku kushiyashana kwatama wanyi. Chineli wejima wetu tukweti nkulilu niyilwilu yashiyashana, chumichi chakwashaña chipompelu kwikala chanuñañana nawa chikweti ikoku. Dichi chatela twiteji iku kushiyashana kutwambuli, twazataña nañovu kuleta kuwunda. Twekalaña asoñama kulonda tubuli kuneñesha akwetu. Twalemeshaña yuma yinafuukuli akwetu kutalisha hayuma yinayikundami. Neyi twilaña mwenimu, akatukiswila hanochu chitunakuzata nañovu. Twakekalaña namuzañalu nawa anuñañana muchipompelu chetu.—Mas. 133:1; Mat. 5:9.