Toñojokenuña haKukala Kumunakuhitamu Neyi Chakeñañayi Yehova Nindi Mutoñojokeña

1-2. Chumanyi chitwatela kwila hakwila nawu tutweshi kuumika kukala kutunakuhitamu? (Talenu nimwevulu.)

KOMANA kudi yuma yatama yinakuyilawu, munakumona ikañesha dinakufumina muchisaka, indi kwiji anakuyikabisha muloña wayuma yimwakuhwelela? Munakuyekela nayikatu indi kwiji munakumona kukala kwenzaña muloña wawushinakaji? Tahindi kudi kukala kunatwalekihu kuyineñesha, hadaha muloña wakufwisha ntaña yenu indi kwiji ibwambu denu imwakeña? Neyi chinakukabakana nyikoku yaYehova yayivulu nawa yalemeshayi nankashi, hadaha chihandilu chenu ninenu “chenzala nayihuñu nichineñi.”—Mas. 90:10.

² Hakwila nawu tutweshi kuumika kukala kutunakuhitamu, twatela kutoñojoka hanoku kukala neyi chakeñañayi Yehova nindi tutoñojokeña. Chalemenadi kwila mwenimu? Muloña neyi tukañanyaña kutoñojoka chiwahi hakukala kutunakuhitamu neyi chakeñañayi Yehova nindi tutoñojokeña, hitukwiluka chuma chitwatela kwila hakwila nawu tutweshi kuumika oku kukalaku. Chumichi tunateli kuchesekeja nakwendesha motoka. Neyi hegilasi dahambidi yamotoka hadi majilu, mukutwesha kumona chiwahi wanyi yuma yidi mumukwakwa. Ilaña neyi hegilasi hosi majilu, mukwiluka kumwatela kuhitila kulonda mubuli kuhuma chuma chidi mumukwakwa. Muchinu chibaaba tukuhanjeka (1) Yehova chakeñañayi nindi tutoñojokeña hakukala kutunakuhitamu, (2) yuma yatama yikufumamu neyi tubulaña kutoñojoka chiwahi hakukala kutunakuhitamu (3) yuma yitwatela kwila neyi tunakumona kukala.

YEHOVA CHAKEÑAÑAYI NINDI TUTOÑOJOKEÑA HAKUKALA KUTUNAKUHITAMU

3. Twatela kukuhwelela kumona yumanyi hampinji yitunakushakama muyinu nshakaminu yatama?

³ Tukutwesha wanyi kutondolwela kumona kukala muyinu nshakaminu yatama. Wejima wetu tukumonaña kukala chineli twawanina wanyi nawa Satana diyi wunakuyuula akanu kaayi. Kubombelahu, chineli akanu kaayi kadi kwakwihi nakukuma, tukumonaña kukala kwakuvulu nankashi. Kukala kweniku hadaha kunateli kwikala wubanji wadimwekenaña, chidi neyi nyitentanshi, kesi nikukeha kwayakuda, hela kukala kukwawu kwaletañawu antu elaña yuma yatama. (Mat. 24:8; 2 Tim. 3:13) Neyi Yehova wafuukulahu kumanisha iku kukala kwejima chayinu mpinji, chadi kumwekana neyi nakumukwashaku Satana kuyuula akanu kaayi. Dichi, chakala hohu tunakushakama mukanu kaayi, twatela kukuhwelela kumona “kukala.”—Mukwa. 9:​12, tth.

4. Kukalanyi kukwawu kwamonañawu akaKristu?

⁴ AkaKristu amonaña kukala kukwawu. Kakavulu Yesu wayilejeleña atumbanji twindi nindi akayikabishaña muloña wayuma yakuhwelelawu. (Mat. 24:9; Yow. 16:2) Kwiluka chumichi kwakwashaña chikuhwelelu chetu kubula kuzeya neyi tuhita mulukadi lwamuchidiwu. (1 Tes. 3:​3, 4) Neyi tuumika kukala muloña wakwikala nachikuhwelelu chakola, tunateli kukuhwelela chikupu netu tuchidi kwenda munjila yaya kuwumi wahaya nyaaka. Tukumwekesha cheñi netu tunafuukulihu kudifukula kudi Yehova muloña diyi Nyuuli wamuwahi, bayi Satanaku. Makudi amu ataandishañayi Satana adi akwila nawu antu hiyamukalakelaña Nzambi muloña wakumukeñaku, ilaña muloña hohu wayuma yayinkañayi. Hakwila yamwekeshi neyi mwahoshañayi mwalala, waletaña kukala kwamaneni hadi antu jaYehova. (Yoba 1:​9-11) Yehova wukuzañalala nankashi neyi tuumika muloña wakumukeña.—Yish. 27:11.

5. Yumanyi yitunateli kudizila kunsañu yekala mumukanda waMukwakutañisha 7:​13, 14? (Talenu ninyevulu.)

⁵ Yehova weteja makabi. Yehova helaña yuma yatama hela kutweseka nayuma yatamaku. (Yak. 1:13) Hela chochu, Mwanta Solomoni wasonekeli nindi “[ifuku] dayihuñu” himudimu “waNzambi walala.” (Tañenu Mukwakutañisha 7:​13, 14.) Watalishili wanyi mukwila nindi Yehova diyi wakojejaña yuma yatama kumwekana, ilaña yamwekanaña muloña wayiteja nindi yimwekaneña. Solomoni washimwini kufumba kwakuwahi kunateli kutukwasha kwiluka chitwatela kumonaña kukala kutunakuhitamu. Chatachi, twatela kwanukaña netu chakala hohu tunakushakama mukanu kaayi kanakuyuulawu kudi Satana, mafuku amakwawu yuma yikutuwahilaña ilaña mafuku amakwawu nehi. Neyi odu ifuku dinatuwahili, twatela kumwekesha kusakilila hayuma yayiwahi yinatwililiyi Nzambi nikudimona odu ifuku netu hichawaana chinafumi kudi yena. Chamuchiyedi, Solomoni watwanukishaña nindi tunateli “kwiluka [wanyi] chuma chidi chejima [chikatumwekena],” neyi chakwila hefuku dakumadiki yuma yikatuwahila indi kwiji twakamona yihuñu. Kukala kwakubula kukuhwelela kwayishikenaña ejima, antu aloña niabula kuloña.

6. Muloñadi Yehova chatwitejelañayi kumona kukala? (AHeberu 12:​7, 11)

⁶ Neyi tumonaña kukala munjila yayiwahi, tukwiluka netu Yehova nakutudizisha kumushindamena yena, bayi etu aweniku. Yehova wamonaña neyi kudi kukala kutunakuhitamu, waneñaña neyi tunakukabakana nawa mpinji yejima wukutukwashaña. Hela neyi yatwiteja kuhita “muchinekineki chamwidima wasweja,” watwalekañahu kutulombola, watulejaña hatooka chatukeñayi, nawa watwinkaña ñovu yakuumika. (Mas. 23:4) Neyi tunakumona kukala, dihu dinu hitukwiluka cheñi kuzeyazeya kutukweti, nawa nawukwashu waNzambi, tunateli kuwahishaku wuntu wetu. (Tañenu AHeberu 12:​7, 11.) Chakutalilahu, Yoba wakeñekeleña kuzatila hachilwilu chakudizoza. Yehova hamukojejeli Yoba kuhita mukukalaku; hela chochu, wakwitejeli kulonda yamukwashi Yoba kudiza yuma yalema. (Yoba 42:​1-6) Hela chochu, hichikweti muloña nakukala kunateli kutumwekenaku, tweluka netu kukala kwejima kukwitejayi Yehova nindi kutumwekeni hikunateli kutuzeñesha haya nyaakaku. Neyi tuumikaña nakashinshi kukala kutunakumona, “[tukwimikaña] mushindu chikupu.”—Rom. 8:​35-39.

7. Muloñadi chimwatela kwikalila namuzañalu nihampinji yinakuyikabishawu muloña wayuma yimwakuhwelela?

⁷ Tunateli kwikala namuzañalu hampinji yinakutukabishawu. Neyi anakuyikabisha muloña wayuma yimwakuhwelela, bayi mutoñojoka nenu Yehova naleki kuyikiswilaku. Ilaña neyi munakumona ikañesha damuchidiwu, dikwila nawu Nzambi nakuyitiya kuwaha. (Mat. 5:​10-12) Neyi mutoñojokaña muniyi njila kutalisha hamakabi imunakuhitamu, munateli kwikala namuzañalu nikutwalekahu kudimona kulema hampinji yinakuyikabishawu muloña wakwikala mukaKristu, neyi cheliliwu apostolu. (Yilw. 5:​40-42) Kubombelahu, munateli kukwasha antu abula kwikala aYinsahu kudiza chalala nawa “[akumulemesha] Nzambi.” (1 Pet. 2:12) Neyi cheliliyi Yosefu, munateli kushinda hampinji yimunakumona kukala—bayi hohu hampinji yakwila oku kukala kunahiti dehiku.—Kutach. 39:​3, 23.

8. Chumanyi chikwawu chitwatela kwiluka chikutukwasha kutwalekahu kuumika hampinji yitunakuhita mukukala?

⁸ Kukala kutunakuhitamu kwakamana. Yuma yamumwekeneni Yoba yatwanukishaña nawu kukala kwejima kutunakuhitamu kwakamana. Kafwampi, “Yehova wakiswilili chihandilu chaYoba chakukumishaku kubadika chakusambila.” (Yoba 42:12) Munjila yoyimu, Yehova washiika kukiswila chihandilu chenu “chakukumishaku,” chihandilu chakatwalekahu haya nyaaka, kubadika chihandilu chimunakuhanda chayinu mpinji chenzala namakabi. Kwiluka chumichi kunateli kutukwasha wejima wetu hamuntu-hamuntu kutwalekahu kuumika kushika nikunsa!—Mat. 24:13.

YUMA YATAMA YIKUFUMAMU NEYI TUBULAÑA KUTOÑOJOKA CHIWAHI HAKUKALA KUTUNAKUHITAMU

9. Yumanyi yatama yinateli kufumamu neyi tubulaña kutoñojoka chiwahi hakukala kutunakumona?

⁹ Hela chakwila tunakumona yihuñu yamuchidinyi, twatela kutoñojokaña chiwahi hanoku kukala kutunakuhitamu kulonda tubuli kubombelahu kukala kukwawu. Chakutalilahu, hadaha tunateli kutachika kutoñojoka netu Yehova diyi wunaleteshi yihuñu yitunakuhitamu. Mpinji yimu, Yoba watoñojokeleña nindi Yehova diyi wakojejeleña kukala kwamweneñayi, nawa iyi yitoñojoka yaheña yamuletesheli yatachiki “[kudimona] nindi waloña kubadika Nzambi.” (Yoba 32:2) Nawomi niyena hakusambila wamutwikileñamu Yehova nyiloña hakukala kwamweneñayi. (Luti 1:​13, 20, 21) Neyi aYoba naNawomi akakeleli kuniyi yitoñojoka yatama, adi kukisañana wubwambu wawu naYehova. (Yish. 19:3) Ilaña, Yehova wayikwashili kutachika kutoñojoka chiwahi hakukala kwamweneñawu nawa wayikiswilili hakashinshi kamwekesheliwu.

10. Neyi tunakumona kukala, hadaha tunateli kutachika kujinoka netudi?

¹⁰ Hela chakwila tuneluki chikupu netu Yehova diyi wunakukojeja wanyi kukala kutunakuhitamu, hadaha tunateli kutachika kujinoka neyi chakwila wuchidi kutwakamena. Kwikala nayitoñojoka yamuchidiwu kunateli kutuzeyesha. (Yish. 24:10) Mwanta Davidi nikaprofwetu Habakuki wejima wawu amweni yihuñu, nawa mpinji yimu atachikili kujinoka neyi chakwila mwamweni Yehova watiyileña kwaaba kwawu kwakukeña nawu ayikwashi. (Mas. 10:1; Hab. 1:2) Hela chochu, alekeli kulomba wanyi. Yehova wayilejeli ana amayala ashinshika nindi wukuyikwashaña, nawa dichikwilañayi ninanenu.—Mas. 10:17.

11. Yumanyi yinateli kufumamu neyi tunakutoñojoka chiwahi wanyi hakukala kutunakuhitamu neyi chakeñañayi Yehova nindi tutoñojokeña?

¹¹ Neyi tunakutoñojoka chiwahi wanyi hakukala kutunakuhitamu neyi chakeñañayi Yehova nindi tutoñojokeña, iku kukala kunateli kutuhayamisha, hadaha tukutachika kutoñojoka netu yuma yamuchidiwu hiyatela kutumwekenaku. (1 Pet. 4:12) Atumbanji twaYesu chayikalilili kwiteja nawu Yesu wakamona ikabisha deneni. (Luka 18:​33, 34) Hela chakwila Yesu wayilumbulwilili chiwahi kukala kukumonayi hambidi, kapostolu Petulu wakaanini nindi iku kukala kwila kumumwekena nehi. Yesu welukili nindi yitoñojoka yamuchidiwu yikumukañesha kwila nkeñelu yaYehova, dichi wamuzuwilili Petulu. (Maku 8:​31-33) Nihanyima yakufwa kwindi, atumbanji twindi hiyashikeneni kutiyishisha yuma yayeni yaletesheli amujahiku. Hela chochu, Yesu walekeli wanyi kuyikwasha. Hampinji yahanjekeleñayi nawu hanyima yakumusañula, wayikwashili kwiluka yuma yaletesheli yakabakani kuhitila ‘mukuyibakwila chikupu Nsona.’ (Luka 24:​25-27, 32, 44-48) Kutoñojokahu chikupu hayuma yayitañishileñawu kudi Yesu, kwadi kuyikwasha kudiloñeshela chadimu nekañesha dadiña kwakwihi nakumonawu. Neyi tutoñojokaña hachalala chamuNsona, chikutukwasha ninetu kudiloñeshela chadimu nakukala kutunateli kumona.

12. Kubula kutoñojoka chiwahi hakukala kutunakuhitamu kunateli kutuletesha kutachika kutiya ñahi?

¹² Neyi tubulaña kutoñojoka chiwahi hakukala kutunakuhitamu, tukutachika kumona kukala kwanyanya neyi kwiji kweneni nankashi. Yesu wamwekesheli chumichi chichinateli kumwekana muchakutalilahu chazatishiliyi chawakakukalakala mwitempa danyivinyu. Akakukalakala amakwawu aneñeli muloña atoñojokeleña nawu hiyatambwilili wufwetu wakuhweleleliwuku. Ilaña mwanta walejeli wumu hakachi kawu nindi: “Eyi mukwetu, kwosi chuma chatama chinnakwili.” (Mat. 20:​10-13) Awa akakukalakala atoñojokeleña nawu ayidiilili mabula hamutu, ilaña diimu wanyi. Chuma chaletesheli abuli kwikala namuzañalu muloña akuhweleleli chuma chateleli kubulawu kukuhwelela. Makonu amanakwetu hela ahela amakwawu anateli kutachika kulwisha nayitoñojoka yoyimu. Chakutalilahu, anateli kutoñojoka nawu anakuyila chachiwahi wanyi neyi abula kuyinka kukooleka indi kwiji ayitambula kukooleka mukuloñesha kwaYehova. Yumanyi yalema yinateli kutukwasha kutoñojoka chiwahi hakukala kweneni kutunakuhitamu neyi chakeñañayi Yehova nindi tutoñojokeña?

YUMA YITWATELA KWILA NEYI TUNAKUMONA KUKALA

13. Chumanyi chinateli kumwekana neyi iyetu anakuhita mukukala?

¹³ Ambuña aYehova eluka yuma yahosha Bayibolu hamakabi. Nawa kakavulu twatañilaña antu mavasi amuBayibolu kulonda tuyikoleshi neyi anakumona kukala. Ilaña neyi iyetu anakuhita mukukala, hadaha chinateli kutukalila kutoñojoka chachiwahi neyi chakeñañayi Yehova nindi tutoñojokeña. Chakutalilahu, hadaha tunateli kutoñojoka netu Yehova nakutubabesha muloña wachuma chatama chitunakoñi indi kwiji netu nakutiyilila wanyi kukulomba kwetu. Neyi mutachika kutoñojoka muniyi njila, yumanyi yimwatela kwila?

14. Yumanyi yimwatela kulomba neyi munakuhita mumakabi? (AFwilipi 4:13)

¹⁴ Mulombenu Yehova kulonda ayikwashi. Mulejenu Yehova makabi imunakuhitamu nichimunakutiya. Munateli kushimuna mukulomba yuma yimunakukeña nenu Yehova ayikwashi. Munateli kumulomba nenu spiritu yindi yajila yiyikwashi kwikala nañovu nimaana akuyikwasha kuumika. Hela chochu, anukenuña nenu Yehova nateli kwakula kulomba kwenu munjila yimunabuli nikukuhwelela. (Efwe. 3:20) Nateli cheñi kuzatisha añelu, indi kwiji amanakwenu niahela kulonda ayikwashi. (Mas. 34:7) Dichi itejenu wukwashu waYehova munjila yidi yejima munakuyikwashilayi. Wahanaña spiritu yindi chakufuma hamuchima, nawa yinateli kuyikwasha mukukala kudi kwejima kumunateli kuhitamu.—Tañenu AFwilipi 4:13.

15. Yumanyi yikuyikwasha kuumika hampinji yimunakumona kukala? (Talenu nimwevulu.)

¹⁵ Twalekenuhu kwila yuma yakuspiritu. Hampinji yimunakumona kukala, hadaha chinateli kuyikalila kukakela kundandanda yenu yakwila yuma yakuspiritu. Ilaña hampinji jamuchidiwu, dihumwatela kuswejelaku kwila yumiyi kulonda mumwekeshi nenu munakutoñojoka neyi chatoñojokañayi Yehova. Dichi zatenu hakumina ñovu jenu kutaña hela kutiyilila kuyuma yikuyikwasha kutoñojoka hadi Yehova nihayuma yahoshañayi. (Mas. 119:143) Twalekenuhu kutaña Bayibolu mpinji yejima, kuyidiza nikutoñojokahu chikupu hayuma yimunatañi. Shimwinenuña kwesekeja nahanakumini ñovu jenu, yenuña nakupompa nawa akulenuñahu hampinji yakupompa. Dikundenuña nawamanakwenu niahela. Tondolwelenu muchima wakukeña kwikala nkawenu damunu nakudambula nawakwenu.—Yish. 18:1.

16. Kujinoka kwamuchidinyi kumunateli kutachika kwikala naku neyi munakumona kukala, nawa munateli kukumanisha ñahi? (2 AKorinda 10:​4, 5)

¹⁶ Lekenu kujinoka. Neyi kukala kunayimwekeni, mwatela kuzata nañovu kubalumuna yitoñojoka “yashimata chikupu,” kushilahu nikudijinoka enu aweni indi kwiji kumujinoka Yehova. (Tañenu 2 AKorinda 10:​4, 5.) Munateli kuleka kujinoka neyi mufwilaña kwiluka chatoñojokañayi Yehova kuhitila mukuzatisha Bayibolu ninyikanda yedishaña kuloñesha kwindi. Chakutalilahu, komana munakujinoka neyi chakwila Yehova wuchidi kuyitiya kuwaha? Dizenu hayuma yahitilimu kapostolu Pawulu. Hampinji yazatileñayi mudimu windi wakushimwina, wahitili mukukala kwamaneni; hela chochu, iku kukala kwamukwashili kukuhwelela chikupu nindi wadiña mukakukalakala waKristu atiyileñawu kuwaha. (2 Kor. 11:​23-27) Komana mwajinokaña neyi chakwila mwamweni Yehova wayanakena yiluwa yimwakoñeli kunyima? Neyi dichimunakutiya, sonekenu nsona jinakumwekesha nawu Yehova wanakenaña nshidi. (Isa. 43:25) Kuhiñahu, tañenu owu mavasi nawa toñojokenuhu chikupu hansañu yimunatañi. (Mas. 119:97) Komana kukala kumunakuhitamu kunayileteshi kujinoka chikaninu chaNzambi chakukiña ambuñindi ashinshika? Sandujolenu nsañu yahosha hamuloña waweni Nzambi chetejelayi makabi nichatukwashañayi kutwalekahu kwikala akola kuspiritu hichikweti muloña nakukala kutunakumonaku. (Mas. 91:​9-12) Cheñi, tañenu nsañu yawamanakwetu niahela atwesheli kuumika kukala kwamweneñawu.a

17. Yumanyi yitwatela kwila neyi tunakuhita mukukala kweneni?

¹⁷ Komana chayinu mpinji munakudiluñisha ifuku dadiwahi, dikwila nawu himunakuhita mukukala kwamaneniku? Neyi dichidi yuma, musakililenuña Yehova nawa zatishenuña chiwahi mpinji yenu kulonda mutoñojokeña hayuma yayiwahi yinakuyililayi. (Mukwa. 7:14) Ilaña neyi munakuhita mukukala kweneni, twalekenuhu kutoñojoka chiwahi hanoku kukala nawa mukuhwelelenuña Yehova chikupu. Chimukwilaña mwenimu, Yehova “wukuyiloñeshela [njila] kulonda mutweshi kuumika.” (1 Kor. 10:13) Indi kutalisha hadi amanakwetu niahela? Tunateli kuyikwasha ñahi neyi anakumona kukala? Chibaaba chinalondelihu chikahosha haniyi nsañu.