“Nzambi yaChalala” Mpinji Yejima Washikijaña Nkeñelu Yindi

1. Muloñadi chitwatela kukuhwelela chikupu netu Satana kwila atuluwañesha namakudi indi nehi? (Isamu 31:​2-5)

TUNAKUSHAKAMA mukaayi kanakuyuulawu kudi Satana. Antu adi namakudi nawa anakudiila akwawu mabula hamutu, adi kwejima. Chinateli kukala nankashi kwiluka muntu iwatela kukuhwelela. Akajibizinisi amavulu adimbaña akwawu anakwila jibizinisi. Antu anakulandisha yuma ashimunaña nsañu yakutwamba hayuma yinakulandishawu kulonda akokoli antu ayilandi. Nawa antu amakwawu chayikalilaña nikukuhwelela munahoshi amabwambu jawu chikupu. Ilaña, kwenoku kuwaha kutwatiyaña hakwiluka netu Yehova twatela kumukuhwelela mpinji yejima! Diyi “Nzambi yachalala.” (Tañenu Isamu 31:​2-5.) Hatwambañaku, yuma yejima yahoshañayi yalala. Mpinji yejima, twatela kukuhwelela nikushindamena yuma yahoshañayi Yehova niyelañayi.

2. Yumanyi yitukuhanjekahu muchinu chibaaba?

² Muchinu chibaaba, tukusambila kuhanjeka hayuma yikutuletesha kumukuhwelela Yehova namuchima wetu wejima. Kuhiñahu, tukuhanjeka hanochu Nzambi yachalala chakafumishahu kaayi katama kaDiyabolu nawa tukuhanjeka cheñi hayuma yinakwilayi Nzambi chayinu mpinji hakwila yashikiji nkeñelu Yindi. Chinu chibaaba chikutukwasha kwikala aYinsahu jaYehova abula woma nawa ahamuka.

YUMA YINATELI KUTULETESHA TUMUKUHWELELI NZAMBI YACHALALA

3. Muloñadi chitunateli kukuhwelela chikupu mudi Yehova?

³ Tunateli kukuhwelela mudi Yehova muloña diyi Nleñi. Diyi Ntuñi yamawulu niiseki, nawa diyi Nsulu yamawumi ejima. (Kutach. 1:1; Mas. 36:9; Chim. 4:11) Waleñeli iseki nawa washilimu yuma yejima yatukwashaña kuhanda nawa yatwalekañahu kwikalaku, chidi neyi mpepela yitonaña nimenji itwanwaña. Wukweti ñovu hayuma yejima yamwiwulu niyahamaseki nawa wakatwalekahu kwikala naniyi ñovu. Chineli diyi Nleñi wukweti maana abadiki niñovu jasweja, twatela kumukuhwelela chikupu netu wukuhembaña wumi wetu nawa wakatukwasha kudiluñisha chihandilu chachiwahi kumbidi.

4. Tuneluki ñahi netu Yehova watukeña?

⁴ Tunateli kukuhwelela mudi Yehova muloña watukeña. Yehova waleñeli antu muloña wakeñeleña nindi adiluñisheña chawaana chawumi neyi chadiluñishañayi yena. Yehova washimwini nkeñelu yindi kuhitila mukuhosha mazu analondelihu: “Tuleñenu muntu muchifwanisha chetu, wadifwana nanetu.” (Kutach. 1:26) Watwinkeli wuswa wakufuukula. Watuleñeleli mukala wawuwahi. (Mas. 115:16) Nawa wayinkeli anvwali jetu atachi mudimu wawuwahi, wakwilisha iwu mukala kwikala paradisa. (Kutach. 1:28; 2:15) Wayinkeli yuma yejima yayiwahi yekala heseki kulonda adiluñisheña chihandilu. Mwamweni, yuma yejimiyi yinakumwekesha nawu “kukeña kwaYehova kwakashinshi kwahaya nyaaka nanyaaka.”—Mas. 103:17.

5. (a) Yehova welili ñahi hampinji yadikañiliwu aAdama naEva? (b) Yikaninwinyi yikwawu yashikijayi dehi Yehova? (Talenu chikasha chinakwila nawu “Nsañu Yinakumwekesha Nawu Nzambi Mpinji Yejima Wahoshaña Chalala.”)

⁵ Tunateli kukuhwelela mudi Yehova muloña mpinji yejima washikijaña mwahoshañayi. Yehova waleñeli iseki “nindi dibuli kwikala damukunkulwayi, ilaña wadiwumbili nindi diikali dakushakamamu.” (Isa. 45:​18, 19) Chelili aAdama naEva adikañi, ayisompesheli nawu akafwa. Dichi, chamwekeni neyi nkeñelu yaYehova yikushikijewa wanyi. Ilaña Yehova diyi washikijaña yuma yejima yakanañayi. (Isa. 46:​10, 11) Nkeñelu yindi yakwinzesha iseki nawantu aloña awamayala niawambanda, yaluwankeni wanyi. Dichaletesheli Yehova ayiteji aAdama naEva kwikala nanyana. Nawa wahanini Mwanindi wumu hohu kwikala ifutu danyiloña kulonda yamwini anyana kaAdama nikuyinka kuchiñeja kwakuwahi kwakushakama haya nyaaka.—Yow. 3:16.

NZAMBI YACHALALA CHINAKUSHIKIJAYI NKEÑELU YINDI

6. Yehova washimwineñahu dehi nindidi hanyima yakudikaña kwaAdama naEva muEdeni?

⁶ “Kapela wakushankulu atenañawu nawu Diyabolu nawa Satana”a diyi wakojejeli aAdama naEva kudikaña naNzambi. (Chim. 12:9; Kutach. 3:​4, 5; Yow. 8:44) Yehova wamusompesheli nindi kumbidi akamujilumuna. (Kutach. 3:15) Henohu chumichi kanda chimwekani, amavulu akumulondelaña Satana nikwila yuma yelañayi. Hela chochu, amakwawu akutwalekañahu kwikala ashinshika kudi Yehova.

7. Anyi amulondelaña Diyabolu, nawa chumanyi chakayimwekena?

⁷ Satana Diyabolu amulondelaña kudi añelu adikañili niantu abulaña kumwovwahila Nzambi. Chineli adimbululaña, hela kukañesha nkeñelu yaNzambi, adilishaña awenawu kwikala kabadi kawanyana kaSatana. Ilaña hampinji yatoñolayi Nzambi, Satana ninowu ejima amulondelaña akayijilumuna.—Dan. 2:44; Rom. 16:20.

8. Chumanyi cheliliyi Yesu mu 1914? (Talenu ninyevulu.)

⁸ Wunsahwinyi watukwashaña kukuhwelela netu nkeñelu yaNzambi yakumujilumuna Satana niejima atama amulondelaña yakashikijewa? Mu 1914, Yesu watachikili kuzuña njita naSatana Diyabolu niandemoni jindi nawa wayinatili heseki. (Chim. 12:​7-9) Hela chakwila iyi njita yadiña mwiwulu, antu adi hamaseki diwu anakumona kukala kunafumi muniyi njita. Bayibolu yahosha nawu: “Oyihuñu yiwukumona eyi iseki nikaluñalwiji, muloña Diyabolu nayisulukili dehi, nahili chikupu nanochu chinelukiyi nindi nashali dehi nakapinji kantesha.” (Chim. 12:12) Kufuma tuhu mu 1914, Satana nemakeni iseki, nawa muloña wachumichi, yuma mukaayi yinakuswejelaku hohu kutama. Mwamweni, ‘Oyihuñu yinakumona iseki’! Hela chochu, Yesu katataka “amanishi kushinda” nawa Satana niejima amuhakwilañaku akayifumishahu. (Chim. 6:2) Yesu wakahakwilaku ijina daYehova haya nyaaka. (Mas. 45:​4-6) Ejima akeluka nawu Yehova diyi Nzambi yachalala!—Ezek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

NZAMBI YACHALALA NAKUPOMPESHA HAMU ANTU EJIMA AKEÑA CHALALA

9. Anyi anakupompeshayi Yehova makonu?

⁹ Chayinu mpinji, Yehova nakupompesha “yuma yejima mudi Kristu, yuma yamumawulu niyuma yahamaseki.” (Efwe. 1:10) “Yuma yamumawulu” yinakutalisha kudi awayishewa, atondayi Yehova kuyuula hamu naKristu mwiwulu. “Yuma yahamaseki” yinakutalisha kudi antu akashakama haya nyaaka muParadisa hamaseki. Awa akakudifukula aYehova ejima anakuzata nañovu kusawula makudi aSatana nikukwasha adi nanyichima yashinshika kwiluka chalala.

10. Yehova nakuyamwina ñahi antu kumakudi ataandishañawu kudi kudifukula kwakutwamba? (Chimwekeshu 14:​6, 7)

¹⁰ Yehova nakupompesha antu akeña chalala kuhitila mumudimu weneni chikupu wakushimwina wakwila kanda wuzatikeñahu dehi mukaayi. (Tañenu Chimwekeshu 14:​6, 7.) Hela chakwila Yehova wazatishaña antu kuleja akwawu antu nsañu yayiwahi, añelu niwena azatañaku iwu mudimu wakupompesha antu akweti nyichima yashinshika kwinza muchipompelu chawakaKristu. Iwu mudimu wakushimwina wunakusawula makudi atañishañawu kudi Babiloni Muneni, wanta wakaayi wakudifukula kwakutwamba, wunazatishiyi Diyabolu hadi yaaka yayivulu hakutaandisha makudi hadi Yehova. (Chim. 18:​2, 4) Katataka, kudifukula kwakutwamba kwejima akukukisañana chikupu, nawa ejima amukeña Nzambi yachalala akamwinka kalemesha kamutelela.—Chim. 17:16.

11. Tunateli kwiluka ñahi akakudifukula aYehova alala?

¹¹ Awa antu akeña chalala, afumaña kuyitachi niyisemwa yashiyashana nikunyuza yejima. (Chim. 7:​9, 10) Chatiyiliwu “nsañu yayiwahi,” elukili nawu anawani chalala nawa etejeli kudibomba hamu nawantu jaYehova. (Maku 13:10) Makonu, chinakukala wanyi kwiluka antu anakudifukula kudi Nzambi munjila yetejayi ninowu anakubula kwila mwenimu. Kaprofwetu Malaki washimwineñahu dehi nindi: “Mwakamona cheñi chaambu hakachi kamuntu waloña nawabula kuloña, nihakachi kamuntu wamukalakelaña Nzambi nawabulaña kumukalakela.” (Mal. 3:18) Kuhitila muyilwilu nimudimu wawu wakushimwina, ambuña aYehova amwekeshaña nawu adifukulaña kudi Nzambi yachalala.

12. Mudimu wakushimwina wakwashaña ñahi kushikija nkeñelu yaYehova?

¹² Neyi tunakushimwina “nsañu yayiwahi yaWanta,” twovwahilaña lushimbi lwaYesu nawa hampinji yoyimu twashikijaña wuprofwetu. (Mat. 24:14; 28:​18-20) Nawa muloña waniwu mudimu, antu mwahita kaayi kejima anakwikala atumbanji twaKristu nawa anakutalila mpinji yakadifukulañawu kudi Nzambi yachalala haya nyaaka. Kwenoku kukooleka kutukweti kwakuzataku mudimu wakushikija nkeñelu yaYehova!

TWATELA KUKUHWELELA CHIKUPU NETU YUMA YASHIIKAYI YEHOVA YAKASHIKIJEWA

13. Anyi emakenañayi nankashi Satana, nawa muloñadi?

¹³ Satana Diyabolu nahili chikupu muloña neluki nindi “nashali dehi nakapinji kantesha” henohu kaayi kindi kanda akikisañani. (Chim. 12:​12, 13) Nemakeni nankashi sweje-e añimeni aWanta waNzambi, ana “ahembaña nshimbi jaNzambi nawa akweti mudimu wakushimuna wunsahu hadi Yesu.” (Chim. 12:17; 14:12) Ejima ayikwashañaku nawa ahakwilañaku mudimu wazatañawu, niwena Satana wayikabishaña.

14. Yumanyi yakamwekana neyi Satana alukuka antu jaYehova? (Talenu nimwevulu.)

¹⁴ Hanyima yakujilumuka kwaBabiloni Muneni, añimeni jaSatana akalukuka antu jaYehova nakufwila kuyijilumuna ejima. Iku kulukuka kwakaletesha kwakekali njita yaAmagedoni. (Chim. 16:​13, 14, 16) Yesu niamashidika amwiwulu akapulwisha akakudifukula aYehova nawa akakisañana yuma yejima yaDiyabolu yakashala mukaayi. (Chim. 19:​19-21) Antu atama niakakutwamba hiyakekalaku cheñiku. (Chim. 21:8) Ejima akeluka nawu mpinji yejima Nzambi welaña yuma yaloña nawa wahoshaña chalala.

15. Muloñadi chitwatela kukuhwelela chikupu netu yuma yatushiikayi Yehova yakashikijewa? (Isaya 65:​16, 17) (Talenu nimwevulu.)

¹⁵ Makonu antu mukaayi anaswejeliku kwambokelamu. Ilaña nawukwashu waYehova, ambuñindi anatwalekihu kwikala anuñañana. Mudimu wakupompesha antu watachika dehi. Kwosi chuma chinateli kumukañesha Yehova kukiswila antu jindi nimudimu wunakuzatawu. (Tañenu Isaya 65:​16, 17.) Twatela kukuhwelela chikupu netu yuma yatushiikayi yakashikijewa. Mazu akapostolu Pawulu ekala haARoma 8:​38, 39 atukoleshaña nawu: “Hela kufwa, hela wumi, hela añelu, hela nfulumendi, hela yuma yidiku chayinu mpinji, hela yuma yakenza, hela ñovu, hela kuleha, hela kukunama, hela chuma chejima chaleñawu, hijinateli kutwambula kukukeña kwaNzambi kwekala mudi Kristu Yesu Mwanta wetuku.”

16. Muloñadi chimwamukuhwelela Yehova namuchima wenu wejima?

¹⁶ Tweluka yuma yayivulu yikuletesha tumukuhweleli Yehova, Nzambi yachalala. Diyi Nleñi yetu, nawa watukeña nankashi. Izaza deneni dinakutohelaku mukunyakashana, chineli antu akunyuza yejima anakwinza nakudifukula kudi Yehova. (Isa. 60:22; Zek. 8:23) Tweluka netu mpinji yejima washikijaña nkeñelu yindi nawa netu katataka yafumishihu makudi aSatana ejima. Twalombaña neyi chalombeliyi Davidi nindi: “Yehova Nzambi amushimeki, . . . owu wakoñaña yuma yakuhayamisha nkawindi hohu. Ijina dindi dalema adishimeki haya nyaaka, nawa kulema kwindi kuwanini heseki dejima.”—Mas. 72:​18, 19.