Yehova Natwalekihu Kundizisha Kufuma Tuhu Kuwansi

Henohu kanda nitwalekihu, nukusambila kuyileja chatachikili chihandilu chami. Navwalikili hampinji yikwadiña Njita Yakaayi Yamuchiyedi muCalgary, Canada. Kumakumishilu ayaaka yamuma 1940, payiniya wakansi wejina daDonald Fraser wadondomweneni kuchiisu chetala detu nawa aMama etejeli kudiza Bayibolu. Akeñeli chalala nankashi, ilaña muloña wakwila adiña nakukatakata nankashi kumujimba, kakavulu chayikalilileña kuya nakupompa. Hela chochu, apapatisheweli mu 1950. Chawushona, afwili chimwahitili yaaka kwakwihi nayiyedi. Atata adiña wanyi aChinsahu chaYehova hayina mpinji, ilaña etejeli amanakwetu kuhana mpanji yachipenji.

Chimwahitili mafuku antesha hanyima yakufwa kwawamama, muhela wakula dehi wawayishewa wejina daAlice, wantambikili nindi nakayi kukupompa kwachipompelu. Iwu muhela wañilukili muloña nayileña kukupompa kunsa yamulungu nawamama neyi anatiyiku chiwahi kumujimba. Nayilombeli atata neyi chakwila akuñiteja kuya. Etejeli nawa anlejeli nawu akuya nanami “kamu hohu” kulonda amusakilili manakwetu wahanini mpanji yachipenji hakufwa kwawamama. Hanidi ifuku namelela, kwadiña Shikola yaMudimu waTeokalatiki niKupompa kwaMudimu. Iku kupompa kwapompeliwu atata katachi kwayikwashili nankashi nawa enjili nakupompa hampinji yatelela. Adizili kushikola yakumujimba chakuhosha kudi antu amavulu, ilaña ahayamini nankashi chamweniwu mpanji chajihaniniwu chachiwahi hakupompa. Atata afuukwilihu kuyaña kuniku kupompa mulungu-himulungu. Mukuhita kwampinji, atachikili kuya nikukupompa kwetu kukwawu.

Munana mafuku, manakwetu walombweleña Shikola yaMudimu waTeokalatiki watambikileña majina anowu asonekesha mushikola, nawa muntu-himuntu chatiyayi ijina dindi wakwileña nindi, “Nidi hohu mwani.” Ifuku dimu namelela namulejeli manakwetu walombweleña nami inakukeña hakupompa kwakalondelahu ninami akantambiki ijina. Iwu manakwetu wanhamekeli chikupu, ilaña wañihwili wanyi neyi nelukili yuma yejima yadibombelamu.

Nelukili wanyi nami ichi chinamulejeli manakwetu nami akabidiki ijina dami hakupompa, dikwila nawu nalombeleña nami akanyinki mpanji mushikola! Mulungu walondelelihu, ijina dami aditambikili nawa nakwili nezu datiyakana nami, “Nidi hohu mwani.” Hanyima yakupompa, amanakwetu niahela anhamekeli nankashi. Chimwahitili nyilungu yayivulu, anyinkeli mpanji yinatena kumatachikilu achinu chibaaba.

Nafwili mutentu! Kunyima, mpanji jawanyana kashikola jaleheleña maminetisi 6 kushika ku 8. Hikwadiñahu mpanji yakutaña hohu Bayiboluku. Atata ankwashili kuloñesha iyi mpanji nawa anlejeli kuhitulukamu mapampa 20 henohu kanda niyi nakuyihana. Hanyima yaniyi mpanji, natambwilili kufumba kwakuwahi. Hadi yaaka yayivulu yinahitihu, Yehova nandizishi kuhitila mudi atata, amanakwetu niahela apama nikuloñesha Kwindi.

YEHOVA WATWALEKELIHU KUNDIZISHA

Muhela Alice, inashimunahu hakusambila, diyi wandizishili chakushimwina. Munana mafuku, atukolesheleña kumutañila mwini itala nsona jisatu, kuhiñahu dinu mumwinka mukanda. Neyi mpinji yami yakuhanjeka namwini itala yinashiki dehi, muhela Alice wadilumbulwileña yomweni. Wukutachika kuhanjeka namwini itala, kuhiñahu dinu yanleja nindi nitañi nsona yakutachikilahu. Hanyima yakwila mwenimu, iyami natwalekeleñahu kuhanjeka nanowu muntu, kutaña nsona yamuchiyedi niyamuchisatu nawa nimwinka nimukanda. Mukuhita kwampinji, nelukili chakudilumbulula ami aweni henohu kanda nitachiki kuhanjeka namuntu. Chelili atata apapatishewi kukumana kwachaaka cha 1954, diwu atwalekelihu kundizisha chakushimwina. Chineli diwu anvwali inashalili hohu nawu, azatileña hakumina ñovu jawu kunkulishila muchalala. Atata alemesheli nankashi kupompa nikushimwina. Mpinji yejima nelukileña yuma yitukudiza hakupompa namelela, yuma yitwakela Hamposu niHamulungu nantetemena.

Hampinji yinatañileña shikola yakumunjimba nadishileñaku, hela chochu, yuma yinadizili hadi yaaka 12 kuniyi shikola yakumujimba, yinankwashi muchihandilu chami chejima. Chakutalilahu, nadizili jajivulu hamakumi niIngilishi. Shikola yinahitilimu yakudiza Ingilishi nikwiluka chakusoneka chiwahi, yinankwashi mumudimu innakuzata chayinu mpinji wakuzatila hamu naDipatimenti Yasonekaña.

Antu avula kuñihula muloña waweni inakeñela kwimba. Anvwali jami ejima ayedi akeñeli kwimba. Hinadiña nayaaka 7 natachikili kudiza chakwimba piyano, ilaña ntañishi yami watoñojokeleña nindi nukutwesha wanyi kudiza muloña nakola mutu. Wayilejeli atata nindi nileki kudiza chakwimba piyano. Nelukili chaletesheli yatoñojoki muniyi njila, muloña hayina mpinji hinadiña nampwila yakudizaku.

Chimwahitili kakweji kamu, atata ankeñeleli ntañishi wacheñi. Haniyi mpinji natachikili kudiza chakwimba piyano nimazu, nawa nelileña chiwahi nankashi. Hinadiña kansi nembileña sapulano, izu dami datiyakeneña chiwahi nankashi nawa mpinji jikwawu nabadikileña akwetu neyi kudi kwimba kwakudibecha. Chuma chacheni chaletesheleña nidizeña chakwimba tumina, nakeñeleña kwikala nadigili yadi kuletesha niikali ntañishi yatumina kulonda nikaleña namali akunkwashaña kuzata chiwahi mudimu wawupayiniya. Ilaña nkumininaku, nelukili nami iyi shikola yakandiilaña mpinji yeneni muloña nakakeñekaña kudiza jajivulu hatumina nikudiloñeshela chadimu henohu kanda nisoneki kweseka. Dichi nalekeli kudiza nawa natachikili mudimu wawupayiniya wampinji yejima. Mwadiña muchaaka cha 1963.

MUDIMU WAWUPAYINIYA WALETAÑA MUZAÑALU

Hanyima yakuzata wupayiniya hadi chaaka chimu, antondeli kwikala payiniya wadimena nawa antemesheli kuya nakuzatila kuKapuskasing, muOntario. Mukwetu payiniya inayili nakuzatila nindi hamu wejina daDaniel Skinner, wadiña mukulumpi chikupu hadi ami. Wandizishili yuma yayivulu kutalisha hachazatikaña yuma muchipompelu. Antondeli kwikala membala muKometi yaMudimu yaChipompelu hinadiña nayaaka 20, dichi kwadiña yuma yayivulu yinateleleli kudiza. Nidi namuzañalu chikupu hakwiluka nami kuloñesha kunakukonkomwena cheñi hachalemena kudizisha nyidimu amanakwetu atwansi. Neyi adihana awenawu, anateli kuyizatisha kudi Yehova nihampinji yichidiwu atwansi nankashi!

Kudi kukala kutwahitileñamu hitwazatilileña kuKapuskasing. Mumpinji yachishika, kwatuutileña chakwila tempulicha yaholokeleña kushika kunekativu 44 digilizi sewushasi hela mpinji jikwawu kwataatileña kushika kunekativu 33 digilizi sewushasi. Ami naDan kakavulu twayileña kumaluña ejima. Hela chochu, chuma chimu hayuma yanzañalesheli nankashi muniwu mudimu hikudiluka namuhela wejina daLinda Cole, nkumininaku, wekalili Linda Splane.

Linda wadiña mukakushimwina wadikita nawa wadiña nawantu amavulu akufuntilaku. Wadiña nachisambu, wamuzañalu nawa wadikundileña chiwahi nawantu. Amama yindi, aGoldie, adiña muhela washinshika. Atata yindi, aAllen, hakusambila adiña ahela chalala. Hela chakwila aAllen adimbulwileña chalala, aGoldie mpinji yejima amusendeleña Linda niamanakwindi, John niGordon Kwitala daWanta nawa ayidizishileña nichakushimwina. AGoldie, Linda, John niGordon, mpinji jikwawu wejima wawu azatileña wupayiniya. Chimwahitili yaaka, aAllen etejeli chalala nawa adikitileña chikupu muchipompelu.

Mu 1965, antambikili kuShikola yaMudimu waWanta yakudiza hadi kakweji kamu haBeteli yamuCanada kulonda andizishi yuma yikwawu. Hampinji yinadiña hayina shikola, anlejeli nawu nisoneki fomu yakuyilahu kushikola yaGiliyadi. Natoñojokeleñahu wanyi jakuzata mudimu wawumishonali, ilaña nasonekeli iwu mukanda. Antambikili kuya kushikola yanaamba 42. Hampinji yitwadiña kuGiliyadi, antañishi jetu kakavulu atusonekeleleña malipoti amwekesheleña chitwazatileña mushikola. Mulipoti yatachi yinatambwilili, anlejeli nawu nizati nañovu kudiza jajivulu hachekala kuloñesha hampinji yinichidi kuniyi shikola. Iku kufumba kwateleleli chikupu muntu wudi neyi ami wadiña nayaaka 21 hayina mpinji.

Yuma yikwawu yitwadizili kuGiliyadi hinshimbi jakutukwasha chitwatela kwila neyi tunakuhanjeka nawantu azatilaña hayisanji, yikunzulemba niasonekaña yipapilu yansañu. Natiyileña kuwaha nankashi kudiza haniyi nsañu. Natoñojokeleñahu wanyi nami iyi nsañu yinadizileña yakankwasha kumbidi, neyi chinukulumbulula.

ANLEJELI KUYA NAKUZATILA KUSENEGAL

Chimwahitili mafuku antesha kufuma hitwamanishili shikola, ami naMichael Hohle, mukwetu inazatileña nindi wumishonali twayili nakuzatila kwituña dacheñi kuSenegal, muAfrica. Hayina mpinji, munidi ituña dejima mwadiña hohu akakushimwina 100.

Hanyima yakuzata muniwu mudimu hadi tukweji twatuvulu, antambikili nakunleja nawu nukuzataña haKasanji ifuku dimu mumulungu. “Kasanji kamutayi” kadiña hohu mukapeka kamu, mwitala dawamishonali. Hela chakwila kadiña kanyanya, Emmanuel Paterakis, wadiña nkoñi wamutayi, wankwashili kubula kuvulamena nami iwu mutayi wemeneneñaku kuloñesha kwaYehova munidi ituña. Mpinji yimu, Manakwetu Paterakis wafuukwilihu nindi tuyisonekeli amishonali ejima mukanda wakuyikolesha. Munana mafuku, hikwadiñahu njila yapela hela yabula wuseya yitwadi kuzatisha hakwila twidishi nyikanda yayivulu hampinji yimuku, dichi twayisonekeli wumu-wumu kuzatisha ikina datenañawu nawu typewriter. Iwu wadiña mudimu weneni, sweje-e chineli akaanishili kufuta hela chanti!

Hinadiloñesheleña kufunta kwitala dawamishonali kunakaamineña namelela hadina ifuku, Manakwetu Paterakis wanyinkeli envelopu. Wahosheli nindi, “David, aSociety anakusonekeli iwu mukanda.” Mukuhita kwampinji, chinenzunwini envelopu nawaninimu mukanda inasonekeli. Ichi chuma chamwekeni chandizishili kulemesha kuloñesha hichikweti muloña nakutoha hela kukeha kwamutayi wudi mwituña detuku.

Nekalili nawamabwambu amavulu muchipompelu nawa nawanikileña nawu kakavulu Hamposu namelela. Kudikunda nanawa amanakwetu kwanzañalesheleña nankashi! Tuchidi kuhanjeka niyinu mpinji. Nawa neyi inakwendela tusanji mwahita kaayi, nazatishaña French yinadizili.

Namwoteli Linda mu 1968. Mutukweji twatuvulu twalondelelihu, nakeñakeñeleña mudimu wakuzata mafuku antesha hakwila nawu ami naLinda tuzatileña hamu wupayiniya muSenegal, ilaña akakwiñija nyidimu akeñeli hohu kwiñija antu amunidi ituña bayi añiinzaku. Nkumininaku, chinafuntili kuCanada, twadisumbwili nawa atutondeli kwikala apayiniya adimena muEdmundston, New Brunswick, musumba wanyanya wadikumashana nakabeta kaQuebec.

KUZATILA MUDIMU WAWUPAYINIYA MUNEW BRUNSWICK NIMUQUEBEC

Muniyi tawuni mwadiña wanyi akakushimwina nawa mwadiña hohu atudizi aBayibolu antesha. Antu amavulu munidi iluña, alemesheli nankashi kudifukula kwawaKatolika. Hamatala amavulu hadiña chinjikijilu chakwila nawu aYinsahu jaYehova Tunakuyikeña Wanyi. Hayina mpinji hela tunamoni chinjikijilu chamuchidiwu twashileñaku maana wanyi, dichi twayileña kumatala ejima hela chakwila hadi chinjikijilu hela nehi. Mulungu-himulungu chipompelu chawaKatolika chasonekeleña muchipapilu chansañu nawu: “Chimwawana aYinsahu jaYehova yibabeshenu.” Muniyi tawuni mwadiña hohu aYinsahu jaYehova awana—aVictor Norberg nañodawu Velda ninami nañodami Linda—dichi twelukili netu anakutena etu!

Nakavulamena wanyi mpinji yenjili nakutwendelawu katachi kudi nkoñi wañinza. Hanyima yakushakama nanetu hadi mulungu wumu, wahosheli nindi, “Hadaha chuma chimu hohu chimwatela kufwila kwila hampinji yimuchidi kunu hikukwasha antu kuleka kuyihela aYinsahu jaYehova.” Kufuma haniyi mpinji, twazatilileña haniku kukala kwatulejeliyi nawa mwafumini yuma yayiwahi! Chovu-chovu antu atachikili kumona chaambu chadiña hakachi kawaYinsahu jaYehova adizoza nawakulumpi amuchechi yaKatolika adivwimba. Chayinu mpinji muniwu musumba mudi chipompelu mudi akakushimwina antesha.

Hanyima yakuzatila kwakwihi nachaaka chimu kunidi iluña dadiña kwakulehi, atulejeli nawu tuyi nakukwasha chipompelu chadiña nawakakushimwina amavulu mumusumba waQuebec. Hadi tukweji 6, henohu kanda atutemeshi mumudimu wakwenda, twazatilili hamu chiwahi nawamanakwetu niahela adiña nachisambu.

Hadi yaaka 14 yalondelelihu, twazatili mumudimu wakwenda mumusumba waQuebec. Twadiluñishileña chikupu muniwu mudimu! Mudimu wakushimwina muQuebec wendeleña chiwahi nankashi, nawa muyipompelu yitwendeleleña twamweneña yisaka yayivulu chiyazatileña nañovu kushikahu kupapatishewa!

TWANUKAÑA AMANAKWETU NIAHELA AZATILI NAÑOVU KUTUKWASHA

Amanakwetu niahela ashakamaña kuCanada ahoshaña French hiyantu amawahi nankashi. Ahoshaña chakadi kuhita mumbadi, ekala namuzañalu nawa adikita. Hela chochu, hichayipelelaña kwiteja chalalaku, nawa yisaka yawu yayidimbululaña chikupu. Amanakwetu niahela amakwawu atwansi nankashi akweti anvwali jawu abula kwitiya, ayilejaña nawu, “Tondakuhu hadi kuleka kudiza nawaYinsahu jaYehova hela kufuma hetala!” Amavulu hakachi kawu atwalekañahu kwikala ashinshika hela chakwila anakuhita munidi ikañesha. Chakadi nikujina, Yehova wayitiyaña kuwaha nankashi awa amanakwetu niahela!

Nukuluwañesha nankashi neyi nibula kuhosha hezanvu dadikita dawapayiniya ampinji yejima niadimena azatilileña muQuebec hayina mpinji. Amavulu hakachi kawu afumini kumaluña ashiyashana amuCanada. Kubombela hakudiza idimi daFrench, adizili cheñi chisemwa chamunidi iluña nichatoñojokeleñawu antu aluwañesheliwu chikupu nakudifukula kwawaKatolika.

Kakavulu apayiniya adimena ayitemesheleña kuya nakuzatila kumaluña akwakulehi kwabula kwikala akakushimwina. Muloña wakuyihela aYinsahu, chakalileña nankashi kuwana matala mwakushakama ninyidimu yakuzata hadi mafuku antesha. Nianadisumbuli katataka adibombeleña nawakwawu adisumbula nakutachika kushakama mwitala dimu, hadaha aYinsahu akushika ku 8 hakwila atweshi kusonkela itala dimu. Hiyadi kutwesha kudishakamina awa nkawawu awa nkawawuku. Awa apayiniya adihana adikitileña chikupu. Neyi atachika kudizisha muntu Bayibolu, azatileña hakumina ñovu jawu kumukwasha kupama. Chineli muQuebec chayinu mpinji himudi cheñi kukaankila kwawakakushimwinaku, awa apayiniya amavulu hakachi kawu aya nakuzatila kudi kukaankila kweneni kwawakakushimwina.

Hampinji yitwendeleleña yipompelu mumudimu wakwenda, kakavulu twazatileña nawatwansi Hamposu nantetemena. Chumichi chatukwashili kwiluka kukala kuyahitileñamu. Atwansi amakwawu itwazatileña nawu, chayinu mpinji anakuzatila mumatuña acheñi mudimu wawumishonali hela nyidimu yikwawu yambukaku.

Munana mafuku, yipompelu yikwawu yatufuntishilileña wanyi mali itwazatishileña hakwenda, dichi mpinji jikwawu twashalileña chakadi mali henohu kakweji kanda kamani. Neyi chuma chamuchidiwu chimwekana, twashindameneneña chikupu hadi Yehova muloña diyi hohu welukileña kukala kutwahitileñamu. Hatuumbili chisayikilaku. Hela chakwila yuma yadiña muniyi njila, mpinji yejima twatwesheleña kwendela yipompelu.

YUMA YINNADIZILI KUDI AMANAKWETU ASHINSHIKA

Hitwadiña muQuebec, kwadiña njila jajivulu jakushimwinamu kuzatisha yisanji, yikunzulemba niyipapilu yansañu. Dichi natiyili kuwaha nankashi chinelukili nami yuma yinadizili kuGiliyadi yankwashili chikupu haniyi mpinji. Kakavulu antemesheleña kuzatila hamu naLéonce Crépeault, niyena wadiña nkoñi wañinza nawa welukili chakuzata chiwahi nayisanji, yikunzulemba niyipapilu yansañu. Neyi tunakuya nakudimona namuntu walema wakulukila munsañu janyuzi, chatela yadimwekeshi kudi iwu muntu neyi weluka nsañu jajivulu nankashi hanyuzi, wadiña nakuhosha nindi: “Amukulumpi mwani, ami nimukwetu tudi hohu akakukalakala. Tweluka wanyi jajivulu hachakutiyakesha nsañu hayisanji nihayikunzulemba. Ilaña anatwinki mudimu wakuleja antu ntanjikilu yakutiyakesha kupompa kweneni kwawaYinsahu jaYehova kutwakekala naku. Tukusakilila nankashi neyi mukutukwasha munjila yidi yejima.” Muloña wakudizoza kwaniwu manakwetu, antu amavulu azataña mumakampani atiyakeshaña nyuzi atukwashileña chakufuma hamuchima.

Mukuhita kwampinji, kasanji katemesheli ami niManakwetu Glen How, wumu wahadi amahaku etu, kuzatila hanyiloña yakala nankashi yadi kusañumuna makampani atiyakeshaña nyuzi kukeña kuhoshahu. Yuma yinadizili kuGiliyadi niyinadizilili kudi Léonce yakwashili nankashi. Kwadiña hikukooleka kweneni chikupu kuzatila hamu naManakwetu How. Wadiña iyala wabulileña kutiya woma hela hanti neyi nakuhakwilaku nyiloña yinakundami kuloñesha kwetu, nawa chuma chasweja kubadika, wamutiyileña Nzambi woma hama. Wamukeñeli chikupu Yehova.

Mu 1985 atutemesheli kuya nakuzatila muñinza yadiña kwakwihi nakwashakamineña atata kukabeta kamujika waCanada, chumichi chatukwashili tuyakameneña atata muyuma yakaankilileñawu. Afwili chimwahitili hohu tukweji tusatu. Twatwalekelihu kuzatila muñinza jadiña kukabeta kamujika waCanada kushika nimu 1989 hampinji yitwatambwilili mutambi wakubula nikukuhwelela wakuzatila hamu nachisaka chaBeteli chamuUnited states. Twafumini mumudimu wakwenda hanyima yakuzatilamu kwakwihi nayaaka 19. Hadi yaaka yejimiyi yitwazatili mumudimu wakwenda, twashakamini mumatala amavulu nankashi nawa twadiili yakuda yayivulu hama yatwinkeleñawu kudi amanakwetu niahela akweti chisambu. Tunakuyisakilila chikupu ejima atutambwilileña mumatala awu nikutuloñeshela yakuda.

KUKALAKELA HABETELI MUUNITED STATES

Chitwashikili muBrooklyn, anlejeli nawu nukuzatilaña kuDipatimenti yaMudimu. Nukutwalekahu kusakilila hayuma yandizishiliwu kuniyi Dipatimenti. Chuma chimu chalema chinadizili chadiña chakwila nawu nateleleli kwiluka wunsahu wejima wunakundami kuchuma henohu kanda nikunkululi nami nachiluka chiwahi. Kuhiñahu mu 1998, anyinkeli mudimu wakuzatila kuDipatimenti Yasonekaña, nawa nichidi kudiza chakusoneka. Hadi yaaka yayivulu, nadiña nakukooleka kwakukwasha Manakwetu John Barr, wadiña nloñeshi yaKomiti Yasonekaña. Mpinji yejima nakanukaña yuma yandizishiliyi nimpinji yinazatileña hamu nindi. Wadiña nayilwilu yayiwahi yawakaKristu.

Natiyaña kuwaha nankashi kuzatila hamu nawamanakwetu niahela adizoza muDipatimenti Yasonekaña. Mpinji yejima amushindamenaña Yehova mukulomba hanakuzatawu mudimu wawu nawa eluka nawu chuma chejima chelañawu achilaña muloña wakuyikwasha kudi spiritu yindi, bayi nawuswa wawuku.

Yaaka yejima yitunazati muniwu mudimu nañodami Linda, tunendeli amanakwetu niahela ashinshika mumatuña 110. Tunadimweni namesu kapu kukeña kwamwekeshañawu amishonali, amamembala amuKomiti yaMutayi niakakukalakala amakwawu adi mumudimu wampinji yejima. Nawa tunamoni iyena nikashinshi kamwekeshañawu akakushimwina ashakamaña munawa matuña, amukalakelaña Yehova hela chakwila kudi njita, anakumona kukala kwamali nawa anakuyikabisha. Chakadi nikujina, Yehova wayikeña nankashi!

Hadi yaaka yejima yinahitihu, ñodami Linda nankwashi chikupu hakwila nawu nitwalekihu kuzata nyidimu yami chachiwahi. Wakeña antu nankashi nawa mpinji yejima wakeñakeñaña njila mwakuyikwashila. Cheñi weluka nankashi chakutachika kuhanjeka nawantu. Nakwashi antu amavulu kudiza chalala, kushilahu nikukwasha akakushimwina adiña azeya kutachika kuzata cheñi chiwahi. Namusakililaña Yehova hakunyinka ichi chawaana chalema! Chitunakushinakaja, tunakuyisakilila nankashi amanakwetu niahela atwansi anakutukwasha munsañu jañendelu nimuyuma yikwawu.—Maku 10:​29, 30.

Neyi nitoñojoka hayuma yinammwekeni hadi yaaka 80 yinahitihu, nasakililaña nankashi. Neteji nami awa mazu asonekeliyi ñimbi yaMasamu alala: “Eyi Nzambi, wunandizishi kufuma kuwukwenzi wami, kushika niyinu mpinji nashimunaña nyidimu yeyi yakuhayamisha.” (Mas. 71:17) Inakukeña kutwalekahu kwila mwenimu chakala hohu nichidi nawumi.