Malwihu Kufuma Kudi Antañi

Mpinjinyi yakabidika nyuza nawu “kuwunda nikukiñewa”?

Neyi chalumbulwiliwu “muMalwihu Kufuma Kudi Antañi” muKaposhi Kakutalilaa kedishawu katataka, Yehova katataka yashi munyima “yanseñu 10” (nfulumendi jejima jañovu) “nkeñelu yindi,” kulonda yakahani ñovu jawu niwuswa kudi “kanyama wazuwa wuchinana nge-e”—dikwila nawu United Nations. Iwu kanyama amutenaña cheñi nawu “chifwikija chakanyama wazuwa.” (Chim. 13:​14, 15; 17:​3, 16, 17) Kuhiñahu “nseñu 10” nikanyama wazuwa akenkawu ñovu, akafumishahu kudifukula kwakutwamba kwejima mwahita kaayi. Komana nyuza yakabidika “kuwunda nikukiñewa”b henohu kanda hela hanyima yakujilumuna kudifukula kwakutwamba?—1 Tes. 5:3.

Kafwampi, tuneluki wanyi jiika mpinji yakabidikawu nawu “kuwunda nikukiñewa.” Neyi twilukila chadimu yuma yejimiyi hitukutwalekahu kwikala asoñama nawa anakutonaku. Hela chochu, Yesu watwalekelihu kuyifumba akakumulondela nindi ‘atoneña.’ (Mat. 24:42; 25:13; 26:41) Ichi dinu tushinshikenu chikupu hawuprofwetu wonenewa wasonekeliyi kapostolu Pawulu mumukanda wayitemesheleliyi aTesalonika.

Pawulu wasonekeli nindi: “Mpinji chiyakashika hakahoshawu nawu, ‘Kuwunda nikukiñewa!’ hohenohu kujilumuka kwakayishikena.” (1 Tes. 5:​2, 3) Nyikanda yetu kakavulu yalumbulula mazu aPawulu muniyi njila: Kubidika kwakwila nawu “kuwunda nikukiñewa” akakubidika henohu kunashali hohu mpinji yantesha nakutachika kwalukadi lwasweja, hakamujilumunawu Babiloni Muneni—wanta wañovu mukaayi wakudifukula kwakutwamba. Iku kubidika kwakabidikawu kumbidi akulumbululaña nawu dichinjikijilu chakukumishaku chakamwekesha nawu lukadi lwasweja ludi kwakwihi nakutachika.

Hela chochu, hanyima yakusandujolahu chikupu haniyi nsañu, chinamwekani neyi kudi ntiyishishilu yikwawu yitwatela kwiluka. Hadaha kubidika kwakwila nawu “kuwunda nikukiñewa” kwakekalaku hanyima yakujilumuka kwakudifukula kwakutwamba. Yumanyi yikuletesha tukunkululi muniyi njila? Toñojokenu hamalwihu analondelihu.

Yumanyi yinakwila kudifukula kwakutwamba hakukwasha njita jinakuzuñawu munyuza? Bayibolu yalumbulula nawu: “Mudi yena [“mumbanda chivumbi muneni,” Babiloni Muneni] mwawanikili mashi . . . awantu ejima ajahawu heseki.” (Chim. 17:​1, 5; 18:24) Kufuma tuhu kumashiita, iwu mumbanda chivumbi muneni wakwashanaña munsañu jamajita nawa kakavulu diyi waleteshaña madombu niantu amavulu kuyijaha. Dichi diyi wekala hambidi mukusañumuna majita nimadombu bayi kuwunda nikukiñewaku. Chumichi chinaleteshi kwiikali ilu lwihu: Komana nyuza yakabidika nawu “kuwunda nikukiñewa” hanyima hohu yakumufumishahu Babiloni Muneni? Dichichinakumwekana, ilaña hitukuhosha jiika netu dichakamwekanaku.

Chumanyi chakalondelahu hanyima yakubidika nawu “kuwunda nikukiñewa”? Pawulu wahosheli nindi: “Hohenohu kujilumuka kwakayishikena.” (1 Tes. 5:3) Neyi nfulumendi jamukaayi jikweti ñovu jakabidika nawu “kuwunda nikukiñewa” hanyima yakwila kudifukula kwakutwamba anakujilumuni dehi, dikwila nawu iyi nyuza yejima akashikena kuyijilumuna neyi mukulabula kwadisu.

Antu jaYehova akela ñahi naniyi yuma yinashimwiniwu chadimu yakamwekanaña? Pawulu wahosheli nindi: “Enu anakwetu, himwekala mumwidima hakwila odu ifuku dakayishintakeshi neyi amakombiku.” (1 Tes. 5:4) Toñojokenu hachumichi: Neyi akabidika nawu “kuwunda nikukiñewa” hanyima yakujilumuna kudifukula kwakutwamba, dikwila nawu antu jaYehova akeluka nawu kujilumuka kwanyuza kunashiki dehi mukamwihi. Hela chochu, nyuza yakamona nawu yakiñewa, ilaña kujilumuka kwayu kwakenza neyi ikombi—dikwila nawu chakadi kuyisoñamisha.

Hanu dinu, yumanyi yitwatela kukuhwelela kumona? Katataka, “nseñu 10” nikanyama wazuwa akenkawu ñovu ajilumuni kudifukula kwakutwamba. Dihakatachika lukadi lwasweja. Tweluka cheñi netu kwakekala mpinji yakabidika nyuza nawu “kuwunda nikukiñewa.” Mpinjinyi yakamwekana chumichi? Tunahanjeki hayuma yiyedi yinakumwekesha hadaha mpinji yakamwekana chumichi. Chatachi chidi chakwila nawu: Hadaha iku kubidika kwakekalaku neyi kunashali dehi mpinji yantesha (chili henohu kanda hela hanyima) yakwila Yehova nashi dehi nkeñelu yindi munyichima yanyuza kulonda yakahani ñovu jayu niwuswa kudi kanyama wamwisaña wazuwa. Chamuchiyedi chidi chakwila nawu: Hadaha iku kubidika kwakekalaku hanyima yakwila nfulumendi jañovu mukaayi jinamujilumuni dehi chikupu Babiloni Muneni. Tutwalekihu hohu kuhembelela kulonda twakamoni chuma chacheni chakamwekana. Wuprofwetu wamuBayibolu kakavulu awutiyishishaña muwunatalishi neyi wunakushikijewa hela hanyima yakwila wunashikijewi dehi.—Esekejenu Yowanu 12:16.

Chayinu mpinji, chuma chalema nankashi, bayi neyi hikutoñojoka hampinji yakumbidi yakabidikawu nawu “kuwunda [nikukiñewaku],” ilaña twatela kutwalekahu kwikala ashinshika kudi Nzambi. Twatela kutwalekahu kwikala “[atona] nikuhemba yitoñojoka yetu,” kulonda twiikali adiloñesha chikupu hichikweti muloña nayuma yakamwekana kumbidiku.—1 Tes. 5:6.