Anyana “hiWuswana Kufuma Kudi Yehova”

YUMANYI yimwatoñojokaña neyi mutiya izu dakwila nawu “wuswana”? Hadaha munateli kutoñojoka hamali, itala indi kwiji iheta dinayinkiwu kudi ntaña yenu wayikeña. Dichi wuswana hichuma chalema nankashi nawa mwatela kuchihemba chiwahi.

Bayibolu yatenaña anyana nawu “hiwuswana kufuma kudi Yehova.” (Mas. 127:3) Mwamweni, anvwali akaKristu amonaña anyanawu nawu hiyawaana yalema yayinkawu kudi Tata yawu wamwiwulu nawa akeñaña kuzata hakumina ñovu jawu kuyikiña nikuyakamena kumujimba, muyitoñojoka nikuspiritu.

Chawushona, anvwali amakwawu makonu hiyamonaña anyana nawu hiwuswana kufuma kudi Nzambiku. (Isa. 49:15; 2 Tim. 3:1-3) Amakwawu akweti muchima wakukeña kwakamena chiwahi anyanawu, ilaña chayikalilaña kwila mwenimu muloña wakukala kwashiyashana. Kukalanyi kweniku kwaleteshaña chiyikalileña anvwali kwakamena chiwahi anyanawu? Yumanyi yakeñañayi Yehova nindi anvwali elileña anyanawu? Nawa yumanyi yatela kwilawu anvwali akaKristu hakwila akulishi chiwahi anyanawu?

KUKALA KWAMONAÑAWU

Ikakeja dafumaña muchituñilu nimuchisaka. Mumaluña amakwawu mukaayi, anvwali akweti anyana amavulu ayilemeshaña nankashi muchituñilu mwashakamañawu. Muloña wachumichi, eyala namumbanda adisumbula anateli kuyikanjikija kudi antu amuchisaka chawu hela amuchituñilu mwashakamañawu nawu avwali anyana amavulu—hadaha amavulu chakwila hiyakutwesha nikuyakamena kudi awa adisumbulaku.
Kwakama hachihandilu chawu chakumbidi. Mumatuña mwafwaña nankashi anyana anyanya nachikatu chanzala, nanyisoñu, nawa mwabula yipateli yalumbwa, adisumbula amakwawu afuukulañahu kuvwala anyana amavulu nakutoñojoka nawu hakashalihu amakwawu. Adisumbula amakwawu anateli kufuukulahu kuvwala anyana amavulu nakukuhwelela nawu chineli hiyanvwali, akayakamenaña chiwahi neyi anakuli dehi. Ichi dichuma chavula kumwekana, sweje-e mumatuña mwekala nfulumendi jabulaña kuhana wukwashu kudi antu akula dehi.
Kukañesha lusemu. Mumaluña amakwawu, chaswayi wanyi adisumbula kuwana yitumbu yakukañesha lusemu. Amakwawu anateli kuwana mutapu waniyi yitumbu, ilaña hamuloña wakwila yitumbu yinawaniwu yashindamenewa wanyi, achiinaña kuyinwa nawu yakenda kayiletela yikatu. Amakwawu niwena akutwesha wanyi kulanda iyi yitumbu yakukañesha lusemu muloña wakusweja wuseya.a

YUMANYI YAKEÑAÑAYI YEHOVA NINDI ANVWALI ELEÑA?

Chisaka chinakudiluñishila hamu kwiluña dakuhemena. Tata yawantu nakutiyilila nakanañachima hampinji mwanawu wamumbanda wakula dehi yinakumulejayi chinakutiyayi iku mama yawantu nakuhema bola namwanawu wanyanya weyala. — Ikalenuñaku nampinji yakwikala hamu namwana-himwana

Kuyilila anyanenu yuma yakeñekaña kumujimba. Yehova wayinka anvwali mudimu wakwakamena anyanawu anyanya muyuma yakumujimba. Wakeñaña anvwali kuzata nañovu chakufuma hamuchima kukeñela anyanawu yakuda, yakuvwala nimwakukaama. Yehova cheñi wakeñaña nindi anvwali atañisheña anyanawu shikola. Dichi anvwali akaKristu hiyatela hohu kufuukulahu kutemesha anyanawu kuya nakushakama mumabodiñiku. Ilaña, atela kushakama nawanyanawu sampu anakuli dehi kulonda ayidizishi nyidimu yakayikwashaña muchihandilu chawu. Ekalaña cheñi nampinji yakwikala hamu nawanyanawu kulonda anyana amoni nawu anakuyikiña nawa ayikeña. Hela chochu, Yehova watoñojokelañaku, hakeñaña anvwali nindi ekali namaheta amavuluku. Kafwampi, Yehova watondeli anvwali adikita nawa atuzweñi kumujimba kumukulishila Mwanindi akeñayi.—Mat. 13:55, 56; Luka 2:24.

Chishina chamuBayibolu: “Mwamweni neyi muntu wakamenaña antu ahembañayi wanyi, sweje-e dinu amwitala dindi yomweni, nakaani chikuhwelelu nawa watama kubadika muntu wabula kukuhwelela.”—1 Tim. 5:8.

Yehova weluka nindi anvwali anateli kukeñeka wukwashu neyi anakuli dehi. Kafwampi, njila yimu munateli kumwekeshelawu anyana nawu alemesha anvwali jawu hikuloñeshaku njila mwatela kuyakamenawu neyi anakuli dehi. (Kwid. 20:12; 1 Tim. 5:4) Hela chochu, Yehova watiyaña kuwaha neyi anvwali atoñojokaña nankashi hanochu chatela kwakamenawu anyanawu bayi hachatela kuyakamenawu wena kudi anyanawuku.—2 Kor. 12:14.

Yidizishenuña amwiluki Yehova. Anvwali akaKristu cheñi akweti mudimu wakukwasha anyanawu kumukeña Yehova nikudifukula kudi yena. Wamonaña mudimu wazatañawu anvwali wakudizisha anyanawu kuspiritu kwikala mudimu walema nankashi hampinji yinakuyikulishawu.—Kuhit. 6:6, 7.

Chishina chamuBayibolu: “Yikulishenuña [anyanenu] nakufumba nikukonkomwena kwaYehova.”—Efwe. 6:4.

YEHOVA WAKEÑAÑA NINDI MUKULISHEÑA CHIWAHI ANYANENU

Eyala namumbanda adisumbula anakuhanjeka mwitala. Bayibolu yakubakula yidi hamesa yidi hambidi yawu. — Hanjekelenuhu chadimu kulonda muditeji kuvula kwawanyana imunakutoñojoka kwikala nawu

Fuukwilenu chadimu anyana imwakekala nawu. Neyi munakutoñojoka hakwikala nawanyana, toñojokenu chikupu hachidi yuma muchihandilu chenu. Chakutalilahu, neyi mwikala nawanyana amavulu, komana mwakatweshaña kuyidiisha, kuyivwika nikuyitañisha shikola? Neyi mwakatwesha wanyi, hanjekelenu chadimu namwinikwenu anyana imwakekala nawu kulonda mwakatwesheña kuyakamena chiwahi kwesekeja nachakeñañayi Yehova. Hela chochu, Yehova weluka nindi bayi neyi yuma yejima muchihandilu yazatikaña kwesekeja nachitunafuukuliku. (Mukwa. 9:11) Ilaña wakayikiswila chimunakuzata nañovu hakukulisha anyanenu chiwahi.

Chishina chamuBayibolu: “Yuma yafuukulaña mukakudikita yaleteshaña yuma kumulumbulukila, ilaña ejima anyakalaña kwila yuma chakadi kutoñojokahu, chalala akekala muwuzweñi.”—Yish. 21:5.

“Hinyi hakachi kenu wukwila neyi nakukeña kutuña kaposhi wukubula kusambila kushakama hamaseki nakuchinda yuma yikuzatishayi kulonda eluki neyi wukweti yashikila yakukimanisha nachu?”—Luka 14:28.

Mutwamijenuku Yehova muchisaka chenu. Twamijenuñaku kudifukula kudi Yehova muchisaka chenu. Neyi mudi dehi nawanyana, fwilenuña kudizisha mwana-himwana kumukeña Yehova. Yikwashenuña atiyilileña nakanañachima nikudiza hampinji yakupompa kwachipompelu. Ikalenuña naKudifukula kwaChisaka mulungu-nimulungu chakadi kukilokela. Yidizishenuña anyanenu eluki chakushimwina. Bayi muleja anyanenu akula dehi, antaña jenu amakwawu, hela muntu wacheñi nenu ayililiku yumiyiku. Chineli yenu nvwali, iyenu mukweti mudimu wakwila yumiyi. Kukulisha anyana hakwila amukeñi Yehova chakeñekaña mpinji nikuzata nañovu, hela chochu, mwafumaña yuma yayiwahi nankashi.

Chishina chamuBayibolu: “Kwosi chuma chanzañaleshaña nankashi kubadika ichi: chakutiya nawu anyanami anatwalekihu kwenda muchalala.”—3 Yow. 4.b

Mukuhwelelenu Yehova. Chili munakutoñojoka hakwikala nawanyana indi kwiji mudi dehi nawu, ilukenu chikupu nenu nshimbi jaYehova jalema nankashi kubadika yisemwa hela tushidikilu twalondelañawu antu kumwashakamaña.

Nyevulu: 1. Anvwali anashakami hamu namwanawu hampinji yakupompa kwachipompelu. Mwanawu nololi chikasa kulonda yakulihu. 2. Chisaka chinakuzatila hamu mumudimu wakushimwina. Tata yawantu nakuzatila hamu namwanawu wamumbanda wakula dehi iku mama yawantu nakuzatila hamu nawanyanawu anyanya ayedi. — Kudizisha anyana chakudifukula nikumutiyisha Yehova kuwaha chakeñekaña mpinji nikuzata nañovu

Neyi mutondahu kwikala nawanyana antesha, kuhwelelenu nenu Yehova wakatwalekahu kuyinka yuma yimwakakeñaña neyi munakuli dehi. Tondolwelenu yitoñojoka yawantu yakwila nawu mwatela kwikala nawanyana kulonda akayihembeña neyi munakuli dehi. Bayi mutiyaña woma nenu akayuumba chisayikilaku. Yehova washiika nindi wakayakamenaña, nawa mpinji yejima welaña mwashiikañayi.—Yosh. 23:14.

Chishina chamuBayibolu: “Mukuhweleli Yehova namuchima weyi wejima, nawa bayi wushindamena hamaana eyiku. Munjila jeyi jejima wutoñojokeña hadi yena, nawa yena wakakwolwela njila jeyi.”—Yish. 3:5, 6.

“Nadiñi kansi nawa ichi nakuli, ilaña kanda nimoneñahu dehi muntu waloña anamushiyi chisayikila, hela anyanindi anakuya nakulombalomba dinkendiku.”—Mas. 37:25.

“Dichi, sambilenuña kukeña Wanta nikuloña kwindi, nawa yuma yejimiyi yikwawu akayishilahu.”—Mat. 6:33.

Anyana hiyawaana yalema yayinkawu anvwali kudi Yehova. Yehova watela wazañalalaña nankashi neyi yamona eyala namumbanda akaKristu anakwakamena chiwahi anyanawu! Akwashaña anyanawu kumujimba, muyitoñojoka nikuspiritu; afuukwilañahu chadimu anyana akekalawu nawu; nawa ovwahilaña chikupu nshimbi jaNzambi chatela ovwahileña yisemwa hela tushidikilu twalondelañawu antu kwiluña kwashakamañawu. Neyi elaña mwenimu, eyala namumbanda akaKristu akumwekesha nawu anyanawu hichawaana chalema—“hiwuswana kufuma kudi Yehova.”

Hiyaditoñeshañaku

Komana anvwali akabakanaña neyi afuukulahu kuvwala anyana antesha? Ilu lwihu lwayinyeñumwishaña mutu anvwali ashakamaña mumatuña amavulu mwakala chihandilu. Talenu nyitu yimu yayisaka yashinshika yamunawa matuña antesha chiyahosheli haniyi nsañu.

Komana ayikanjikijileña kwikala nawanyana amavulu?

“Eña, nikudi amanakwetu niahela amakwawu muchipompelu. Chisaka chimu chatwihwili nawu, ‘Muloñadi chimwekalila hohu namwana wumu weyala? Munu muAfrica, neyi wukweti mwana wumu hohu, chidi tuhu neyi wudana. Neyi wukweti anyana ayedi, chidi tuhu neyi wudi nawumu.’ Nihanyima yakwikala namwana wamuchiyedi wamumbanda, alekeli wanyi kutukanjikija.”—Jeremias

Mwakabakanahu dehi kumujimba indi kwiji kuspiritu muloña wakubula kwikala nawanyana amavulu?

“Chinjila mwani. Chineli twafuukwilihu kwikala nawanyana antesha, ami nañodami chatupeleleleña kwakamena chisaka chiwahi kumujimba, nawa chasweja kubadika, kuchikwasha kuspiritu. Anvwali jami atuvweli anyana amavulu, dichi namweneña kukala kwakuvulu kwamweneñawu atata nawamama hakwila atukeñeli yuma yakumujimba nikututañisha shikola.”—Jeremias

Anyanenu atiyaña ñahi hachuma chimwafuukwili?

“Anyanetu atiyaña kuwaha muloña chakulileñawu ahitili wanyi mukukala kwahitileñamu anyana amakwawu adiña nawanvwali akabakeneña hakuyakamena muloña wakwikala nawanyana amavulu.”—Filipe

“Anyanetu chakulileñawu, adiña namuzañalu muloña atiyileña nawu akiñewa nawa twayikeña. Mpinji yejima twatambikileña amanakwetu niahela apama kuspiritu, nawa atukolesheleña kwimika yikonkwanyi yakuspiritu. Chayinu mpinji tunakumona anyanetu chinakuzatawu chiwahi muloña wachakutalilahu chachiwahi chanana amanakwetu niahela.”—Carlos

Kudihu yuma yayiwahi yafumamu muloña wakufuukulahu kwikala nawanyana antesha?

“Twatwesheleña kwakamena chisaka chetu chiwahi kumujimba muloña wakufuukulahu kwikala nawanyana antesha. Nazatileña mudimu wawufwetu wawuwahi, ilaña munahiti dehi yaaka yisatu kufuma hanlekesheliwu. Chatukalilili wanyi kwiteja iku kuhimpika muloña chisaka chetu chadiña chanyanya nawa hitwakeñekeleña kwikala namali amavulu hakwila nawu wejima wetu tuhandi chiwahiku.”—Jeremias

“Chuma chitwafuukwilihu chinatukwashi kuyakamena chiwahi anyanetu kumujimba nikuspiritu. Tunazatili kumaluña amavulu kwekala kukaankila kweneni kwawakakushimwina. Chatupelelaña kwakamena chiwahi mwana-himwana muyuma yinakukeñayi. Anyanetu ejima anakumukalakela Yehova nawa anakuzata nañovu kushikija yikonkwanyi yakuspiritu.”—Lenadi

Yumanyi yimukukeña kulejaku akwenu anvwali?

“Nadimweni namesu kapu nami mazu ekala haIsamu 34:10b alala, ahosha nawu: ‘Antu amukeñakeñaña Yehova hiyakakaankila chuma chachiwahiku.’ Yehova watwinkaña yuma yejima yitwakeñaña muchisaka chami.”—Rafael

a Eyala namumbanda awenawu diwu atela kufuukulahu anyana atela kwikalawu nawu, mpinji yakekalawu nawu, nawa neyi atela kuzatisha yitumbu yakukañesha lusemu yabulaña kukojeja ivumu kufuma. Kwosi niwumu watela kuyisompesha munafuukuliwuku. (Rom. 14:4, 10-13) Kubombelahu, akaKristu adisumbula ovwahilaña kufumba kwekala ha 1 AKorinda 7:3-5.

b Hela chakwila anyana ashimunawu muniyi vasi yamuBayibolu atalisha kudi atumbanji akaKristu, nvwali wukweti mwana wunakukalakela Yehova nateli kutiya neyi chatiyiliyi Yowanu.