Munadiloñeshi Kuumika Kukala Kunateli Kuyimwekena Hanyima yaKupapatishewa?

1-2. Yumanyi yitunateli kwila hakwila tudiloñesheli chadimu nakukala kunateli kumwekana hanyima yakupapatishewa? Lumbululenu.

TWELUKA netu tukumonaña kukala mukanu kaayi kaSatana. Yesu wayisoñamishili akakumulondela chakadi kuhita mumbadi nindi: “Yuma yakuhukesha yakenza.” (Mat. 18:7) Kwesekeja naniku kusoñamisha, twatela kudiloñeshela chadimu kumona kukala, nawa munabombeli nikukala kwafumaña kudi akwetu akakwitiya.

² Toñojokenu hanichi chakutalilahu. Antu jaYehova anayikoleshi nawu adiloñesheli chadimu nawubanji wadimwekenaña. Tukudiloñesha ñahi? Chatachi, tukwiluka ntahi wubanji wunateli kumwekana mwiluña detu. Chalema nankashi kwila mwenimu, sweje-e neyi tudi amaha munodu iluña. Neyi tuneluki dehi kukala kunateli kumwekana, tukutachika kutoñojoka hayuma yitwatela kwila hakwila tudiloñesheli chadimu hakukala-hikukala kunateli kumwekana. (Yish. 21:5) Munjila yoyimu, twatela kwiluka kukala kunateli kutumwekena hanyima yakupapatishewa nawa twatela kudiloñeshela chadimu kulonda twiluki chitwakela neyi kukala kwamuchidiwu kutumwekena muchihandilu chetu. Chitwela mwenimu, tukatwesha kwiluka chakumanisha kukala nawa twakatwalekahu kwikala nawubwambu wawuwahi naYehova. (Mas. 17:5) Dichi, tuhanjekenu hakukala kusatu kunateli kumwekana nichitunateli kudiloñeshela chadimu hakukala-hikukala.a

NEYI MANAKWETU HELA MUHELA AYINEÑESHA

3. Kukalanyi kutunateli kumona muchipompelu?

³ Muchidi kwanuka chimwatiyili himwayili nakupompa katachi nichimwamweni kukeña kukwetiwu antu jaYehova? Komana mwakuhweleleli chikupu nenu munawani chalala? (Yow. 13:35; Kol. 3:12) Dichatiyiliyi Blancab. Hela chochu, hanyima yakupapatishewa kudi chuma chamumwekeneni chabulili kukuhwelelayi. Wahosheli nindi: “Muhela wumu wañilileña yuma yatama. Namutiyileña cheñi nakuhosha mazu atama hadi antu amakwawu muchipompelu. Nahayamini nankashi hakumona chumichi; muloña nadizili nami aYinsahu jaYehova azataña nañovu kuleta kuwunda nikumwekesha kukeña.” Diimu tuhu, amanakwenu niahela azataña nañovu kwikala nayilwilu yawakaKristu, ilaña antu jaYehova hiyawaninaku. (Efwe. 4:​23, 24; 1 Yow. 1:8) Dichi mpinji jikwawu, manakwetu hela muhela nateli kuhosha hela kwila chuma chikuyineñesha. (Yak. 3:8) Chawushona, kukala kwamuchidiwu kunakojeji amakwawu kuleka kumukalakela Yehova.

4. Yumanyi yinateli kutukwasha kudiloñeshela chadimu chitwatela kwila neyi manakwetu hela muhela natuneñeshi? (AEfwesesa 4:32)

⁴ Yumanyi yimunateli kwila chayinu mpinji kulonda mudiloñesheli chadimu chimwatela kwila neyi manakwetu hela muhela ayineñesha indi kwiji ayihilisha? Toñojokenuña chikupu nikuzatisha kufumba kwekala haAEfwesesa 4:32. (Tañenu.) Neyi muzata hakumina ñovu jenu kutwalekahu kutiyila antu luwi nikuyimwekeshela wushona, chakadi nikujina, mukutondolwelaña kubula kutiyashana nawakwenu. Dimikilenu chikonkwanyi chakwanakena akwenu chakufuma hamuchima kutalisha hayiluwa yakoñañawu. Chumanyi chinateli kuyikwasha kwila mwenimu? Toñojokenu mapampa imwamulombaña Yehova nenu ayanakeni yiluwa yenu nichayanakenañayi chakufuma hamuchima. (Mat. 6:12) Neyi mutoñojokaña hanochu chayanakenañayi Yehova chakufuma hamuchima, chikuyipelelaña ninenu kwanakena akwenu.

5. Chishinanyi chamuBayibolu chinateli kutukwasha neyi kudi muntu wunatuneñeshi? (Yishimu 19:11) (Talenu ninyevulu.)

⁵ Tañenu Yishimu 19:11. Bayibolu yahosha nawu neyi anatuhilishi, kashinshic kanateli kutukwasha kuwundisha kuzuwa. Ichi chishina chinamukwashi muhela Rima, wapapatishewa yaaka yantesha yinahitihu. Wahosheli nindi: “Neyi nimona amanakwetu niahela anakwila yuma munjila yinakuntiyisha kutama hela yinakunneñesha, nasambilaña kwanuka mazu ekala haYishimu 19:11. Nashinshikaña hachidi yuma muchihandilu chawu ninkulilu yawu, nawa nesekaña kutoñojoka hachuma chacheni chinaleteshi eli yuma munoyu njila. Cheñi, nazataña nawu mumudimu wakushimwina. Kwila mwenimu kwankwashaña kuyiluka chiwahi chekalawu.” Iku hikufumba kwakuwahi. Yilukenu chiwahi amanakwetu niahela yoyinu mpinji. Neyi muyiluka chiwahi, chikuyipelelaña nankashi kuyanakena neyi ela chuma chinayineñeshi.

6. Chumanyi chinateli kutukwasha kwikala nawubwambu wawuwahi nawamanakwetu niahela muchipompelu?

⁶ Chumanyi chimwatela kwila hakwila mwiikali nawubwambu wawuwahi nawamanakwetu niahela muchipompelu? Hampinji yimunakuyiluka amanakwenu niahela, shenuña nankashi muchima hayilwilu yawu yayiwahi. (Esekejenu Yishimu 10:12; Rom. 12:10; Fwili. 2:​2, 3) Talenu kwila chumichi chikwamukwashili Mark, manakwetu wapapatishewa katataka. Chatachikiliyi kudikunda chikupu nawamanakwetu niahela muchipompelu chawu, watachikili kwiluka yiluwa yawu. Chumanyi chamukwashili Mark kubula kuhukana muloña wayiluwa yamweneñayi mudi amanakwetu niahela? Wahosheli nindi: “Namweni nami nashileña muchima hayiluwa yanyanya yakoñeleñawu, nawa iyi yiluwa yadiña yanyanya nankashi neyi tuyesekeja nayuma yatama yinakukoñawu antu mukaayi. Nkumininaku, nelukili chikupu nami hinatela kusweja kusha maana hayiluwa yinakukoña akwetu akakwitiyaku. Dichi natachikili kusha muchima nankashi hayilwilu yawu yayiwahi.” Neyi ninenu mwilaña mwenimu, mukwikala nawubwambu wawuwahi nawamanakwenu niahela muchipompelu.

NEYI MUTACHIKA KWANUKA YUMA YIMWELILEÑA KUNYIMA

7. Chumanyi chinateli kutuletesha tutachiki kwanuka yuma yitwelileña kunyima?

⁷ Chimwadizili chalala katachi, chakadi nikujina mwatiyili neyi anayamuni chiteli chelili muleki kudikunda nakaayi kaSatana katama. Munateli kutoñojoka nenu, ‘Hanu dinu muntu wukutachika ñahi kwanuka yuma yelileñayi kunyima?’ Ilaña neyi munakumona kukala, munateli kutachika kwanuka—hadaha nikufwila chikupu—yuma yimwalekeli kwila himwatachikili kumukalakela Yehova. (Esekejenu Kuchinda 11:​4-6.) Chakutalilahu, amanakwetu amakwawu hadaha aleka kuzata nyidimu yayiletesheleña kutuumbakana ilaña yayimanishilileña mpinji. Amakwawu hadaha adiña nawamabwambu jawu adikundiliwu nawu chikupu akaanini kutwalekahu kwikala amabwambu jawu chatachikiliwu kudiza Bayibolu. Amakwawu niwena hadaha ashindili chaaku chayiteñwili, hela chakwila chayitiyishileña kuwaha, ilaña chadiña chawuzondu. Chinateli kutama nankashi neyi mukaKristu eteja yuma yelileñayi kunyima yimuleteshi aleki kumukalakela Yehova! Yumanyi yimunateli kwila chayinu mpinji kulonda mwakabuli kufunta kuyuma yimwelileña kunyima hela chakwila mwakamona kukala kwamuchidinyi?

8. Yumanyi yitunakudizila kuchuma cheliliwu aAbarahama naSara?

⁸ MuBayibolu ashimunamu akakudifukula ashinshika adi kutachika kwanuka yuma yashiyiliwu kunyima. Chakutalilahu, aAbarahama naSara amwovwahilili Yehova nawa ashiyili musumba wawu wakiñewa waUri nakuya nakushakama mumatenti. (Heb. 11:​8, 9) Chakadi nikujina, atela mumpinji-mumpinji anukileña chahandileñawu chiwahi muUri. Ilaña “neyi atwalekelihu kwanuka” hela neyi atachikili kufwila chikupu yuma yashiyiliwu kunyima, adi kwikala mukweseka kwakukeña kufunta kuUri. Ilaña, ashili maana hayuma yakumbidi.—Heb. 11:​15, 16.

9. Kapostolu Pawulu wamweneña ñahi yuma yashiyiliyi kunyima? (AFwilipi 3:​7, 8, 13)

⁹ Kapostolu Pawulu walekeli kwilahu yuma yimu kulonda yamukalakeleña Yehova. Henohu kanda ekali mukaKristu, amudizishili Nshimbi jawaYudeya kudi ntañishi alemesheliwu chikupu wejina daGamaleli. (Yilw. 22:3) Pawulu wadi kwikala nachifulu cheneni nankashi muKwitiya kwawaYudeya. (Ñal. 1:​13, 14) Hela chochu, chadiziliyi nsañu yayiwahi, walekeli kufwila yuma yejimiyi. Chelili ekali mukaKristu, komana mpinji yejima wamweneña wanyi kukala muchihandilu chindi? Inehi. Amweteleña, kumukasa mukaleya nikumuhela kudi akwawu aYudeya. (2 Kor. 11:​23-26) Neyi chakwila washili hohu muchima hakukala kwahitileñamu nikwesekeja chadiña chihandilu chindi chakunyima nachahandileñayi haniyi mpinji, wadi kukunkulula nindi waluwañesheli kwikala mukaKristu. Ilaña, Pawulu washili muchima hamudimu weneni wadiñayi nawu haniyi mpinji wakumukalakela Kristu Yesu niyuma yayiwahi yatalilileñayi kumbidi. Pawulu welukili chikupu nindi iji nkisu jabadikili yuma yejima yashiyiliyi kunyima.—Tañenu AFwilipi 3:​7, 8, 13.

10. Yumanyi yitwatela kutoñojokañahu mpinji yejima? (Maku 10:​29, 30) (Talenu ninyevulu.)

¹⁰ Yumanyi yitunakudizilaku? Neyi mutachika kwanuka yuma yimwalekeli kwila kulonda mwiikali mukaKristu, anukenuña cheñi chuma chacheni chaletesheli muyileki. (Mukwa. 7:10) Esekejenuña yuma yimwashiyili kunyima nayuma yayiwahi yimunakudiluñisha muloña wakwiluka chalala. Mukweti wubwambu wawuwahi naNyuuli wayileñaleña yejima. (Yish. 3:32) Mukweti chisaka chakuspiritu chayikeña. (Tañenu Maku 10:​29, 30.) Nawa munakuchiñeja yuma yayiwahi kumbidi! (Isa. 65:​21-23) Neyi mpinji yejima mutoñojokaña hayuma yayiwahi yimunakudiluñisha muloña wakumukalakela Yehova, chakadi nikujina, himukwanukaña yuma yimwashiyili kunyimaku.

11. Yumanyi yitunakudizila kuyuma yamumwekeneni muhela Rosemary?

¹¹ Muhela wejina daRosemary wapapatisheweli hadiñayi muyaaka yamuma 50. Talenu yuma yeliliyi kulonda atondolweli kufwila yuma yashiyiliyi kunyima. Wahosheli nindi: “Hakusambila, nanukileña Krisimansi, muloña diyi mpinji yinavulileña kudiluñisha nachisaka chami. Natiyileña kuwaha kwinka chisaka chami yawaana. Nazañaleleña hakumona anyana anahwili kumutondu waKrisimansi nawa anazañalali hampinji yinakushinkulawu yawaana yinayinkeleña.” Chumanyi chinamukwashi? Muhela Rosemary wahosheli nindi: “Kudi chuma chinahiñisha haKrisimansi. Hachaaka-hachaaka hefuku dambukaku, napompeshaña hamu chisaka chami, nayinkaña yawaana nawa nayilejaña chinayikeña.” Iwu muhela wamweni cheñi kukala kukwawu. Wahosheli nindi: “Chinadizili chalala, amabwambu inadiña nawu kunyima alekeli kudikunda nanami. Mpinji jikwawu, nayanukileña nawa natiyileña wuudi.”d Chumanyi chamukwashili? Washiliku ntanjikilu yakutachika kuzata mumudimu wakushimwina nawahela amboka-mboka. Wahosheli nindi: “Kwila mwenimu, kunankwashi kwikala nawamabwambu amaha inakeña nawa inalemesha.” Yumanyi yimunateli kudizila kudi iwu muhela? Hela chakwila munatwalekihu wanyi kwila yuma yayizañalesheleña henohu kanda mudizi chalala, kudi yuma yayiwahi nankashi yimwatela kwila yinateli kuyiletela muzañalu chikupu chayinu mpinji. (Fwili. 4:​8, 9) Nawa anukenuña nenu: Nawukwashu waYehova, mukwikalaña nayuma yayivulu nankashi kubadika yimunashiyi.

NEYI AMAKWAWU ALEKA KUMUKALAKELA YEHOVA

12. Kukalanyi kunateli kumwekana muchipompelu, sweje-e kukuyikalila kuumika?

¹² Chimwekalili Chinsahu, chakadi nikujina, mwatiyili neyi anayamuni chiteli hakushiya kaayi katama nakudibomba nezanvu dawantu ashimwinaña chalala nawa azataña nañovu kwila yuma yaloña. (Isa. 65:14) Hela chochu, mpinji jikwawu, munateli kutiya nawu kudi muntu wunakoñi chuma chatama muchipompelu. Amakwawu anateli nikuyifumisha muchipompelu. (1 Kor. 5:13) Talenu chuma cheliliyi muhela wejina daSamar hamumwekeneni chuma chamuchidiwu. Wahosheli nindi: “Hashimbwili wanyi kufuma hinapapatisheweli, mukulumpi wumu muchipompelu wakoñeli nshidi yeneni nawa amufumishili muchipompelu. Kwashalili hohu hanti kachi nahukeni, natoñojokeleña wanyi nami mukulumpi nateli kukoña nshidi kumesu aYehova nichipompelu.” Hela chochu, twatela kukuhwelela mpinji yejima netu amanakwetu niahela amukeña Yehova nawa akeñaña kutwalekahu kwikala ashinshika kudi yena. (1 Kor. 13:​4, 7) Ilaña, chawushona, muloña chaaka-hichaaka amakwawu ayifumishaña muchipompelu. Nawa chinateli kuyikalila nankashi neyi ntaña yenu hela muntu imwalemesha chikupu yafuukulahu kumushiya Yehova.

13. Yumanyi yitwatela kwila chayinu mpinji kulonda neyi ntaña yetu yamushiya Yehova, twakabuli kuhukana?

¹³ Munateli kudiloñeshela ñahi chadimu chayinu mpinji kulonda neyi ntaña yenu yamushiya Yehova, mwakabuli kuhukana? Twalekenuhu kukolesha wubwambu wenu naYehova. (Yak. 4:8) Bayi mwiteja wubwambu wenu naNzambi wushindameni hachikuhwelelu chamuntu wacheñiku. Chakutalilahu, hela chakwila twadifukwilaña hamu nachisaka chetu nichipompelu kakavulu, twatela cheñi kwikala nantanjikilu yahalwetu yakulomba nikutaña Bayibolu.—Mas. 1:2; 62:8.

14. Yumanyi yitunakudizila kuchuma cheliliyi kapostolu Petulu? (Yowanu 6:​66-68)

¹⁴ Tunateli cheñi kudizila kuchuma cheliliyi kapostolu Petulu helili atumbanji amavulu aleki kumulondela Yesu. Petulu hadaha haniyi mpinji niyena watiyishishili wanyi mwatalishiliyi Yesu. Ilaña talenu chahosheliyi kwesekeja namazu ekala haYowanu 6:​66-68. (Tañenu.) Chatela yasheña maana hayuma yelileñawu akwawu, Petulu washili muchima hachalala chamudizishiliwu kudi Yesu. Chafuminimu, Petulu wahukeni wanyi. Munjila yoyimu nimakonu, yilwilu yawakwenu hiyinateli kuhimpa chalala chalema chimwadiza nawukwashu wakuloñesha kwaNzambiku. Kakelenu kuchalala! Muhela Samar, ashimunawu hakusambila, wahosheli nindi, “Nadanukishaña mpinji yejima nami yiluwa yamuntu wumu hiyamwekeshaña nawu dichekala chipompelu chetu hela kuloñesha kwetu kwejimaku; nawa yamwekeshaña wanyi nawu dichekala yilwilu yaYehova.”

15. Yumanyi yimunakudizila kuchuma chamumwekeneni muhela Emily?

¹⁵ Talenu chuma chamumwekeneni muhela Emily. Chimwahitili mulungu wumu kufuma hapapatisheweliyi, amama yindi ashiyili chisaka chawu nawa ayifumishili muchipompelu. Emily wahosheli nindi: “Hinatoñojokelihu nami chuma chamuchidiwu chinateli kumwekanaku. Iku dikukala kweneni kunamonahu dehi, nawa nayanukaña amama nankashi.” Chumanyi chinamukwashi Emily? Wahosheli nindi: “Hinidi nkawamiku. Natambwilaña wukwashu kudi atata nikudi amanakwetu niahela muchipompelu, ekala tuhu neyi hichisaka chami. Muntu wejima nakuhita mukukala. Dimuloña waweni chichalemena kudikunda chikupu nawakwetu kulonda tudikolesheña.” (1 Pet. 5:9) Himwatela kuhembelela kumona kukala dinu mutachiki kudikunda nawamanakwenu niahelaku. Twalekenuhu kukolesha iwu wubwambu yoyinu mpinji. Neyi mwilaña mwenimu, hichikweti muloña nachuma chinateli kumwekanaku, chakadi nikujina, mukutiyaña neyi mudi nkawenu wanyi.

16. Yumanyi yitwatela kwanukaña? (Talenu nimwevulu.)

¹⁶ Anukenuña cheñi nenu Yehova wababeshaña antu akeñayi. (Heb. 12:6) Nakukeña ejima afumishawu muchipompelu afunti. (2 Pet. 3:9) Dichi neyi ntaña yenu indi kwiji ibwambu denu amufumisha muchipompelu, kuhwelelenu nenu akulumpi akuzata nañovu kumukwasha kulonda afunti kudi Yehova.—2 Tim. 2:​24, 25.

17. Yumanyi yitwatela kukuhwelela?

¹⁷ Tunahanjeki hohu hakukala kwantesha kumunateli kumona hanyima yakupapatishewa. Mwamweni, kukala kukwawu kunateli kuyitiyisha woma, ilaña kutiya woma nehi. Kudi yuma yayivulu yimwatela kwila hakwila mudiloñeshi. Nawa mwatela kuvulamena wanyi nenu mukweti Nkwashi wabadika: Yehova Nzambi. Nayikwashi dehi nawa nakukeña kutwalekahu kuyikwasha haya nyaaka! (1 Pet. 5:10) Mpinji yejima wukuyinkaña ñovu yakuumika kukala kwejima kumukumonaña. Neyi mutwalekahu kwiteja wukwashu waYehova, kwosi kukala kunateli kuyaambula nakuyitwala kwakulehi nayena!—Mas. 119:165; Rom. 8:​38, 39.