Twasandaña Yuma Yidi Neyi Mpwembu Jakola
1 Satana waputisha mesu awantu amavulu niyitoñojoka yawu hayaaka yayivulu, kuhitila mukuzatisha makasu nintañishilu yakutwamba. Watandisha ntañishilu yidi neyi kukuhwelela mudi Anzambi Asatu, wumi wakafwaña, nikesi kahelu. Satana wakoleshaña antu kujinooka nawu kwekala kwosi Nleñi nikujinooka nawu Nzambi hidiyi nsoneki yaBayiboluku. Kuditiya kwachaambu chekowa nimatuña hiyuma yikwawu yakañeshaña antu kubula kudiza chalala. (2 Kor. 4:4) Tunateli kusanda ñahi yuma yamuchidiwu yakuhwelelawu yidi neyi mpwembu jakola?—2 Kor. 10:4, 5.
2 Yitoñojoka yaBombelamu: Ntañishilu yansakililu yakuhwelela antu hayaaka yayivulu kakavulu yabombelañamu yitoñojoka yayeni yamumuchima wamuntu. Amakwawu akuhwelela nsañu yakutwamba kufuma tuhu kuwansi. Hakwila nawu tukwashi antu amuchidiwu, twatela kuhosha nakalemesha kutalisha hayuma yakuhwelelawu.—1 Pet. 3:15.
3 Tunateli kulemesha antu wenawa kuhitila mukuyinka mpinji yakulumbulula yuma yakuhwelelawu nimuloña wakuhwelelawu. (Yak. 1:19) Hadaha akuhwelela chikupu nawu wumi hiwafwañaku muloña afwishahu dehi antu yakeñawu nawa afwilaña kuyimona cheñi. Indi kwiji anakanaña mafuku akunooka muloña atiyaña kuwaha kwikala nampinji yakuhanjeka nachisaka chawu. Kutiyilila chinakuhoshawu kukutukwasha kwiluka yitoñojoka yawu nawa kukutukwasha kwakula munjila yayiwahi.—Yish. 16:23.
4 Mwimbujolenu Yesu: Yesu watwimikila chakutalilahu chachiwahi hampinji yakwiliyi malwihu amuntu welukili Nshimbi. Yesu hamulejeli chuma chatela kwilayuku, hekwawu ona muntu wadi kukaana muloña wadiña walemesha yuma yakuhweleleliyi. Ilaña, Yesu wateneni Nyikanda, nakumwila kulonda yahoshi yitoñojoka yindi, nawa wamukwashili kutoñojoka kuhitila mukumuleja chakutalilahu.—Luka 10:25-37.
5 Izu daNzambi dinateli kuletesha antu kuleka kukuhwelela ntañishilu yansakililu yakutwamba. (Heb. 4:12) Kuhitila mukulumbulula mumesu akuwunda nsañu yalala yinateli kusañumuna nyichima yawantiyilili etu, nawa tunateli kuyikwasha kukaana ntañishilu yakutwamba nakwiteja nsañu yalala yinateli kuyifumisha muwunduñu.—Yow. 8:32.