Munateli Kuhetelamu!
1. Muloñadi wutwatelela kutoñojoka hawupayiniya wampinji yejima?
1 Komana mwakeñaña muzañalu waweni muwumi wenu? Komana mwatiyaña kuwaha kukwasha antu amakwawu? Komana mwafwilaña kumukalakela Yehova chikupu? Hanawa malwihu ejima, neyi mwakulahu lumu nenu eña, dikwila nawu munateli kuzata hamu neyi payiniya wampinji yejima. Hela chochu, twatela kutoñojoka hayuma yidi neyi kuhemba chisaka ninyidimu yikwawu yamuNsona, niyikatu nikuzeya kwamujimba.
2. Tenenu maheta akuspiritu ahetañawu apayiniya ampinji yejima.
2 Mazu amonenenuwu Solomoni kusoneka kudi Nzambi esekeja nkisu jaYehova namaheta akumujimba. (Yish. 10:22) Makonu, nkisu jaYehova jinakumwekena chikupu mumaheta akuspiritu. Apayiniya ampinji yejima akweti maheta amavulu amuchidiwu. Chakutalilahu, adiluñishaña muzañalu weneni wekala mukuhana kudi antu amakwawu, hampinji ‘yinakukwatilawu mafuku maana’ chetala kuzata nyidimu yawu. (Kol. 4:5; Yil. 20:35) Yehova wamonaña nawa wahamekaña nyidimu yawu yakukeña. ‘Maheta amwiwulu’ amuchidiwu hiyamba kamana mudimuku. (Mat. 6:20; Heb. 6:10) Kubombelahu, hampinji yinakutalawu apayiniya ‘disu dawu mumu ho-o’ nikumukuhwelela Yehova kuyinka yuma yakeñañawu, wubwambu wawu nayena wakolaña.—Mat. 6:22, 25, 32; Heb. 13:5, 6.
3. Chambwinyi chidi hakachi kakufwila maheta akuspiritu nakukeña maheta akumujimba?
3 Kukeña maheta akumujimba kakavulu kwaleteshaña “kufwila yuma yawusupi yayivulu yakatishaña.” (1 Tim. 6:9, 10; Yak. 5:1-3) Ilaña nkisu yaYehova hiyekala muniyi njilaku. Kuzata mpinji yeneni mumudimu wakushimwina kwayikwashaña apayiniya ampinji yejima kutwalekahu kusha muchima kuyuma yakuspiritu nikushinshika yuma yabadika kulema. (Fwi. 1:10) Mana kwetu wumu walekeli mudimu windi wawu injiniya wadiña nakumumanishila mpinji yindi yejima kulonda kuzata mudimu wawupayiniya. Wahosheli nindi: “Mudimu wakumujimba wanzeyesheleña chikupu. Ilaña mudimu wawupayiniya hiwanzeyeshañaku. Chayinu mpinji nakwashaña antu nikuyidizisha nsañu yalala. Natiyaña kuwaha chikupu kukwasha antu kudiza nsañu yalala.”
4. Indi apayiniya ampinji yejima ayikiswilaña ñahi hampinji yaletañawu nkisu kudi amakwawu?
4 Nkisu Kudi Amakwawu: Makonu, antu ejima anakushakama ‘munyaka yakala.’ (2 Tim. 3:1) Antu kudi kwejima anakukeña kuchiñeja. Akwakushimwina aWanta atiyaña kuwaha chikupu neyi akwasha antu adana kuchiñeja kudiza nikwiteja nsañu yayiwahi. Apayiniya ampinji yejima ekalaña namuzañalu chikupu hakuzata maora akubadika ha 800 chaaka nichaaka mumudimu wakupulwisha mawumi awantu.—1 Tim. 4:16.
5, 6. Chumanyi chinateli kuyikwasha kwikala payiniya wampinji yejima?
5 Komana mwatoñojokañahu chikupu kukalakala hamu neyi payiniya wampinji yejima? Kukalakala wupayiniya kwakeñekaña ‘kukwatila mafuku akuhita maana’ kuyuma yabula kulema. (Efwes. 5:15, 16) Antu amavulu ela mwenimu nawa apelesha chihandilu chawu, ichi chayikwasha kubula kumanishila mpinji yeneni kumudimu wakumujimba kulonda azateña mpinji yeneni kuyuma yaWanta. Komana munateli kuloñesha nyidimu yenu kulonda mudibombi nawu?
6 Lombenu maana kudi Yehova kulonda muloñeshi chiwahi ndandanda yenu. (Yak. 1:5) Nkiswinyi yimukukuhwelela kutambwila? Mukutambwila maheta akuspiritu amavulu. Yehova wukayinka cheñi yuma yimwakankilaña lwakumujimba. (Mat. 6:33) Antu ejima amwesekaña Yehova muniyi njila akatambwila “nkisu yayivulu yakukañanya nihakuyitambwila.”—Mal. 3:10.